Read Hadiyya 1Qorontoos Asso 5 Bible Online

1Qorontoos Asso 5 - Hadiyya bible

1Qorontoos Asso 5

¹ Ki'nnuwwi lambe'enne saa'immi yoo'is macceesamoolla. Eehido'i tuussiisoo saa'immi mulli minaadaphphi lambe'ennem hore'em hee'oobee'ane. Mashka'oomim ixxi annare gassaakkoo manchi yookko.

²Eehido'i tuussiisoo jor baxo baxu mancho ki'nnuwwi lambe'iinsi yaayyimmii kichche'immii hasisukkuuyyi hinkid birantakkamuulla?

³An maarinne maham ki'nnuwwiinsi annanni ihummaarem sawwitinne ki'nnuwwinne maqire yoommaannisa ihaa eehido'i luwwa baxu manchonne Moollanni Yesuus summinne oogataammo. Ki'nnuwwi wixxitakkam ammane i tiirim ni Moollanni Yesuus malaayyinne ki'nnuwwinne maqire yookko.

⁵Ee manchik maar bi'oo'isina wixxitakkam ammane Sheexaanina higissakka'a uwwehe. Eekka issitakkamok Moollanni Yesuus waaroo balla ee manchik foor gatoo'isinatte.

⁶ Ki'nnuwwi biramimmi eraneyyo. Hofqax ursho'i lobakat qama hufaa'oo'isa laqqakkamoyyonnihe?

⁷ Haareechchi qa'mmisa ikkakkeena moosir ursho'i'nnoo'i baaxiilo fissitakka'a hoollehe. Hanqinam ki'nnuwwi urshobee'i keeno. Shaashshiqqi Uguxxi gereechchisa Kiristoos ni bikkina kitimamaakko.

⁸ Ee bikkina boqqoomii jollii exxaakkoo ursho'innette ihoo'n ursho'i exxubee'i qorosho'inne oohim muccuroominnee hanqinnee uguda lonsinona.

⁹Kanniinsi illageen kitaabummi assonne «Saa'aaninne mat ikkakkotte» yaa hee'ummo.

¹⁰Eehid yummokim «Ka uulli saa'aaniinsi, mixxam keeniinsi, boggam keeniinsii qophpha'n waa'ina otossitam keeniinsii annanni ikkehe» yimmayyo. Ee'isa yakkota'n ka uulliinsi annanni ihimmi hasisam hee'ukko.

¹¹Ihukkaarem an kitaaboommok summina amma'nnaanoo yamanta'a «Saa'llam keeniinsi, mixxam keeniinsi, qophpha'n waa'ina otossitam keeniinsi, manna game'llitam keeniinsi, dimbitam keeniinsii boggam keeniinsii annanni ikkehe» yaatette. Eehido'i manchinne hore'em maqire ittakkotte.

¹²Amma'nnubee'i keenonne oogateena eese mah aagisaate? Amma'nnaanonne oogattakkeena ki'nnuwwi xantakkamoyyonnihe?

¹³ Amma'nnubee'i keenonne Waa'i oogatookko. Keesammi Kitaabannem «Jor mancho ki'nnuwwi lambe'iinsi fissehe» yamamaakko.