Read Hadiyya 1Qorontoos Asso 16 Bible Online

1Qorontoos Asso 16 - Hadiyya bible

1Qorontoos Asso 16

¹ An Galatiyanne yoo amma'nnaa'n wixxittuwwi amma'nnaanina ango'o uwwitona kurummisam ki'nnuwwim ango'o uwwehe.

²An waaraa lasage ango'o wixxaa'immi hasisoobee'isina ki'nnuwwiinsi annannichchim ixxi siixxukkisinne saantanne saantanne luxxi ayyaamonne mat luwwa fissaa annanni issaa wixxaa'ona.

³Ki'nnuwwiinsi laboo manna doo'llitakkamaare an waaraa assi kitaaba kitaabaa uwwoommaare ki'nnuwwi uwwitakko'i luwwa amadda'a Yerusaaleema mattamo.

⁴An marimmi hasisoohan ihulas ixxuwwim iinninne maqirem mattamo.

⁵ An Maqeedoone'inne higeena hasummi bikkina ee Maqeedoona afaa lasage ki'nnuwwi beyyo waaroommo.

⁶An maroommi beyyi hundinam mat mat luwwinne hara'mmitakkamisina mat qax ammane ki'nnuwwinne maqire afuuroo'n uroommoyyo. Ayyi la'ukko hagayyem ki'nnuwwinne higiseena xanoommo.

⁷Moollanni yukkaare mat qax ammane ki'nnuwwinne maqire higisoommi bikkina kaba higummuuyyi ki'nnuwwi beyyo afeena hasummoyyo.

⁸ Ihukkaarem Shaashshiqqi Uguxxi ontayyi ayyaam afeebe'e Efeesoonanne afuuroommo.

⁹Iinninne uullixxantam dut keen hee'llo'aarem mish yoo baxo baxoommisina iina gooc haraaraa fooqaakko.

¹⁰ Ximootoos i'isam Moollanni baxo baxoohan ihu bikkina ki'nnuwwi beyyo waaroo ammane wossoobee'isa aa'llehe

¹¹bagaan ixxo ayyim gadoone. Abbaayyuwwinne maqirem an ixxo egeroommuulli ihu bikkina ixxi xumminne qaqqisaa daba'llaa waaroo'isina hara'mmehe.

¹²Niyyabbaayyi Aphphuloosim abbaayyuwwinne maqirem ki'nnuwwi beyyo maraa moo'oo'isina lobakata uunxaa hee'ummo. Ihukkaarem ixxi kaba mareena xanubee'aarem ixxena makku ammane marookko.

¹³Baqi'llehe; amma'nnatonne qoxxitakka'a uullehe; badditakkotte; qoxxehe.

¹⁴Issitakkam luwwi hundam iittinne issehe.

¹⁵ Iyyabbaayyuwwa, Isxifaanoos mi'n abaroos Akaaya yakkam uullanne luxxeka gaassita'a amma'nnito'i keen ikko'isaa Waa'i minaadabina hara'mmimminam ixxuwwi gaga higissa'a uwwito'isaa laqqakkamo.

¹⁶Eehido'i keeninaa ixxuwwinnem baxonne badattam keeninaa ijaajantakkamisina ki'nnuwwa uunxoommuulla.

¹⁷Ki'nnuwwi bee'llakko'i beyyonne Isxifaanoos, Fardoonaaxoosii Akkaayqoosii i beyyo waatto'i bikkina liiramaammo.

¹⁸Ixxuwwi ki'nnuwwi tiiro usheexxisso'isam i tiirom usheexxisso'ookko. Eehido'i keeno ki'nnuwwim qoossitakka'a laqqehe.

¹⁹ Issiy uullanne yo'i amma'nnaa'n wixxittuwwi xummaato asse'llo'ookko. Odim Aqil, Phirisqilee ixxuwwi minenne wixxitam amma'nnaanii Moollanni summinne lobakat xummaato asse'llo'ookko.

²⁰Amma'nnaan hundim xummaato asse'aakko. Ki'nnuwwina'i ki'nnuwwim danaamisa suunqantakku'uuyyi xummaatixxammehe.

²¹An Phaawuloos i anginnem ka xummaato kitaabaammo.

²²Ayyim Moollanna iittoobee'ek hee'ulas duumamaakkoohan ihona. Ni Moollanna waare!

²³Moollanni Yesuus Kiristoosik eroommi ki'nnuwwinne maqire ihona.

²⁴I iitti Yesuus Kiristoosinne ki'nnuwwi hundinnem maqir ihona! Aameen.