Read Hadiyya 2Qorontoos Asso 5 Bible Online

2Qorontoos Asso 5 - Hadiyya bible

2Qorontoos Asso 5

¹Neese hee'nnoommi ka uulli dukkaan gindamuta'n manni anginnette ihoo'n Waa'i baxaakkoo heer heerina hee'oo min iimanenne niina yoo'isa lanqoommo.

²Hanqinam neese kaba keyye hee'nnummuuyyi iima'n ni minenne hee'nneena qulunxummuuyyi qitinnoommuulla.

³Ee iima'nneka edde'nnoommi ammane leexa'i inkaa siidammoommoyyo.

⁴Hofqax ammanina ka uulli dukkaananne hee'nnummuuyyi kichchechchinne u'nnammoommuullak ka maariinsi annanni ihimminnette ihoo'n lehoo orachchi heechchanne aagoo'isina haareechchi orachcho edde'immina minxoommuulla.

⁵Eehannina neese gudisukkok Waa'a. Keesammi Ayyaanam niina lubbat issaa uwwaakko.

⁶Ee bikkina neese hundi ammanem iggimminne hee'nnoommo. Neese maarinne hee'nnummuuyyi Moollanniinsi qee'llinummisa lanqoommo.

⁷Mashka'oomim hee'nnoommok amma'nnatinnette bagaan moo'imminneyyo.

⁸Niina lobakat iggimmi yoo bikkina ka maariinsi annanni inkaa iima'n minenne Moollanninne mat inkeena minxoommo.

⁹Ee bikkina neese maarinne hee'nnummom hee'nnummoyyom ni sawwit Waa'a liiransimma.

¹⁰ Neese hundim eroka te'im jora ni maarinne banxummi baxisa a'llineena Kiristoos illagenne oogato'ina annannichchim uullimmi hasisookko.

¹¹Waa'a baddimmi mada'e ihukkisa lanqoommi bikkina manni amma'nnoo'isa issinaa kulloommo. Neese ayyetda'e inkummisa Waa'i la'ookko. Odim ki'nnuwwi tiirim la'ookko yaa sawwoommo.

¹²Oohim neese ni gaga ki'nnuwwina la'ixxineena hansaammateyyo. Ihukkaarem mat mat keen ixxuwwi wodanonne yoo luwwinnette ihoo'n moo'amoo lombanne bakke'llam bikkina ixxuwwina dabattakkeena xantakkamisina neesenne bakke'llakkona mashka'a gudinseenatte.

¹³Neese machchaallummaare Waa'i bikkinatte. Fayya'i inkummaarem ki'nnuwwi bikkinatte.

¹⁴Mat manchi manni hundi bikkem lehukkaare manni hundim lehaakko yinaa amma'nninummi bikkina Kiristoosik iitti neese giddisoolla.

¹⁵Kiristoos hundi bikkem lehukkok foorinne yo'i keen ixxuwwi gagina hee'immi ihoo'n ixxuwwi bikkina lehaa ki'u Kiristoosina hee'llamisinatte.

¹⁶Ee bikkina kaballiinsi ki'insaa ayyi manchom manni sawwixxisa moo'nnoommoyyo. Kiristoosam eraare manni sawwixxisinne moo'nnaammoohaarem ka lasage ee'isinne moo'nnoommoyyo.

¹⁷Ee bikkina ayyi manchim Kiristoosan ihulas oo manchi haareechchi qooccancha; moosir mannoom higaakko. Oono'o! Haareechchi mannoom waaraakko.

¹⁸Ee luwwi hundam Waa'i issukkok Kiristoosinne ihaa neese ixxi gaginne iittansaa niinam iittansimmi awwaado uwwaakko.

¹⁹Kiristoosinne ihaa Waa'i mannika baaxiilo xigoobee'isa haafaa manna ixxi gaginne iittansoolla. Ee iittansimmika asso niina uwwaakko.

²⁰Ee bikkina Waa'i niinninne ihaa manna weeshoo'isina Kiristoos bikkenne asse'ammaammo keeno. Kiristoos bikkenne inkaa Waa'inne iittammehe yinaa ki'nnuwwa uunxinoommo.

²¹Mashka'oomim neese Kiristoosinne Waa'ina mucculluwwi inkoommisina baaxiil bee'i Kiristoosa ni bikkina Waa'i baaxiilaanchi issaakko.