Read Hadiyya 1Qorontoos Asso 2 Bible Online

1Qorontoos Asso 2 - Hadiyya bible

1Qorontoos Asso 2

¹Iyyabbaayyuwwa, Waa'ika mishiraachchi sagara ki'nnuwwina kureena waarummi ammane an ki'nnuwwina hayyo'oominne te'im qooroominne alallaatummoyyo.

²Mashka'oomim an ki'nnuwwinne hee'ummi ammane saqalamaa lehu Yesuus Kiristoosiinsi bagaan mulluwwa maham la'eena hasoombee'isina murte'aa hee'ummo.

³ An ki'nnuwwinne maqire hee'ummi ammane hoonginne, lobakat baddimminnee huxechchinnee hee'ummo.

⁴Ki'nnuwwik amma'nnat shooho'amukkok manni qooroominnette ihoo'n Waa'i malaayyennette ihoo'isina an ki'nnuwwina kurummokii losisummokii Keesammi Ayyaa'n malaayyinne moo'amukkane bagaan manna qawwiisoo qooroo'm lachchi yoo sagarinneyyo.

⁶Qoxxaalli amma'nnaa'n beyyonne qooroo'm woshsha woncoommo; ihukkaarem ka uulli manni qoorooma te'im bi'oo ka uulli gassaa'n qoorooma woncoommoyyo.

⁷Neese woncoommi qooroom manniinsi daphphaa maaxamaakkoo Waa'i qoorooma. Oo qooroomim lobakat doolliinsi illageen Waa'i ni lombina gudisaakkoo qoorooma.

⁸Ka uulli gassaaniinsi matim ee qoorooma la'ukkoyyo. Ixxuwwi laqqo'oota'n lombaam Moollanna saqaltam hee'llo'oyyo.

⁹ Ihona bagaan Keesammi Kitaabanne kitaabamukkisam «Manni illi moo'ubee'eka maccim macceesubee'eka wodanim sawwubee'eka Waa'i ixxo iittoo keenina gudisu luwwa» yaa

¹⁰Waa'i ixxi Keesammi Ayyaaninne niina caakkisaakko. Mashka'oomim Keesammi Ayyaan Waa'i sawwitinne yoo xillaalli woshshi hundam saarayyoohane.

¹¹Mat manchi woronne yoo sawwite ixxi tiiriinsi bagaan ayyim la'ooyyo. Ee'isam Waa'i sawwitenne yookkoka Waa'i Ayyaaniinsi bagaan ayyim la'ooyyo.

¹²Waa'i niina uwwu luwwa lanqoommisina kaba neese aa'nnummok Waa'i uwwu Keesammi Ayyaana bagaan ka uulli tiiroyyo.

¹³Ee bikkina neese Keesammi Ayyaana aa'llo'i keenina Waa'ina hee'akkam hanqo'i woshsha losinsoommuullak manniinsi lonsummi qooroominnette ihoo'n Waa'i Ayyaaniinsi lonsummi qooroominnette.

¹⁴Waa'i Ayyaan bee'i manchina Keesammi Ayyaaniinsi uwwamu luwwi qawwooma laboo bikkina Waa'i Ayyaaniinsi uwwamu luwwa aa'ooyyo. Oo uwwanchi qoossameena xanookkok Waa'i Ayyaaninnette ihu bikkina eehido'i manchi ee keeno qoossaa la'eena xanooyyo.

¹⁵Ihukkaarem Waa'i Ayyaan yoo manchi hundem luwwam saarayyaa la'ookko bagaan ixxo ayyim saarayyooyyo.

¹⁶ Keesammi Kitaabanne «Waa'i wodanonne yookkoka ayyi la'ookko? Ixxo sogeena xanookkodu ayyette?» yamamaa kitaabamaakko. Ihukkaarem Kiristoosik tiir niina yookko.