Read Hadiyya 2Qorontoos Asso 10 Bible Online

2Qorontoos Asso 10 - Hadiyya bible

2Qorontoos Asso 10

¹Ki'nnuwwi beyyonne hee'ummuuyyi tuullaalli ihummaarem qee'llonne hee'ummuuyyi iggaalli an Phaawuloos i gagim Kiristoos maashaalloominnee eroomminnee ki'nnuwwa uunxoommo.

²Neese Waa'a amma'nnubee'i mannisa ikkamuulla yitam keenonne moo'isoommi iggimma ki'nnuwwi beyyo waaroommi ammane ki'nnuwwannem moo'isoombee'isina ki'nnuwwa uunxoommo.

³Neese maham ka uullanne hee'nnummaarem ka uulli mannisa qasammoommoyyo.

⁴Neese qasammoommi o'l mu'utim diina'ika girbuwwa hundam gindanseena xanoo Waa'i malaayyi yoohane bagaan ka uullaneyyo.

⁵Neesem fitanchaa Waa'i lachchinne uullixxamoo biranchaa bi'insaa mannika sawwit hundam qeefandaa Kiristoosina ijaajamoo'isa issinoommo.

⁶Ki'nnuwwi guullitakka'a ijaajantakkam ammane ijaajamoobee'i keeno hundam guzumo'nneena gundaammo.

⁷Ki'nnuwwi moo'llakkamok mat luwwika han xale'e. Ayyim Kiristoosan ihukkisa ixxi gaga xigoohan ihulas ixxesam neesem Kiristoosan inkummisa la'ona.

⁸Mashka'oomim neese ki'nnuwwa bi'insonatte ihoo'n qoxxinsona Moollanni niina uwwu malaayyenne an lobakata bakke'nnumta'nnim tuussiisooyyo.

⁹An kitaabummi assi kitaabanne ki'nnuwwa baddisoommoka labissakkotte.

¹⁰Mashka'oomim mat mat keen «Ixxi kitaaboo assi kitaab kee'mmaallaa qoxxaallaa. Ihukkaarem niinninne maqire hee'u ammane hoongaancho; wocoo woshshim qacaalla» yitamo.

¹¹Neese ki'nnuwwiinsi annanni inkaa assi kitaabanne kitaambummi woshshi ki'nnuwwinne maqire hee'nnummi ammanem issinoomman ihukkisa oo keen laqqona.

¹²Ixxuwwi gaga la'ixxitam mat mat keeninne ni gaga gudinseena te'im keenneena igginoommoyyo. Oo keen ixxuwwi gaga ixxuwwi gaginnem keentu'uuyyaa ixxuwwi gaga gaginnem akeekansitu'uuyyaa qoossitambee'i keeno.

¹³Ihukkaarem ki'nnuwwi beyyi afeebe'e Waa'i niina uwwuqax gabalanne banxoommo bagaan eehanniinsi hingaa birammoommoyyo.

¹⁴Ki'nnuwwi ni gaba'l woronne yoontakke'i bikkina Kiristoosika mishiraachchi sagara amandaa ki'nnuwwi beyyo luxxan inkaa waallummi ammane ee gabaliinsi hingaa mallummoyyo.

¹⁵Neese gabala hingaa mulli manni badarukkaannonne birammoommoyyo. Ihukkaarem ki'nnuwwi beyyonne yoo ni bax lobakata lophphoo'isina ni mixan ki'nnuwwik amma'nnat li'ukkuuyyi maroo'isinatte.

¹⁶Ee bikkina mulli manni bax gabalanne aangaa eraarem baxamu baxonne birammoombee'isa ki'nnuwwi uulliinsi hingaa mishiraachchi sagara mulli uullanne alallaantoommo.

¹⁷ Keesammi Kitaabannem «Bakke'ookkok hundim Moollannanne bakke'ona» yamamaakko.

¹⁸Mashka'oomim manchi galaxxamookkok Waa'i erane yaa galaxxukkaarette bagaan ixxi gaga gaginnem galaxxeena xanooyyo.