Read Hadiyya 1Qorontoos Asso 14 Bible Online

1Qorontoos Asso 14 - Hadiyya bible

1Qorontoos Asso 14

¹Iittina yaki'llehe. Keesammi Ayyaa'n uwwanchuwwa lophphaatim hiraago qoxxitakka'a hassehe.

²Ayyim mulli suuminne wocookkok manninatte ihoo'n Waa'inatte. Ixxi maaxamu woshsha wocookkokim Keesammi Ayyaaninnette ihu bikkina ayyim ixxi wocookkoka la'ooyyo.

³Ihukkaarem hiraago kurookkok manna qoxxiseenatte, sogeenattee baqaa'eenattee.

⁴Mulli suuminne wocookkokim ixxi gaga qoxxixxookko; ihukkaarem hiraago wocookkok amma'nnaano qoxxisookko.

⁵An ki'nnuwwi hundim mulli suuminne woccakkamisina hasoommo. Ihukkaarem hiraago kuttakkamisina lonsaa hasoommo. Amma'nnaan qoxxoo'isina ixxi wocookkoka tiraa kurookkok bee'ulas mulli suuminne wocoohaanniinsi hiraago wocookkok lophphookko.

⁶Iyyabbaayyuwwa, an ki'nnuwwina awwaadoo kaalta te'im lachcha te'im hiraagimma te'im losisimma amadaa ki'nnuwwi beyyo waaroo'n mulli suuminne wocummuuyyi waarumta'n ki'nnuwwina maha awwaadoommo?

⁷Foorbee'i luwwi oohim gambaabiyyi te'im diitta'i annanni annanni danaam sagara uwwoobee'an ihuta'n ee sagara ayyi la'eena xanookko.

⁸Odim xurumbuldu annanni sagarinne fugamubeelas orina ayyi gudookko?

⁹Ee'isam ki'nnuwdu manni qoossoobee'i mulli suuminne woccakkota'n hafachchina woccakkaman ihookko bagaan manni hinkid qoossaa la'eena xanookko?

¹⁰Uullanne dut annanni annanni suum yoo'is malbee'ane. Ee keenina hundinam tirat yoohane.

¹¹Ihukkaarem wocamu suu'mmeka tiratooma la'umbeelas ee suuminne wocoo manchina an mulli uulli manchi ihoommo. Ixxim iina mulli uulli manchi ihookko yimma.

¹²Ee'isam ki'nnuwwim Keesammi Ayyaa'n uwwanchuwwa qoxxitakka'a hassakkam keen ikkakko'i bikkina amma'nnaano qoxxisoo uwwanchuwwa siiddakkeena lonsitakka'a yaki'llehe.

¹³Ee bikkina mulli suuminne wocookkok ee wocookkoka tiraa kureena xanoo'isina Waa'a uunxona.

¹⁴Mulli suuminne Waa'a uunxoommi ammane i woronne yoo ayyaan uunxookko bagaan i tiir maham qoossooyyo.

¹⁵Eehannata'i an maha isso? An i woronne yoo ayyaaninne Waa'a uunxoommo. Odim i tiirinnem Waa'a uunxoommo. I woronne yoo ayyaaninnem zammaroommo; odim i tiirinnem zammaroommo.

¹⁶Eehid ihubeelas at ki woronne yoo ayyaaninne Waa'a galaxxitootti ammane oo uwwanchi uwwamubee'i manchi at mayyitaa Waa'a galaxxitoolda'e la'ubeelas hinkid ihaa «Aameen» yeena xanoo?

¹⁷At Waa'a erisa galaxxitoohan ihookko. Ihona bagaan oo ki galaxximmi mulli mancho maham qoxxisooyyo.

¹⁸An ki'nnuwwiinsi hundiinsim lonsaa mulli suuminne wocoommi bikkina Waa'a galaxxoommo.

¹⁹Ihukkaarem amma'nnaa'n wixxitenne mulli suuminne tommi kum sagara wocoommaanniinsi mulli keeno losiseena xale'i onti sagachcho i tiiriinsi wocimma iittoommo.

²⁰Iyyabbaayyuwwa, jor luwwina ciilluwwisa ikkehe bagaan ki'nnuwwi tiironne ciilluwwisa ikkakkotte. Ihukkaarem tiironne qoor keen ikkehe.

²¹ Keesammi Kitaabanne Moollanni «La'akkambee'i suume wocoo manninnee mulli uulli manni suuminnee ka minaadabina wocoommuulla. Ihona bagaan ixxuwwi an wocummoka macceessamooyyo» yaakko.

²²Eehannata'i mulli suuminne wocimmi mare'i ihookkok amma'nnu keeninatte ihoo'n amma'nnubee'i keeninatte. Ihukkaarem hiraagimmi mare'i ihookkok amma'nnaaninatte bagaan amma'nnubee'i keeninayyo.

²³Ayyi la'ukko amma'nnaan hundim wixxu beyyonne mulli suuminne wocukkuuyyi eekka la'oobee'i manni te'im amma'nnubee'i manni ee mine aaguta'n ki'nnuwwa machchaaraano yooyyonnihe?

²⁴Ihukkaarem hundim hiraaguta'n amma'nnubee'i manchi te'im eekka la'oobee'i manchi aaguta'n hundim wocoo woshsha macceesaa baaxiilaanchi ihukkisa la'aa ixxi gaga acceeqasookko. Ee'isam ixxi macceesoo sagarinne hundinnem ixxonne oogatamookko.

²⁵Ixxi wodanonne maaxamu luwwim ixxena caakkaa la'amookko. Ixxim «Hanqinam Waa'i ki'nnuwwi lambe'ennette» yukkuuyyi guruphphaa Waa'ina otossookko.

²⁶Eehannata'i iyyabbaayyuwwa, ki'nnuwwi mat ikkakka'a wixxitakkam ammane annannichchinam matina zammarimmi, matinam losisimmi, matina kaalta moo'immi, matinam mulli suuminne wocimmi, matina odim mulli suuminne wocakko'oka tirimmi uwwamookko. Oo hundim mulli keeno qoxxisoohan ihona.

²⁷Mulli suuminne wocookkok hee'ulas lam te'im eehanniinsi lophphukkaare sas ikka'a mat tirukkuuyyi kor korinne woccona.

²⁸Ihukkaarem tiraa kurookkok hee'ubeelas amma'nnaa'n lambe'enne cawwaa uraa ixxi gaginaa Waa'inaa wocona.

²⁹Hiraagaan lam te'im sas woccona; mulli keen wocamukkoka saarayyita'a moo'lla'a oogattona.

³⁰Ayyi la'ukko ee beyyonne afuurukkaannina matina mat luwwi caakkaa la'amukkan ihukkaa'lleensi illageen wocam hee'ukkok cawwihona.

³¹Hundim losoo'isinaa qoxxoo'isinaa hiraago woccakkam ammane mat mat ikkakka'a kor korinne woccehe.

³²Hiraagaa'n ayyaan hiraagaanina ijaajamookko.

³³Waa'i xummi Waa'a bagaan hambalaachchi Waa'ayyo. Amma'nnaa'n wixxitenne yoo Waa'i minaadab hundinam losamukkisam

³⁴amma'nnaa'n wixxitenne meenti wocoobee'isa cawwihona. Seerim «Meenti ijaajamona» yaakko.

³⁵Amma'nnaa'n wixxixxi lambe'enne meenti wocimmi tuussiisoohan ihu bikkina ayyi la'ukko ixxuwwi laqqeena hassam luwwi hee'uta'n minenne ixxuwwi aro'o xa'mmitona.

³⁶Waa'i sagar firukkok ki'nnuwwiinsettennihe? Te'im Waa'i sagar afukkok xale'i ki'nnuwwi beyyonnihe?

³⁷Ayyim ixxi an hiraagaancho te'im Waa'i Ayyaa'n uwwanchi iina yoohane yaa sawwoo ayyim hee'ulas ku kitaaboommi ijaaj Moollanniinsette ihukkisa la'ona.

³⁸Eekka la'oobee'ek ixxim la'amoone.

³⁹Ee bikkina iyyabbaayyuwwa, hiraago woccakkeena lonsitakka'a hassehe. Mulli suuminne wocimmam hoottakkotte.

⁴⁰Ihukkaarem hundem luwwim laboo'isinnee ogoraamisinnee ihona.