Read Hadiyya 2Qorontoos Asso 2 Bible Online

2Qorontoos Asso 2 - Hadiyya bible

2Qorontoos Asso 2

¹Ee bikkina ki'nnuwwa kichche'iseena hasumbee'i bikkina ki'nnuwwi beyyo daba'llaa waaroombee'isa hoseena murte'aammo.

²Eese liiransitakkamok an kichche'isummi ki'nnuwwa. An ki'nnuwwa kichche'isummaa'lleensi eese ayyi liiransookko?

³An waaroommi ammane eese liiransoo keenonne kichche'oombee'isina assi kitaaba kitaabaammo. Mashka'oomim «Iikki liiranchi ki'nnuwwi hundinam liiranchi ihukkisa laqqakkamo» yaa amma'nnoommo.

⁴An kitaabummok i wodanonne yoo lobakat u'nninne, kichchechchinnee lobakat indiiddinnettee. Oohim ki'nnuwwa kichche'iseen ihoo'n an guullaa ki'nnuwwa iittoommisa laqqakkamisinatte.

⁵Manna kichche'isu manchi hee'uta'n kichche'isukkok xale'i eeseyyo. Woshsha baasisimmi ihoone bagaan hunda kichche'isubee'aarem ki'nnuwwiinsi duta kichche'isaakko.

⁶Eehido'i mancho ki'nnuwwik lophphitakkam qaxim guzumo'issakko'i guzumo'i ihaakko.

⁷Oo manchi kaba lobakat kichchechchinne neeyyata muroobee'isa ki'nnuwwi ixxena haafimmii ixxom qoxxisimmii hasisookko.

⁸Ixxo iittitakkamisa moo'issakkamisina an ki'nnuwwa uunxoommo.

⁹An ki'nnuwwina kitaabummok hundi luwwannem ki'nnuwwi ijaajantakkamisaa ijaajantakkambee'isaa keenaa la'eenatte.

¹⁰Ki'nnuwwi haafitakko'aannina ayyenam anim haafaammo. Ihu luwwam an haafaammoohaare haafummok Kiristoos illagenne ki'nnuwwi bikkinatte.

¹¹Oohim Sheexaanchi neesenne issoo hantaaro guullinaa lanqoommi bikkina ixxena beyyo uwwinoombee'isinatte.

¹² An Kiristoosika mishiraachchi sagara kureena Xiiroo'aada waarummi ammane Moollanni iina googo fooqaa'aa hee'ukko.

¹³Ihukkaarem an iyyabbaayyi Tiito'o ee beyyonne siidumbee'i bikkina iikki tiir usheexxukkoyyo. Ee bikkina «Xumma hee'llehe» yaa Maqeedoona marummo.

¹⁴Kiristoosinne neese hundi ammanem kaachchinne awwonsukkuuyyi enjisa enje'oo Kiristoos bikkina la'imma beyyi hundannem niinninne afisoo Waa'ina galat afona.

¹⁵Mashka'oomim gatoo keeninaa bi'oo keeninaa Kiristoosinne danaam enjisa inkaa Waa'ina hincinaammo.

¹⁶Bi'oo keenina bichchi enja; gatoo keeninam heechcha uwwoo enja. Eehannata'i ka baxina labookkok ayyette?

¹⁷Neese lobakat kee'nnisa Waa'i sagaranne hamaallaa daddalloommi keenoyyo. Ihukkaarem Waa'i asse'ukkaare Kiristoosan inkaa Waa'i illagenne hanqa woncoommo.