Read Hadiyya 2Qorontoos Asso 6 Bible Online

2Qorontoos Asso 6 - Hadiyya bible

2Qorontoos Asso 6

¹8Waa'iinsi aa'llakko'i eroommi huunshan ihoobee'isa neese Waa'inne maqire banxoommi keen ki'nnuwwa uunxinoommuulla.

² Waa'im «Ki'nnuwwika woshsha macceesimmi hasisoo ammanenne macceesummo. Gatimmi hasisoo ballannem ki'nnuwwina hara'mmummo» yaakko. Oono'o, macceesimmi hasisoo ammanii gatimmi hasisoo ballii kabadette.

³Ni awwaadonne miiqakkam luwwi hee'ona hansoombee'i bikkina ayyem qoloo luwwa issineena hansoommoyyo.

⁴Ihukkaarem hawwo, u'nnaa kichchechchaa iyyaqqimminne Waa'ina awwaandoommi keen inkummisa hundi kollinnem moo'insoommo.

⁵ Odim ganakku'uuyyi, karammummuuyyi, manni neesenne ki'ukkuuyyi, badallummuuyyi, diriiro hoongummuuyyii sibaallummuuyyii

⁶ee'isam muccuroominne, lachchinne, iyyaqqimminne, maashaalloominne, Keesammi Ayyaaninne, hanqo'i iittinne,

⁷hanqo'i woshsha kurimminnee Waa'i malaayyinnee awwaandoommi keen inkummisa moo'insoommo. Neese o'l mu'uxxisa awwaaxxinoommi muccuroom niihaannonne makkannee qeddannee yookko.

⁸Lombinne te'im sholle'imminne er sadinne te'im jor sadinne Waa'ina awwaadaan inkummisa moo'insoommo. Neese hanqo'i manni inkaa hee'nnummuuyyim huushisaan inkaa xigammummo.

⁹Erisa la'ammaammoo keen inkaa hee'nnummuuyyim la'ammumbee'aannisa xigammummo. Leto'oo keeno yamammummaarem neese fooraammuwwa. Neese aphphisakko'ookko; ihukkaarem lenummoyyo.

¹⁰Kichche'aan inkummaarem hundi ammanem liirammoommi keeno. Bux inkummaarem dut keeno goddaan issinoommo. Ma'lluchchim bee'i keen inkummaarem hundi luchchim niihane.

¹¹Qorontoosanne yoontakke'i manna, caakkinsaa woncoommo. Niikki wodan ki'nnuwwina haraara.

¹²Ki'nnuwwika wodano niina xuqqissakko'o bagaan neese ki'nnuwwina xuqqinsummoyyo.

¹³An ki'nnuwwa i oosisa issaa wocoommo, ni wodano ki'nnuwwina fooqaa'nnummisam ki'nnuwwim niina fooqaa'llehe.

¹⁴Amma'nnubee'i manninne laboobee'isinne mat ikkakkotte. Muccuroominaa boqqoominaa mah mateeyyoom yookko? Te'im caakkinaa tuunsinaa mah mateeyyoom yookko?

¹⁵Kiristoosinaa Sheexaanchinaa mah mateeyyoom yookko? Te'im amma'nnu manchinaa amma'nnubee'i manchinaa mah mateeyyoom yookko?

¹⁶ Keesammi Mininaa qophpha'n waa'uwwinaa mah mateeyyoom yookko? Neese hee'oo Waa'ina mine. Waa'im «An ixxuwwi woronne hee'oommo. Ixxuwwi woronnem garoommo. Ixxuwwinam Waa'i ihoommo. Ixxuwwim i minaadab ikkamo» yaakko.

¹⁷ Ee bikkina Waa'i «Ixxuwwiinsi annanni ikkakka'a fillehe. Haashaassoo luwwam nakkitakkotte. Anim ee ammane ki'nnuwwa aa'oommo.

¹⁸ Ki'nnuwwinam anni ihoommo. Ki'nnuwwim iina oos ikkakkamo» yaakko.