Read Hadiyya 2Qorontoos Asso 7 Bible Online

2Qorontoos Asso 7 - Hadiyya bible

2Qorontoos Asso 7

¹Iittantakko'oo iyyabbaayyuwwa, niina oo neeyyat yoo bikkina niikka maaraa fooree haashaassoo luwwi hundiinsim ni gaga muccussinona. Waa'a baddimminnem guullinaa keesammaammoo keen inkona.

²Ki'nnuwwika wodano niina fooqaa'llehe. Neese ayyem hawwondummoyyo. Ayyim bi'oo'isa issinummoyyo. Ayyeensim qawwiinsaa aa'nnummoyyo.

³An eekka yummok ki'nnuwwa acceeqaseenayyo. Neese lehonnettem ihukko heechchanne ki'nnuwwinne maqire inkoommisina ni wodanonne yoontakke'isa kanniinsi illageenim kuraammo.

⁴An ki'nnuwwa lobakata amma'nnoommo, ki'nnuwwannem lobakata bakke'oommo. Iikki tiir lobakata qoxxaakko. Neesenne lobakat hawwi afukkaarem iikki liiranchi gabalbee'ane.

⁵ Neese Maqeedoona amfummi ammane biirinne qasanchi worinnem baachchi hee'u bikkina hundi kollinnem hawwinaa usheexxato hoongummo.

⁶Ihukkaarem kichche'u keeno qoxxisoo Waa'i Tiito'o waarimminne neese qoxxisukko.

⁷Neese qoxxisukkok xale'i ixxi waarimmi ihoo'n ki'nnuwwi ixxo qoxxissakko'isa macceesimma. Odim ki'nnuwwi eese moo'llakkeena quluxxakkamisa, eese hawwoddakko'i bikkinam kichche'llakkamisaa i bikkina to'achchitakkamisaa niina kurukkaare an lobakata liiramaammo.

⁸An ki'nnuwwina kitaabummi assi kitaab ki'nnuwwa kichche'isaakkoohaarem an gaabboommoyyo. Gaabbaammoohaarem gaabbummok oo assi kitaab ki'nnuwwa hofqax ammanina kichche'isukkisa moo'aatette.

⁹An liiramoommok ki'nnuwwi kichche'llakko'i bikkinatte ihoo'n kichche'llakko'oka baaxiilo biiraa yitakkeenatte ihu bikkinatte. Eehido'i kichchechchi Waa'i hasoo kichchechchi ihu bikkina neese ki'nnuwwa maham hawwondummoyyo.

¹⁰Mashka'oomim Waa'i hasoo kichchechchi baaxiilo biiraa yakkamisa issaa gatimmi kollonne woroohane. Ee lasage od gaabbimmi hee'ooyyo. Ihukkaarem ka uulli heechchina kichche'immi leho eebookko.

¹¹Waa'i hasoo kichchechchi ki'nnuwwi gaga qoxxisimma, jora issitakkobee'isa moo'isimma, gaabbimma, Waa'a baddimma, eese moo'llakkeena quluximma, er luwwina to'achchimmaa jora baxu mancho guzumo'isimmaa ki'nnuwwi woronne eebukkisa moo'llehe. Ki'nnuwwi hundi luwwannem mucculluwwi ikkakko'isa moo'issakko'ookko.

¹²Ee bikkina an ee assi kitaaba kitaabummok hawwodukkaanninayyo; te'im hawwodamukkaanninayyo. Ihukkaarem ki'nnuwwi ni bikkina to'achchitakkam er to'achchi Waa'i illagenne ki'nnuwwina caakkoo'isinatte.

¹³Ee bikkina neese qoxxinaammo. Eehanniinsim lophphaa Tiito'ok tiir ki'nnuwwanne usheexxu bikkina ixxi liiranchinne neesem lobakata liirammaammo.

¹⁴An ki'nnuwwanne bakke'ummisa Tiito'ona kuraa hee'ummi bikkina ki'nnuwwim eese tuussiissakko'oyyo. Ki'nnuwwina neese kullummi woshshi hundim kullummisam ihaa siidamukkisam Tiito'i illagenne ki'nnuwwanne bakke'nnummi woshshi hanqi ihaakko.

¹⁵Ki'nnuwwika hundikam ijaajanchaa baddimminnee huxechchinnee ixxo aa'llakko'isaa sawwoo ammane ixxek ki'nnuwwina yoo iitti lobakata kee'mmaalla.

¹⁶Anim ki'nnuwwa lobakata amma'nnoommi bikkina liiramaammo.