Read Hadiyya 2Qorontoos Asso 11 Bible Online

2Qorontoos Asso 11 - Hadiyya bible

2Qorontoos Asso 11

¹An hoffoka qawwaammoohaarem iyyaqqitakkota'n erane. Hay hanqinam iyyaqqehe!

²An ki'nnuwwa xeehanto'oo muccur baajaam landichchosa issaa Kiristoosina hincaa'eena xeehummi bikkina Waa'i to'achchoo'isa ki'nnuwwina to'achchaammo.

³ Ihukkaarem «Hantaarinne hamashshichchi Heewwaane qawwiisukkisam xabbeenoominnee muccuroominnee Kiristoosina hee'llakkambee'isa ki'nnuwwika sawwite bi'isookko» yaa baddaammo.

⁴Mashka'oomim mat manchi waaraa neese kullummi Yesuusiinsi mulleka kurulas te'im eraare aa'llakko'i ayyaaniinsi mulli ayyaana aa'llakkolas te'im eraare aa'llakko'i mishiraachchi sagariinsi mulleka aa'llakkolas cawwitakka'a uttakkamo.

⁵Ee «La'ammaammoo asse'amaano» yitam keeniinsi «An goottokkichchom hoffe'oommo» yaa sawwoommoyyo.

⁶Wocanne qoor ihumbee'aarem lachchanne ee'isayyo. Neese ki'nnuwwina hundi ammanem hundi luwwannem eekka caakkinsaa la'insaammo.

⁷Ki'nnuwwi lomba siixxitakkamisina i gaga hoffiisimminne maham miqqakkoo'nnim Waa'ika mishiraachchi sagara ki'nnuwwina kurimminne baaxiilo baxummonnihe?

⁸Ki'nnuwwina awwaadeena mulli amma'nnaaniinsi hara'mmato aa'imminne ixxuwwa hawwodaammo.

⁹ An ki'nnuwwinne maqire hee'ummi ammane eese hawwisu luwwi hee'ukkaarem ayyennem kee'mmummoyyo. Mashka'oomim Maqeedooniinsi waatto'i abbaayyuwwi iina hasisoo luwwa uwwita'a hee'llo'o. Ayyi luwwannem ki'nnuwwanne kee'mmoombee'isa ege'llaammo; ka lasagem ege'lloommo.

¹⁰Kiristoosik hanqi eesenne yoo bikkina Akaayanne hannonnem ayyim eese bakke'oombee'isa hooreena xanooyyo.

¹¹Ookki mahinatte? An ki'nnuwwa iittoombee'i bikkinattennihe? Waa'i la'oo'isam an ki'nnuwwa iittoommo.

¹²«Neese Phaawuloosaamisam banxoommuulla» yita'a birantam kee'nneka mashka'a hooreena kaba baxummuuyyi yoommi baxo ka lasagem baxoommo.

¹³Oo keen Kiristoosina asse'amaano labba'a hincitam qophpha'n asse'amaanoo huushisoo baxo baxxam keenoo.

¹⁴Sheexaanchi ixxi gaga caakki asse'amaanchi issaahim hincaa'oo bikkina ookki neese maalalsiisoohaneyyo.

¹⁵Ee bikkina Sheexaanchina awwaaddam keen Waa'ina awwaaddam keeno labbo'aare maalalsiisoohaneyyo. Ixxuwwik lasaanchi ixxuwwi baxisam ihookko.

¹⁶Ayyim eese qawwa yoobee'isa kabadem edaa kuroommo. Ayyi la'ukko qawwa yitakkolasim hofqaxichchom biramoommisina qawwi issitakka'ahim ullehe.

¹⁷An ka wocoommi luwwa biranchinne iggaa wocoommok Moollanni yukkis ihoo'n qawwi manchisa ihaatette.

¹⁸Lobakat keen ka uulli luwwanne birantam bikkina anim ixxuwwisam biramoommo.

¹⁹Ki'nnuwwi qoor keen ikkakko'isam qawwi keeno cawwitakka'a uttakkamuulla.

²⁰Mat manchi ki'nnuwwa agid issoohaare te'im bogoohaare te'im hawwodoohaare te'im gadoohaare te'im oobo'inne xabansoohaare cawwitakka'a uttakkamo.

²¹Neese eehannina hoogaan keen inkummisa tuurummuuyyim kuroommo. Ihukkaarem an qawwi manchisa wocoommo. Ayyim ihu luwwannem birameena iggulas anim eehannonne birameena iggoommo.

²²Ixxuwwi Ibro'i mannannihe? Anim Ibrokkichcho. Ixxuwwi Abrihaam shumo'onnihe? Anim Abrihaam shumo'o.

²³ Ixxuwwi Kiristoosina awwaaddam keenonnihe? Machchaaraanchisa wocoommo; ixxuwwiinsi an lophphoommo. Mashka'oomim Kiristoos bikkina lobakata badaraammo; dut ammanem karamaammo; dut ammane ganakko'ookko. Dut ammanem lehonne afaa hee'ummo.

²⁴ Sorina mat mat halangi hanqatukkuuyyi onti kore Ayihuxxi manni ganto'ookko.

²⁵ Sas ammane biccinne ganakko'ookko. Mat kore lehoommisina kininne aphphisakko'ookko. Sas kore markab iiqamaa mat ko'llaannonne mat ballaa mat hiimoo dambalaqanne hee'ummo.

²⁶ Lobakat ammane taakke'ummuuyyi daajjuwwi aqqimminne afu hawwonne, boggam keen afisso'i hawwonne, i shumo'i afisso'i hawwonne, Mulli manni afisso'i hawwonne, beero'onne afu hawwonne, udma'anne afu hawwonne, dambalaqanne afu hawwonnee qophpha'n amma'nnaan afisso'i hawwonnee hawwaammo.

²⁷Odim lobakat ammane badallatii hoongii eesenne afaakko. Lobakat ammanem diriiroo'n garaammo. Odim sibaar, xeeb, lobakat ammane itoommi luwwi bee'immi, qiidii leexa'oomii eesenne afaakko.

²⁸Mulli luwwi hundam edaa xigumbee'aare hundi ammanem eese kichche'isookkok amma'nnaa'n wixxittuwwina sawwimma.

²⁹Mat manchi hoogoohaare anim edamaa hoogoommo. Mat manchi baaxiilonne uboo'isa issakkamaare an kichche'oommo.

³⁰An birameena hasumlas biramoommok i hoonga moo'isoo luwwannette.

³¹Moollanni Yesuusina Anni Waa'i ixxim heer heerinam maasse'amaakkookkok an qophphanoombee'isa la'ookko.

³² Damaasqo'i beero'onne hee'ummi ammane Arteesa yakkam adiliinsi woroon yoo gassaanchi eese amadiiseena Damaasqo'i beero'o egessiisukko.

³³Ihukkaarem beero'o kululaa'akka'a kininne ootakko'i ooxxi maskootinne sanannanne issakka'a dilliisakko'aare ixxi angiinsi xorummo.