Read Hadiyya 1Qorontoos Asso 3 Bible Online

1Qorontoos Asso 3 - Hadiyya bible

1Qorontoos Asso 3

¹Iyyabbaayyuwwa, hanqo'isam ki'nnuwwina amma'nnubee'i mannisaa Kiristoosanne ciilluwwisaa issaate bagaan Waa'i Ayyaan yoo kee'nnisa issaa kureena xanoommoyyo.

² Qoxxaalli hurbaata ittakkeena xantakkobee'i bikkina an ki'nnuwwina ciilluwwisa ado amaayyam hee'ummo. Kabad afeebe'em qoxxaalli hurbaata ittakkeena xantakko'oyyo.

³Mashka'oomim kabad afeebe'em maa'llisinne hee'llakkamuulla. Ki'nnuwwi lambe'enne to'achchii wocanchii kabadem yoo bikkina hee'llakkamok maa'llisayyonnihe? Ki'nnuwwi heechdu amma'nnubee'i mannisayyonnihe?

⁴ Mashka'oomim ki'nnuwwiinsi mat mat keen «An Phaawuloosane» mullek odim «An Aphphuloosane» yimmi amma'nnubee'i mannisayyonnihe?

⁵Eehannata'i Aphphuloos ayyette? Phaawuloosdu ayyette? Neese ki'nnuwwi amma'nnitakkamisa issinummi Waa'ina awwaandoommi keeno. Neese annannichchim Moollanni niina banxona uwwu baxo banxoommi keeno.

⁶ An kaasummo, Aphphuloos wo'o agisukko. Ihukkaarem Waa'i li'isukko.

⁷Ee bikkina horoor baxo baxukkok li'isu Waa'a bagaan kaasukkokim wo'o agisukkokim mahayyome.

⁸Kaasukkokii wo'o agisukkokii lamim gudo. Annannichchim baxukkisinne ixxi malaayyika siixxookko.

⁹Neese maqirem Waa'ina banxoommi keeno[1]. Ki'nnuwwim Waa'ina abuulla. Odim baxantakko'oo Keesammi Mine.

¹⁰Waa'i eroommi iina uwwamukkisinne mine baxoo qoor manchisa ihaa shooho'o murummo. Mullekim ee shooho'onne baxookko. Ihukkaarem annannichchim eehanni hanenne hinkid baxooda'e qoossaa la'ona.

¹¹Mashka'oomim mexxokore muramu shooho'iinsi bagaan ayyim mulli shooho'o mureena xanooyyo. Oo shooho'im Yesuus Kiristoosatte.

¹²Ee shooho'onne worqinnette ihukko te'im birinnette ihukko te'im bito xee'aalli kininnette ihukko te'im haqqinnette ihukko te'im huqqinnette ihukko te'im gaabinnette ihukko

¹³annannichchim mahinne baxuda'e giirinne la'isoo oogaxxi ayyaam waarookko. Ee ayyaamo annannichchikim baxu bax hinkido'anda'e ihukkisa giirinne keenamookko.

¹⁴Ee shooho'onne baxu bax ayyekim shokkoo'n gatulas irifo'o siixxookko.

¹⁵Ayyi manchikim baxu bax giiranne shokkaa bi'uta'n irifo'o siixxooyyo. Ihukkaarem ixxi gagoom gii'l woriinsi xoraa firu manchisa gatookko.

¹⁶ Ki'nnuwwi Waa'ina Keesammi Min ikkakko'isaa Waa'i Ayyaan ki'nnuwwi woronne hee'oo'isaa laqqakko'oyyonnihe?

¹⁷Ayyim Waa'ika Keesammi Mine gindulas Waa'im ixxo gindookko. Mashka'oomim Waa'ik Min Keesamma. Oo Keesammi Minim ki'nnuwwi gagame.

¹⁸Ayyim ixxi gaga huushisoone. Ki'nnuwwiinsi ayyim ka uulli mannisinne «An qoora» yaa sawwookkok hee'ulas qawwisa ihona. Ee'isinne ixxi qoor ihookko.

¹⁹ Mashka'oomim ka uulli qooroom Waa'i illagenne qawwooma. Keesammi Kitaabanne «Qoor keeno Waa'i ixxuwwi hantaarinnem amadaakko» yamamaakko.

²⁰ Odim mulli beyyonnem «Qoor kee'nnek sawwit awwaad bee'an ihukkisa Moollanni la'ookko» yamamaa kitaabamaakko.

²¹Luwwi hundim ki'nnuwwan ihu bikkina ayyim mannanne bakke'oone.

²²Phaawuloosattem ihukko Aphphiloosattem ihukko Keefa'attem ihukko ka uullam ihukko heechcham ihukko lehom ihukko kaba yoo luwwam ihukko waaroo luwwam ihukko luwwi hundim ki'nnuwwane.

²³Ki'nnuwwim Kiristoosane. Kiristoosim Waa'ane.