Read Hadiyya 1Qorontoos Asso 8 Bible Online

1Qorontoos Asso 8 - Hadiyya bible

1Qorontoos Asso 8

¹Qophpha'n waa'ina uwwakko'i hurbaaxxi bikkina niina hundinam lachchi yoo'isa lanqoommo. Eehido'i lachchi bolxisoohane. Ihukkaarem iitti li'isoohane.

²Ayyim «Mat luchcho la'oommo» yaa sawwuta'n ixxi la'immina hasisooqax lachcha la'oo'n yookko.

³Ayyim Waa'a iittulas Waa'i ixxo la'ookko.

⁴Eehannata'i qophpha'n waa'ina uwwakko'i hurbaata itimmi bikkinatte yakkota'n oo qophpha'n waa'i awwaad bee'i luwwi ihukkisa lanqoommo. Oohim matem Waa'iinsi bagaan mullek bee'e.

⁵«Waa'a» yakka'a otossakkam dut qophpha'n waa'uwwii moollanno'ii iimanennettem ihukko te'im uullannem hee'immi hanqame.

⁶Ihukkaarem luwwi hundam qooccukkokii neesem ixxena hee'nnoommokii matem Anni Waa'i niina yookko. Ee'isam luwwi hundim ixxenne qooccamukkokii neesem ixxenne hee'nnoommokii mexxo'i Moollanni Yesuus Kiristoos niina yookko.

⁷Ihona bagaan oo lachchi hundina bee'e. Ihukkaarem mat mat keen kanniinsi illagenne qophpha'n waa'ina otossitu'uuyyi hee'llo'o. Ee bikkina hanqo'isam «Qophpha'n waa'ina uwwamaakkoo hurbaata» yitu'uuyyi ittam bikkina ixxuwwik tiir hoogimminne haashaaramaakkoohane.

⁸Niina Waa'inne yoo mateeyyooma hurbaat qoxxisooyyo. Intumbee'aarem maham hawwodammoommoyyo. Intummaarem maham hara'mmooyyo.

⁹Ihona bagaan ki'nnuwwina yoo wolabban amma'nnatonne qacaalli keeno qoloobee'isa ege'llehe.

¹⁰Lachchi yoo at qophpha'n waa'i minenne aaggaa ittittuuyyi amma'nnatonne qacaalli manchi moo'uta'n ee qophpha'n waa'ina uwwakko'i hurbaata iteena iggooyyonnihe?

¹¹Eehannata'i lachchi yoo ki mashka'inne Kiristoos ixxi bikkina lehu oo qacaalli amma'nnaanchi bi'aakko yimma.

¹²Ee'isinne amma'nnaan abbaayyuwwa hawwoddakku'uuyyii ixxuwwika hoongaanchi tiirom omassitakku'uuyyii Kiristoosam hawwoddakkamuulla.

¹³Ee bikkina maara itimmi iyyabbaayyo qoloohan ihukkaa'lleensi iyyabbaayyo qoloommaanniinsi hore'em maara itoommoyyo.