Read Hadiyya 2Qorontoos Asso 13 Bible Online

2Qorontoos Asso 13 - Hadiyya bible

2Qorontoos Asso 13

¹ Ku kaba an ki'nnuwwi beyyo waaroommok saxxi kore. Keesammi Kitaabanne «Ayyi woshshim lam te'im sas naqaashinne goollamookko» yamamaa kitaabamaakko.

²Kanniinsi illageen baaxiilo baxxo'i keenoo mulli keenoo hundam la'm kore ki'nnuwwi beyyo waarummi ammane qoxxisaa kuraa hee'ummo. An ki'nnuwwi beyyo od waarumlas ee keeno kora'a uroombee'isa kaba ki'nnuwwiinsi annanni ihaa hee'ummuuyyim kuroommo.

³Ee'isinne Kiristoos i kollinne ihaa wocoo'isa qoossitakka'a laqqakkamo. Kiristoos ki'nnuwwi lambe'enne baxukkuuyyi malaayyaamo bagaan hoongaanchoyyo.

⁴Ixxi hoongaanchi ihaa saqalamukkaarem Waa'i malaayyinne hee'ookko. Neesem ixxenne maqirem hoongaan inkummaarem neese ki'nnuwwana awwaandoommi awwaadonne Kiristoosinne maqirem Waa'i malaayyinne hee'nnoommo.

⁵Amma'nnatonne yoontakkeda'e ki'nnuwwi gaga qoossaqqehe; ki'nnuwwi gaga kee'nnehe. Yesuus Kiristoos ki'nnuwwi woronne yoo'isa qoossitakkamoyyonnihe? Hanqinam eekka qoossitakkobeelas keenatonne ubbakko'ookko.

⁶Neese keenatonne umbumbee'isa laqqakkamo yaa neeyyato issoommo.

⁷Ki'nnuwwi jora issitakkambee'isina Waa'a uunxinoommo. Oo uunxinoommokim neese keenanchanne umboommoka lambummaarem ki'nnuwwi xabbeen luwwa issitakkamisinatte bagaan neese keenanchanne umboombee'an inkaa moo'ammeenayyo.

⁸Neese hanqa banxoommo bagaan hanqiinsi annanni ihaakkoo luwwa maham issinoommoyyo.

⁹Neese hoongaan inkummaarem ki'nnuwwi qoxalluwwi ikkakkam ammane liirammoommo. Neese Waa'a uunxinoommok ki'nnuwwi miiqakkam luwbeekeen ikkakkamisinatte.

¹⁰An ki'nnuwwiinsi qee'llonne hee'ummuuyyi kaka kitaabummok ki'nnuwwi beyyo waaroommi ammane i malaayye ki'nnuwwanne monginne awwaaxxoombee'isinatte. Ee malaayye Moollanni iina uwwukkok gindoommisinatte ihoo'n axisaa baxoommisinatte.

¹¹Lasaanchonne an ki'nnuwwina yoommok iyyabbaayyuwwa, xummanne hee'llehe. Hundi luwwannem miiqakkam luwbeekeen ikkehe. I sogitano macceessehe; ki'nnuwwina'i ki'nnuwwim mat tiirinne ikkehe. Iittinnem hee'llehe; iittikii xummikii Moollanni ki'nnuwwinne ihookko.

¹²Ki'nnuwwina'i ki'nnuwwim iitto moo'isoo suunqanchinne xummaatixxammehe.

¹³Waa'i minaadab hundim ki'nnuwwina xummaato asse'llo'ookko.

¹⁴Moollanni Yesuus Kiristoosik eroommi, Waa'i iittii Keesammi Ayyaa'n mateeyyoomii ki'nnuwwinne hundinnem maqire ihona.