Read Hadiyya 1Qorontoos Asso 15 Bible Online

1Qorontoos Asso 15 - Hadiyya bible

1Qorontoos Asso 15

¹Iyyabbaayyuwwa, an ki'nnuwwina kurummaare ki'nnuwwim aa'llakka'a ixxonne qoxxitakka'a uullitakko'i mishiraachchi saga'l bikkina tiissiiseena hasoommo.

²An ki'nnuwwina kurummi mishiraachchi sagaranne qoxxitakka'a uullitakkolas gattakkamo. Eehid ihubeelas ki'nnuwwik amma'nnat awwaad bee'ane.

³ Hundiinsi horoor woshsha an aa'ummoka ki'nnuwwina higisaa uwwoommo. Oohim Keesammi Kitaabanne kitaabamukkisam Kiristoos ni baaxii'l bikkina lehukko

⁴ waammamukkoo. Odim Keesammi Kitaabanne kitaabamukkisam saxxi ballanne lehiinsi ki'ukko.

⁵ Ee lasage Keefa'ana moo'amukko. Odim tomminaa lamem losaaninaa moo'amukko.

⁶Odim onti xibbiinsi hanaan ihaakkoo awwonaanina matemaaggem moo'amukko. Ee keeniinsim lophphoo qax ka balli afeebe'e foorinnem yo'o. Ihukkaarem hof qax keen leto'ookko.

⁷Ee lasage Yaaqoobina moo'amukko. Ee lasage odim asse'amaanina hundinam moo'amukko.

⁸ Hundiinsim lasaanchonne amman bee'i qaramaammoo kar iinam moo'amukko.

⁹ Amma'nnito'i Waa'i minaadaba lobakata hawwisam hee'ummi bikkina an asse'amaan hundiinsim hoffane. Asse'amaancho yamamaa weeshameenam laboombee'an hee'ummo.

¹⁰Ihukkaarem Waa'i eroomminne an anette ihaammo. Iina uwwamu eroommim kora'ayyo. Eehanniinsim odim ixxuwwiinsi ayyeensim lonsaa baximminne badaraammo. Eekkam issummok anette ihoo'n i woronne yoo Waa'i eroomma.

¹¹Anettem ihummo te'im ixxuwwam ikko'o hinka'isinnem neese kullummaare ki'nnuwwi amma'nnitakko'ookko.

¹²Kiristoos lehiinsi ki'ukkisa kulloomman ihulas ki'nnuwwiinsi mat mat keen «Lehu manni ki'ooyyo» yitamok mahinatte?

¹³Eehaara'i lehiinsi kichchi bee'an ihulas Kiristoosim lehiinsi ki'ukkoyyo yimma.

¹⁴Kiristoos lehiinsi ki'ubee'an ihulas neese ki'nnuwwina kullummi woshshii ki'nnuwwi amma'nnatii awwaad bee'ane yimma.

¹⁵Lehu keen lehiinsi ki'oobee'an ihulas Kiristoosam lehiinsi Waa'i ki'isukkoyyo yimma. Eehid ihulas «Kiristoosa lehiinsi Waa'i ki'isaakko» yinaa kulloommi keen Waa'i bikkina qophphano kulloomman inkaa siidammaammo.

¹⁶Lehu keen lehiinsi ki'oobee'an ihulas Kiristoosim lehiinsi ki'ukkoyyo yimma.

¹⁷Kiristoos lehiinsi ki'ubee'an ihulas ki'nnuwwik amma'nnat awwaad bee'ane. Ki'nnuwwim kabad afeebe'em baaxiilinnem yoontakke'e yimma.

¹⁸Eehaara'i Kiristoosanne amma'nnita'a leto'i keen bi'llo'ookko yimma.

¹⁹Niina Kiristoosanne yoo neeyyat xale'i ka uulli heechchinatte ihukkaa'lleensi ni heechchi manni hundaanniinsim lophphaa kichche'isoohane yimma.

²⁰Ihukkaarem Kiristoos lehu keen hundinam won ihaa hanqinam lehiinsi ki'aakko.

²¹Mat manchinne leh waarukkisam lehiinsi kichchim mat manchinne waarukko.

²²Mashka'oomim Addaamenne hundim lehoo'isam Kiristoosinne hundim heechcha siixxookko.

²³Ihukkaarem annannichchim lehiinsi ki'ookkok korinnette. Kiristoos hundinam won ihaa lehiinsi ki'aakko. Ee lasage ixxi daba'llaa waaroo ammane ixxan ikko'i keen ki'llamo.

²⁴Gassaano, gassimmi malaayyi yoo keenoo malaayyaammuwwaa Kiristoos bi'isaa ki'aa adillano ixxi Anni Waa'ina uwwaa lasage lasaanchi ihookko.

²⁵ Waa'i diina'i hundam Kiristoos lokkiinsi woroon isseebe'e Kiristoos gassimmi hasisookko.

²⁶Lasaanchonne bi'oo diinakkichchim leho.

²⁷ Mashka'oomim Keesammi Kitaabanne «Waa'i hundem luwwam ixxena ijaajamoo'isina ixxi lokkiinsi woroon issaakko» yamamaakko. «Hundem luwwam ixxi lokkiinsi woroon issaakko» yookkok hundem luwwam ixxi lokkiinsi woroon issukkoka edoobee'is la'amaakkoohane.

²⁸Hundem luwwim ixxena ijaajamaa lasage Waa'i Beet ixxi gagim ixxi lokkiinsi woroon issu Waa'ina ijaajamookko. Ee'isinne Waa'i hundem luwwam gassookko.

²⁹Leto'i keen lehiinsi ki'llambee'an ihulas leto'i kee'n bikkina xammaqantam manni maha siixxitamo? Eehannata'i leto'i keen lehiinsi hore'oomam ki'llambeelas lehu manni bikkenne manni mahina xammaqamoolla?

³⁰Neese hundi ammanem u'nnanne hee'nnoommok mahinatte?

³¹Iyyabbaayyuwwa, an ballina ballina lehinne gambahoommuulla. Eekkam ki'nnuwwina hanqinam kuroommuullak Moollanni Yesuus Kiristoosanne niina yoo mateeyyoomanne bakke'oommi bikkinatte.

³² Efeesoonanne moochchisa ihaakkoo manninne gubbamummok xale'i ka uulli heechchinatte ihukkaa'lleensi an siixxoommi luwwi maruwwa? Eehannata'i lehu manni lehiinsi ki'oobee'an ihukkaa'lleensi «Soodo lenoommi bikkina intona, angona» yamamukkisayyonnihe?

³³Ki'nnuwwi huushantakkotte; jor beshichchi danaam haalata bi'isookko.

³⁴Tiiro issehe bagaan od baaxiilo baxxakkotte. Ki'nnuwwiinsi mat mat keen Waa'a laqqambee'i bikkina ixxuwwa tuussiiseena yaa kaka wocoommuulla.

³⁵Ihukkaarem mat manchi «Leto'i keen hinkid ki'llamo? Hinkido'i orachchindu waattamo?» yeena xanookko.

³⁶Ate ka qawwi mancho, at wixxittok shamubeelas hinkid ihaa mutookko?

³⁷At arasa te'im mulli hurbaata wixxoo ammane sirekkichchooma wixxootto bagaan mutaa li'ukkoka wixxittoyyo.

³⁸Ihukkaarem Waa'i iittukkisinne ee sire'ina orachcho uwwookko. Dut hagar sire'ina annannichchinam ee sire'i haga'l qoocci yoo orachcho uwwookko.

³⁹Mannik, diinaxxek, cii'ikii qurxumme'ikii hundikim orachchi annanna bagaan matoyyo.

⁴⁰Iima'nnekii uulli orachchii yookko. Ihukkaarem iima'n orachchik lombi uulli orachchi lombiinsi annanna.

⁴¹Eelliinchi nuur mato. Odim aga'n nuurim mullane. Boollaankikim nuur mullane. Mat boollaankichchik nuur mulli boollaankichchaanniinsi annanna.

⁴²Leto'i keen ki'llamokim ee'isame. Bi'oohan ihaa wixamukkok bi'oobee'an ihaa lehiinsi ki'ookko.

⁴³Lombi bee'eka wixamukkok lombinne ki'ookko. Hoongaanchi ihaa wixamukkokim malaayyaam ihaa ki'ookko.

⁴⁴Maa'l orachchi wixamookko. Ayyaa'n orachchim ki'ookko. Maa'l orachchi hee'ulas ayyaa'n orachchim yookko.

⁴⁵ Keesammi Kitaabannem «Luxxi manchi hee'u Addaam fooraam manchi ihukko» yamamaa kitaabamaakko. Ihukkaarem lasaanchi Addaam foore uwwoo Ayyaana.

⁴⁶Ihukkaarem gaassaa waarukkok maa'llane bagaan ayyaa'nnaneyyo. Ee lasage ayyaa'nnek waarukko.

⁴⁷Luxxeka qooccamu manchi buchchiinsi qooccamaakkoo buchchame. La'mmek iimaniinsette.

⁴⁸Buchchiinsi qooccanto'i keen ee buchchiinsi qooccamu manchisame. Iima'nnan ikko'i manni iimaniinsi waarukkokam labbamo.

⁴⁹Buchchiinsi qooccamu manchi hagara edde'nnummisam iimaniinsi waaru manchi hagaram edde'nnoommo.

⁵⁰Iyyabbaayyuwwa, an ki'nnuwwina kuroommok maarii xiigii Waa'i adillanonne aagooyyo. Ee'isam bi'ookkok bi'oobee'eka sharad issaa aa'ooyyo.

⁵¹ Macceessehe, mat maaxamaakkoo woshsha ki'nnuwwina kuroommo. Neese hundi lenoommoyyo. Ihukkaarem lasaanchonne xurumbulli fugamoo ammane neese hundim illi cilimmaaxqax ammanenne mullisanne daba'llinoommo. Xurumbullim fugamookko; leto'i keenim bi'llambee'i keen ikka'a lehiinsi ki'llamo. Neesem mulli hagaranne daba'llinoommo.

⁵²

⁵³Ku bi'ookkok bi'oobee'eka lehookkokim lehoobee'eka edde'immi hasisookko.

⁵⁴ Ku bi'ookkok bi'oobee'eka lehookkokim lehoobee'eka edde'oo ammane Keesammi Kitaabanne «Leh kaa'amaa bee'ukko».

⁵⁵ Odim «Leho, kiikki kaachchi hannonnette? ki qubdu hannonnette?» yamamaa kitaabamukkok wo'mmaakko.

⁵⁶Lehik qub baaxiilo. Baaxii'llekim malaayyi Seera.

⁵⁷Ihukkaarem ni Moollanni Yesuus Kiristoosinne niina kaachcha uwwu Waa'ina galat ihona.

⁵⁸Ee bikkina iittantakko'oo iyyabbaayyuwwa, ki'nnuwwi Moollannina badattakkam badallat kora'i ihubee'isa la'imminne heekke'llakkambee'isa qoxxehe. Moollanni baxinam ki'nnuwwi gaga higissakka'a uwwehe.