Read Hadiyya 2Qorontoos Asso 12 Bible Online

2Qorontoos Asso 12 - Hadiyya bible

2Qorontoos Asso 12

¹An biramimmi hasisookko. Biranchi maham awwaadoobee'an ihukkaarem Moollanni iina moo'isu kaaltaa caakkisu woshshaa kuroommo.

²Tommiinsii soor hiinchiinsii illageen mat Kiristoosa amma'nnaanchi [1] saxxi iimane massamukkisa la'oommo. Oohim maarinnetda'e te'im maarinneyda'e Waa'i la'ookko bagaan an la'oommoyyo.

³Oo manchi Gannatta massamukkisa la'oommo. Maarinnetda'e maarinneyda'e Waa'i la'ookko bagaan an la'oommoyyo.

⁴Oo manchi manni hore'em wocaa kureena xanoobee'i woshsha macceesukko.

⁵An eehido'i manchonne bakke'oommo. Ihukkaarem i gaqqi bikkinatte yakkota'n i hoongiinsi bagaan biramoommoyyo.

⁶An hanqa wocoommi bikkina bakke'eena hasumta'nnim huushamummoyyo. Ihukkaarem ayyi manchim iinniinsi macceesukkaanniinsi te'im eesenne moo'ukkaanniinsi lonsaa i bikkina sawwoobee'isina bakke'eena hasoommoyyo.

⁷Iina moo'amu lobakat kaaltanne bakke'oombee'isina i maara uttisa qasoo luwwi uwwamukko. Oohim an bakke'oombee'isa hooreena eese hawwisoo Sheexaa'n asse'amaancho.

⁸Eekka iinniinsi hooroo'isina sas kore Moollanna uunxummo.

⁹Ihukkaarem Moollanni «Iikki eroommi kiina ihookko; ki hoonginne i malaayyi lophphaa moo'amookko» yukko. Kiristoosik malaayyi eesenne ihoo'isina i hoonginne lobakata liiramummuuyyi bakke'oommo.

¹⁰An hoogoommaare qoxxoommi bikkina Kiristoos bikkina hoogoommaare, game'llakkamaare, hawwoommaare, hawwisakkamaaree u'n eesenne afoohaaree liiramoommo.

¹¹An qawwaammo. Ee'isa issitakko'ok ki'nnuwwa. An maham gadamaammoohan ihummaarem ee la'ammaammoo asse'amaano yitam keeniinsi hore'em hoffe'oombee'i bikkina ki'nnuwwi eese galaxximmi hasisam hee'ukko.

¹²Iyyaqqimminne, maalalsiisoo mare'innee malaayyaam baxinnee hundinnem hanqo'i asse'amaa'nnek mare'i ki'nnuwwi lambe'enne i kollinne issamaakko.

¹³An ki'nnuwwanne kee'mmummoyyo bagaan mulli amma'nnaanina issamoo luwwik ki'nnuwwina mah hanqatukko? Ookki huushanchi ihulas iina urimma issehe.

¹⁴An ki'nnuwwi beyyo saxxi kore waareena gudaammo. Ki'nnuwwa hasoommo bagaan ki'nnuwwika amaxxa hasoombee'i bikkina ki'nnuwwanne kee'mmeena hasoommoyyo. Mashka'oomim oosina anno'i diinate dissookko bagaan oos anno'ina dissooyyo.

¹⁵An ki'nnuwwi bikkina iina yoo luwwi hundam i fooremakkota'n higisaa uwweena lobakata liiramoommo. An ki'nnuwwa lobakata iittummuuyyi ki'nnuwwi eese hoffoka iittimmi hasisoohonnihe?

¹⁶An ki'nnuwwanne kee'mmumbee'isa laqqakku'uuyyim qooroominne ki'nnuwwa aphphisansaa itummaannisa woccakkamo.

¹⁷An ki'nnuwwi beyyo asse'ummi manni kollinne mat manchi kollinnem ki'nnuwwa hawwodummonnihe?

¹⁸Tiito'o ki'nnuwwi beyyo maroo'isina uunxaa lasage ixxenne maqirem mat amma'nnaanchi abbaayyo asse'aa hee'ummo. Tiitodu ki'nnuwwa hawwodaa hee'ukkonnihe? Anii Tiito'oo mat tiirinne banxummoyyonnihe? Anii ixxii hee'nnummis matoyyonnihe?

¹⁹Neese ni gaga gatixxineena ki'nnuwwi illagenne woncoommisa issitakka'a kabad afeebe'em sawwitakkamuullannihe? Iittantakko'oo iyyabbaayyuwwa, neese Kiristoosinne inkaa Waa'i illagenne woncoommi luwwi hundim amma'nnatonne li'llakkamisa issineenatte.

²⁰Ayyi la'ukko an ki'nnuwwi beyyo waaraa sawwummisa ikkakka'a ki'nnuwwa siidoommoyyo yaa te'im Ki'nnuwwi sawwitakko'isa ihaa eese siiddakkamoyyo yaa baddoommo. Oohim «Ayyi la'ukko ki'nnuwwi lambe'enne wocanchi, to'achchimmi, quunqi, gaga iittimmi, game'llanchi, ham, biranchii hambalaachchii hee'ookko» yaa baddoommo.

²¹Odim an waaroommi ammane i Waa'i ki'nnuwwi illagenne eese sholliisookko yaa baddaammo. Eraare baaxiilo baxxo'i kee'nnek dut keen kabadem haashaarancha, saa'immaa adabi'immaa biiraa yitobee'i bikkina ixxuwwina wi'lloommo yaa baddoommo.