Read Hadiyya 1Qorontoos Asso 6 Bible Online

1Qorontoos Asso 6 - Hadiyya bible

1Qorontoos Asso 6

¹Ki'nnuwwiinsi ayyim amma'nnaanchinne wocamuta'n amma'nnaanonne kasasimmi hasisukkuuyyi amma'nnubee'i mannanne kasaseena hinkid iggukko?

²Waa'i doo'llu minaadab ka uulli mannanne oogattamisa laqqakkamoyyonnihe? Ka uulli mannanne oogattakkeena xantakkaman ihulas gootto'i luwwanne oogattakkeena xantakkamoyyonnihe?

³Waa'i asse'amaanonne oogantoommisa laqqakkamoyyonnihe? Waa'i asse'amaanonne oogantoomman ihulas ka uulli woshshanne oogatimmi hinkaa'nna sholle'aalla.

⁴Eehido'i woshshi ki'nnuwwi lambe'enne ki'oo ammane amma'nnaa'n beyyonne gadanto'oo keen oogattona mahina doo'llitakkamuulla?

⁵An ki'nnuwwa tuussiiseena kaka ki'nnuwwina kuroommo; eehaara'i amma'nnaaniinsi woshsha mureenaa lommanchi iheenaa xanoo tiiraam manchi ki'nnuwwi lambe'enne bee'ennihe?

⁶Ihukkaarem amma'nnaanchi amma'nnaancho kasasaa amma'nnubee'i keen oogatona oogaxxi mine massoollayyonnihe?

⁷Eehannata'i fit ki'nnuwwi lambe'enne hee'immi ixxi gagoomim ki'nnuwwina shollechcha. Ki'nnuwwi hawwodantakkota'nnii qawwiisantakkota'nnii e'llooyyonnihe?

⁸Ihukkaarem ki'nnuwwi gagim ki'nnuwwi abbaayyuwwa hawwoddakkamuullaa qawwiissakkamuullaa.

⁹Boqqi keen Waa'i adillanonne aaggambee'isa laqqakkamoyyonnihe? Ee bikkina ki'nnuwwi huushantakkotte. Saa'llam keen, qophpha'n waa'ina otossitam keen, lokko iggaalluwwi, meenti bikkenne gooninne iinse'oo goon te'im goo'n bikkenne meentinne iinse'oo meenti,

¹⁰game'llam keen, mixxam keen, dimbitam keen, game'llantam keenii boggam keenii Waa'i adillanonne aaggamoyyo.

¹¹Ki'nnuwwiinsim mat mat keen eehido'i keen hee'llakko'o. Ihukkaarem Moollanni Yesuus Kiristoos summinnee Waa'i Ayyaaninnee baaxiiliinsi aanshaqqitakko'ookko. Waa'ina keesantakko'ookkoo muccuttakko'ookkoo.

¹² Luwwi hundim iina uwwamaakko. Ihukkaarem oo luwwi hundim iina awwaadooyyo. Luwwi hundim iina uwwamaakko. Ihukkaarem matem luwwinam agishshi ihoommoyyo.

¹³Hurbaat godabinatte. Godabim hurbaatinatte. Ihukkaarem Waa'i ee lamom bi'isookko. Orachchi Moollanni awwaadinatte bagaan saa'imminayyo. Moollannim orachchinatte.

¹⁴Waa'i Moollanna lehiinsi ki'isukkisam odim neesem ixxi malaayyinne lehiinsi ki'isookko.

¹⁵Ki'nnuwwik orachchi Kiristoosina qaamafeet ihukkisa laqqakkamoyyonnihe? Eehannata'i Kiristoos qaamafeeta massaa saa'aanchi qaamafeetinne mat issonnihe? Hore'em issoommoyyo.

¹⁶ Saa'aanchonne iinse'ookkok isenne mat orachchi ihukkisa laqqakkamoyyonnihe? Mashka'oomim Keesammi Kitaabanne «Lamim mat orachchi ikkamo» yamamaakko.

¹⁷Ihukkaarem Moollanninne mat ihukkok Moollanni Ayyaaninnem mat ihookko.

¹⁸Ee bikkina saa'immiinsi gibbehe. Saa'immiinsi bagaan manni baxoo mulli baaxiil hundim ixxi orachchiinsi annanni ihaakkoohane. Ihukkaarem saa'ookkok ixxi gaqqi orachchonne baaxiilo baxoolla yimma.

¹⁹ Ki'nnuwwik orachchi Waa'iinsi aa'llakko'i Keesammi Ayyaan hee'oo Keesammi min ihukkisa laqqakko'oyyonnihe? Ki'nnuwwi orachchi Waa'ane bagaan ki'nnuwwi gaqqaneyyo.

²⁰Ki'nnuwwi bitaa'antakko'oo keen ikkakko'i bikkina ki'nnuwwi orachchinne Waa'a lonsehe.