Read Hadiyya 2Qorontoos Asso 1 Bible Online

2Qorontoos Asso 1 - Hadiyya bible

2Qorontoos Asso 1

¹Qorontoos beero'o'n amma'nnaa'n wixxitinaa Akaayanne yoontakke'i Waa'i minaadab hundinamii Waa'i doo'llinne Yesuus Kiristoosina asse'amaanchi ihummi iinniinsi Phaawuloosiinsii niyyabbaayyi Ximootoosiinsii asse'amu asso.

²Niyyanni Waa'ikii ni Moollanni Yesuus Kiristoosikii eroommii xummii ki'nnuwwina ihona.

³Ni Moollanni Yesuus Kiristoosina anni ihu Waa'ina oohim qishixxatina anninaa qoxxisimmi hundinam Waa'inaa galat afona.

⁴Waa'i neese qoxxisukkisam neesem ihu hawwonnem yoo keeno qoxxinsoommisina hawwonne hundannem neese qoxxisookkok Waa'a.

⁵Yesuus Kiristoosika hawwo lobakata baxxammummisam ixxenne qoxximmam lobakata baxxammoommo.

⁶Neese hawwinummaarem hawwinoommok ki'nnuwwi gattakkamisinattee qoxxitakkamisinattee. Neese qoxxinoommokim ki'nnuwwi qoxxitakkamisinatte. Oohim neese aa'nnoommi hawwo xa'nnimminne aa'llakka'a iyyaqqitakkamisinatte.

⁷Ni hawwo baxxantakko'isam qoxximmam baxxantakkamisa lanqoommi bikkina neese ki'nnuwwi bikkina sawwinoommi sawwit qoxxaalla.

⁸ Iyyabbaayyuwwa, Issiyanne neesenne afu hawwo laqqakkoo'n gattakkona hansoommoyyo. Hore'em iyyakka'a xanakkambee'i kee'mmaalli hawwi neesenne afu bikkina foore koo'llinaa hee'nnummo.

⁹Hore'em neesenne leh oogatamukkaannisa xingaa hee'nnummo. Eehid ihukkokim neese ni gagannette ihoo'n lehu keeno lehiinsi ki'isoo Waa'anne bakke'nnoommisinatte.

¹⁰Ixxi neese lenaammoo beyyiinsi gatisukko. Ka lasagem gatisookko. Odim neese gatisoo'isina ixxo ku'llinaa yoommine.

¹¹Ki'nnuwwim Waa'a uunximminne niina hara'mmehe. Dutaagge Waa'a uunximminne niina uwwamoo maassinne ki'ukkok lobakat keen ni bikkina Waa'a galaxxitamo.

¹²Ni bakkechchi kane, neese ka uullanne lophphaatim ki'nnuwwi beyyonne Waa'iinsi siindummi muccuroominnee xabbeenoominnee hee'nnummisa ni wodan la'ookko. Oohim Waa'i eroomminnette bagaan manni qooroominneyyo.

¹³«Neese ki'nnuwwanne liirammummisam Moollanni Yesuus waaroo balla ki'nnuwwim neesenne liirantakkamisina kaba hunda qoossitakkobee'aarem lasage hundam qoossitakkamo» yaa sawwoommo. Neese ki'nnuwwina kitaambummok qananaa'llakka'a qoossitakkeena xantakkam luwwa bagaan mulli luwwa maham kitaambummoyyo.

¹⁵An eekka amma'nnummi bikkina lam gada'a siixxitakkamisina ki'nnuwwi beyyo gaassaa waareena sawwaammo.

¹⁶ Maqeedoona marummuuyyi ki'nnuwwa moo'aa higaa daba'llaa waarummuuyyi odim ki'nnuwwi beyyinne waaroommaare hara'mmato uwwitakka'a Yihuxxi uulla geegeessakkamisina hasaammo.

¹⁷Ee'isa isseena sawwummaare lamaankaanchi ihummo yitakka'atennihe? Matemaaggem «Eeyya» yaa odim «A'a'e» yeena gudaakkoo ka uulli mannisa ihummonnihe?

¹⁸Hanqinam Waa'i la'oo'isam neese ki'nnuwwina woncoommi woshshanne «Eeyya» yinaa odim «A'a'e» yimmi hee'ukkoyyo.

¹⁹ Sillaas, Ximootoosii anii ki'nnuwwina alallaantummi Waa'i Beet Yesuus Kiristoos beyyonne hundi ammanem xale'i «Eeyya» yimmiinsi bagaan «Eeyya» yakka'a «A'a'e» yimmi bee'e.

²⁰Waa'i neeyyata aagu luwwi hundim wo'mmookkok Yesuus Kiristoosinnette. Neesem Yesuus Kiristoosinne inkaa «Eeyya» yinaa Waa'i lombina «Aameen» yinoommok ee bikkinatte.

²¹Neese ki'nnuwwinne maqirem Yesuus Kiristoosinne qoxxisukkokii doo'llukkokii Waa'a.

²²Waa'i ixxan inkummisa moo'iseena ixxeka koobo'o neesenne issaa ixxeka Keesammi Ayyaanam niina lubbat issaa ni wodanonne dissaakko.

²³An Qorontoos beero'o waarimma hosummok ki'nnuwwa kichche'isimma ceemaatette. Eekka Waa'i la'ona!

²⁴Amma'nnatonne ki'nnuwwi qoxxitakka'a yoontakke'e. Neese ki'nnuwwinne maqire banxoommok ki'nnuwwa liiransineenatte bagaan ki'nnuwwi amma'nnitakkam luwwa ijaanjeenayyo.