Read Hadiyya 2Qorontoos Asso 4 Bible Online

2Qorontoos Asso 4 - Hadiyya bible

2Qorontoos Asso 4

¹Ka awwaado Waa'i ixxi eroomminne niina uwwu bikkina baddinoommoyyo.

²Maaxaqqanne baxakkam tuussiisoo luwwa sambaammo. Hantaarom issinoommoyyo. Waa'i sagaram qophphaninne hamaalloommoyyo. Ihukkaarem hanqo'i caakki woshsha woncummuuyyi ni gaga manni hundinam Waa'i illagenne moo'insoommo.

³Neese kulloommi mishiraachchi sagar daphphulas daphphukkok xale'i bi'oo keeninatte.

⁴Ee kee'nneka tiiro ka uullina Waa'i ihaakko Sheexaanchi tuunsiisu bikkina amma'nnito'oyyo. Waa'i kobi'l ihu lombi yoo Kiristoosika mishiraachchi saga'l caakkam moo'llambee'isa hooraakko.

⁵Neese Yesuus bikkina awwaadaan inkummisaa Yesuus Kiristoos Moollanni ihukkisaa ki'nnuwwina kulloommuulla bagaan ni gaqqi bikkina kulloommoyyo.

⁶ «Tuunsonne caakki caakkona» yukkok Waa'a. Kiristoos miinenne caakku Waa'i lomba lanqoommisina ni wodanonne caakka caakkisookkokim Waa'a.

⁷Hundiinsim lophphoo malaayyi Waa'ane bagaan niihan ihubee'isa moo'iseena neesenne ka buchchi mu'utanne lombi yoo lachchi yookko.

⁸Kolli hundinnem hawwinoommo; ihukkaarem bi'nnoommoyyo. Mal bi'ookko; ihukkaarem koo'llinoommoyyo.

⁹Hawwisakkamo; ihukkaarem uunjammoommoyyo. Aphphisammaa umboommo; ihukkaarem bi'nnoommoyyo.

¹⁰Yesuusik heechchi ni orachchonne la'amoo'isina ixxeka leho ni orachchonne hundi ammanem iyyinoommo.

¹¹Niihaannonne bi'oo maaranne Yesuusik heechchi la'amoo'isina foorinne yoommine'i qax ammanenne Yesuus bikkina hundi ammanem lehina ni gaga higinsaa uwwinoommo.

¹²Ee bikkina neese leh woronne hee'nnummaarem ki'nnuwwi heechcha siixxitakko'ookko.

¹³Keesammi Kitaabanne «An amma'nnummi bikkina wocoommo» yamamaa kitaabamukkisam amma'nnaxxi ayyaan neesennem yoo bikkina amma'nninaa woncoommo.

¹⁴Odim Moollanni Yesuusa lehiinsi ki'isu Waa'i neesem Yesuusinne maqirem lehiinsi ki'isaa ki'nnuwwinnem ixxi beyyo massoo'isa lanqaammo.

¹⁵Oo hundim ki'nnuwwi bikkinatte. Oohim Waa'ik eroommi lobakat mannina exxaa uwwamoo ammane lombi yoo Waa'a lobakata galaxxitamisinatte.

¹⁶Ee bikkina neeyyato mulloommoyyo; niikki ha'n orachchi hoogukkaarem woro'l mannoom ballina ballina haareechchookko.

¹⁷Ku ammanoomina neesenne afoo hoffi hawwi keenakkeena xanakkambee'i heer heerina hee'oo lomba niina gudisoolla.

¹⁸Moo'amoo luwwi ammaninatte. Ihukkaarem moo'amoobee'i luwwi heer heerinam hee'oohan ihu bikkina neese moo'amoobee'i luwwa hansoommo bagaan moo'amoo luwwa hansoommoyyo.