Read Hadiyya 1Qorontoos Asso 4 Bible Online

1Qorontoos Asso 4 - Hadiyya bible

1Qorontoos Asso 4

¹Manni neese Kiristoosina awwaadaan inkummisaa Waa'ika maaxamu woshsha kurimmi yab uwwamu kee'nnisaa issaa xigimmi hasisookko.

²Oo yab uwwamu keenim amma'nnanto'oo keen ihimmi hasisookko.

³I bikkina ihulas ki'nnuwwam ikkakko'o te'im mulli keen eesenne oogatuta'n iina mahayyome. An i gagannemakkota'n oogateena xanoommoyyo.

⁴Eese acceeqasoo luwwi i tiironne mahim bee'e. Ihukkaarem ookki an muccur ihummisa moo'isooyyo. Eesenne oogatookkok Waa'a.

⁵Ee bikkina Moollanni waaroo oogaxxi ayyaam afoo'n ayyennem maham oogattakkotte. Ee ammane ixxi tuunsonne maaxamu luwwa caakkanne fissookko. Manni wodanonne yookkokam la'isookko. Ee ammane annannichchim Waa'iinsi laboo galata siixxookko.

⁶Iyyabbaayyuwwa «Kitaabamukkaanniinsi higgitte» yookkok mayyimda'e laqqakkamisina ki'nnuwwi bikkina yaa ee hundinam Aphphuloosaa i gagaa kobi'llishshi issaa hincaa'aammo. Ee bikkina ki'nnuwwiinsi ayyim mat manchonne biranchinne fugamaa mulleka gadoone.

⁷At mullaanniinsi lophphitoo'isa issukkok ayyette? At Waa'iinsi aa'lloo'n gatu luwdu maruchcho? Eehaara'i aa'llaattoohan ihulas Waa'iinsi aa'llitbee'i ki gaqqi luchchisa issitaa bakke'lloottok mahinatte?

⁸Ki'nnuwwina kaba hassakkam luwwi hundim yookko; lobakata goddaanom ikkakko'ookko; neese bee'em adilluwwi ikkakko'ookko. Adilluwwi ikkakkota'n neesem ki'nnuwwinne maqirem adilluwwi inkam hee'nnummo.

⁹Waa'i asse'amaaninaa manninaa uulli hundinam lelli inkaa moo'ammaammo. Mashka'oomim asse'amaan inkummi neese Waa'i hundiinsim lasaanchonne lehina oogatamaa hincoo mannisa issukkoka labisoommuulla.

¹⁰Kiristoos bikkina yinaa neese qawwuwwa; ihukkaarem ki'nnuwwi Kiristoosinne qoolluwwa. Neese hoongaan keeno; ihukkaarem ki'nnuwwi qoxxaalluwwa. Neese gadammaammoo keeno; ihukkaarem ki'nnuwwi lombi yoo keeno.

¹¹Kabad afeebe'em neese sibaalloommuulla, xeebe'nnoommuulla, kallemalloommuulla, huuntihuuntaa'akkamuullaa mine hoongaa beyyiinsi beyyo do'nnoommuullaa.

¹² Ni heechchina hasisoo luwwa siixxineena ni anginnem badalloommuulla. Neese duumakkamaarem maasse'nnoommuulla; lobakata hawwisakkamaarem iyyaqqinoommuulla.

¹³Neese game'llakkamaarem eroka daballoommo. Kabad afeebe'em ka uulli manni fissaa darabu haccisa inkaammo.

¹⁴An kaka ki'nnuwwina kitaabummok iittoommi oosisa issaa ki'nnuwwa sogeenatte bagaan tuussiiseenayyo.

¹⁵Ki'nnuwwina Kiristoosinne xigiinsi hanaan ihaakkoo abooyyaan hee'ukkaarem ki'nnuwwina lobakat anno'i bee'e. Mishiraachchi sagara kurimminne Yesuus Kiristoosinne ki'nnuwwina anni anette.

¹⁶ Ee bikkina eese labbakkamisina uunxoommo.

¹⁷An Kiristoosinne hee'oommi heechcha beyyi hundannem amma'nnaan hundinam losisummoka kuroo'isina Moollanninne amma'nnamaakkoo iittoommi i beet Ximootoosa ki'nnuwwi beyyo asse'aammo.

¹⁸Ki'nnuwwiinsi mat mat keen an ki'nnuwwi beyyo waaroombee'eka labissa'a birantamuulla.

¹⁹Ihona bagaan Moollanni yukkaare an ki'nnuwwi beyyo qaqqisaa waaraa ee birantam kee'nnek woccam woshshi xale'i ihoo'n ixxuwwika malaayyem la'eena hasoommo.

²⁰Mashka'oomim Waa'ik adillan moo'amookkok Waa'i malaayyinnette bagaan wocinneyyo.

²¹Ki'nnuwwi hassakkamok maruwwa? Ki'nnuwwi beyyo muga amadaa waaronnihe? Te'im ki'nnuwwi beyyo iittinnee maashaalli tiirinnee waaro?