Read Hadiyya 2Qorontoos Asso 3 Bible Online

2Qorontoos Asso 3 - Hadiyya bible

2Qorontoos Asso 3

¹Odim neese ni gaga galaxximma asheellonnihe? Te'im mat mat keen issitamisa neese ayyetda'e inkummisa la'isoo assi kitaaba ki'nnuwwina te'im ki'nnuwwiinsi hansoommonnihe?

²Manni hundim la'oo'isinaa qananaa'oo'isinaa ki'nnuwwi gagim neese la'issakkeena ni wodanonne kitaabantakko'oo keeno.

³ Ki'nnuwwim Kiristoos neesenne asse'u assi kitaab ikkakko'isa moo'issakkamuulla. Kitaabamukkokim hee'oo Waa'i Keesammi Ayyaaninnette bagaan qalaminneyyo. Odim kinannette ihoo'n manni wodanonnette.

⁴Neese eehid yinoommok Yesuus Kiristoosinne Waa'anne amma'nninoommi bikkinatte.

⁵Neese «Ni malaayyinne issinoommo» yinoommi luwwi ma'lluchchim bee'e. Niina malaayyi waarookkok neese haareechchi hidirina awwaandoommi keen issu Waa'iinsette. Oo hidirim kitaabamu See'llan ihoo'n Keesammi Ayyaa'nnane. Mashka'oomim kitaabamu Seer shookko; ihukkaarem Keesammi Ayyaan heechcha uwwookko.

⁷ Kinanne fidalinne Seer kitaabamaa uwwamu ammane Waa'ik lombi moo'amaa hee'ukko. Muse'i miinenne belecce'am hee'u caakki limmukkuuyyi maroohan ihukkaarem Isra'ee'l minaadab moo'lleena xanto'oyyo. Ee leho eeboo Seerina eehaa'n lombi hee'ukkaa'lleensi

⁸Keesammi Ayyaa'nnek awwaad lophphoo lombi yoohaneyyonnihe?

⁹Oogato'o eeboohaannik awwaad eehaa'n lombi yoohan ihukkaa'lleensi muccurooma eeboohaanni awwaadik lombi eehanniinsi lobakata lophphookko.

¹⁰Kaba lasaqqaannik lombi lophphu bikkina eraa'llaannik lombi od bee'e.

¹¹Oo bi'ukkok lombinne uwwamukkaa'lleensi ka bi'oobee'aannina lobakat lombi yoohane.

¹²Niina eehido'i neeyyat yoo bikkina iggimminne woncoommo.

¹³ Neese ee limmukkuuyyi maroo belecce'am hee'u caakka Isra'ee'l minaadab moo'llambee'isa eddechchinne ille ifiixxu Muse'isayyo.

¹⁴Isra'ee'l minaadab kabad afeebe'em ee eraa'l hidiro qananaa'llam ammane ixxuwwik wodan duudu bikkina oo ifiishshaanchi fooqooyyo. Mashka'oomim oo ifiishshaanchi fooqookkok xale'i Kiristoosinnette.

¹⁵Kaballi afeebe'em ee Muse'i Seera qananaa'akkam ammane ixxuwwi wodanonne oo ifiishshaanchi ifiisamaakko.

¹⁶ Ihukkaarem mat manchi Moollanni kollonne daba'lloo ammane oo ifiishshaanchi fooqookko.

¹⁷Moollanni ixxi gagim Keesammi Ayyaana. Moollannik Keesammi Ayyaan yoo beyyonne wolabban yookko.

¹⁸Niihaannonne ifiisamubee'i illenne Moollannik lombi neesenne hundannem moo'amookko. Neesem ixxi hagaranne lombiinsi lombanne daba'llammoommo. Oohim waarookkok Keesammi Ayyaan ihu Moollanniinsette.