Read Hadiyya 2Qorontoos Asso 8 Bible Online

2Qorontoos Asso 8 - Hadiyya bible

2Qorontoos Asso 8

¹ Niyyabbaayyuwwa, Maqeedoonanne yo'i amma'nnaanina Waa'iinsi uwwamu eroommi bikkina laqqakkona hansoommo.

²Kee'mmaalli hawwii keenanchii ixxuwwanne afukkaarem jor buxoomanne hee'llo'aarem guullita'a liiranta'a lobakat biijoominne uwwito'o.

³Ixxuwwi malaayqax xale'i ihoo'n ixxuwwi malaayyiinsi hanaan ihaakkookkoka iittita'a uwwito'isa an kuroommo.

⁴Amma'nnaano hara'mmakkam hara'mmatiinsi annanni ikkambee'isinam neese qoxxissa'a uunxito'o.

⁵Oohim neese egellummis ihoo'n Waa'i yukkisinne ixxuwwi gaga gaassita'a Moollanninaa niinaa uwwito'o.

⁶Ee'isam Tiito'o kanniinsi illageen amadukkisinnem ee er baxo ki'nnuwwi beyyonne guulloo'isina uunxinaammo.

⁷Amma'nnatonnettem ihukko, wocannettem ihukko, lachchannettem ihukko, Waa'i baxina qoxximmannettem ihukko, neese iittimmannettem ihukko, hundi luchchonnem ki'nnuwwi illag ikkakko'ookko. Kabadem ka eroommi baxonnem illag ikkehe.

⁸An kaka yummok ki'nnuwwik iitti hanqo'an ihukkisa mulli kee'n er baxinne keenaa moo'eenatte bagaan ijaajeenayyo.

⁹Ni Moollanni Yesuus Kiristoosika eroomma ki'nnuwwim laqqakkamo. Ixxi buxoominne ki'nnuwwi goddaan ikkakkamisina goddaanchi ihaa hee'ukkuuyyim ki'nnuwwi bikkina buxichchi ihukko.

¹⁰Ka woshshanne an ki'nnuwwa sogoommo. Issimmi xale'em ihoo'n mat hiinchiinsi illageenim gaassitakka'a sawwitakko'i woshsha kaba issitakko'aare danaamo.

¹¹Ee bikkina ki'nnuwwi uwwitakkeena guddakko'i sawwit baxinne moo'amoo'isina ki'nnuwwi malaayqaxa uwwehe.

¹²Uwwitakkeenamdu sawwitakkolas mat manchina beelluwwi ihoo'n annichchi malaayqaxa Waa'i aa'ookko.

¹³An eehid yummok ki'nnuwwi hundim guddakkamisinatte bagaan mulli keenina sholle'aa ki'nnuwwanne kee'mmoo'isinayyo.

¹⁴Ki'nnuwwina bee'u luwwa ixxuwwina lobakata yoohaanniinsi uwwitamisina kaba ki'nnuwwina lobakata yoohaanniinsi ixxuwwina bee'u luwwa uwwitakkamisinatte. Ee'isinne hundim gudaan ikkakkamo.

¹⁵ Keesammi Kitaabannem «Lobakata wixxaa'ukkaannikim gatukkoyyo. Gootto'o wixxaa'ukkaannikim hanqatukkoyyo» yamamaa kitaabamaakko.

¹⁶An ki'nnuwwina lobakata sawwoommisam Tiito'om ki'nnuwwina sawwoo'isa issu Waa'ina galat afona.

¹⁷Ixxi tiirinnem sawwaa lobakat liiranchinne ki'nnuwwi beyyo waaroolla bagaan waaroollak xale'i neese xa'mminummi bikkinayyo.

¹⁸Amma'nnaa'n lambe'enne hundannem mishiraachchi sagara kurimminne la'amaakkoo mat abbaayyom Tiito'onne maqirem asse'nnoommuulla.

¹⁹Xale'i eeqaxam ihoo'n neese banxummuuyyi yoommine'i biijoo'm baxina niinninne maqirem taakke'oo'isinam amma'nnaan doo'llaakko. Oo biijoo'm baxim Moollanni lombaa ni eroommi baxoo moo'isoo'isinatte.

²⁰Kaba biijoominne uwwitakko'aare wixxaa'imma asheellummi diinaxxi bikkina ayyim acceeqasoobee'isa ni gaga ege'llinoommo.

²¹ Neese xale'i Waa'i illagennette ihoo'n manni illagennem er baxo banxeena sawwinaammo.

²²Lobakat ammane dut luwwanne hanqo'an ihukkisa keennaa lanqaa niyyabbaayyoom ixxuwwinne maqirem asse'nnoommuulla. Ixxi ki'nnuwwa lobakata amma'nnoo bikkina ka illagee'nnaanniinsim lonsaa hara'mmeena hasoolla.

²³Tiito'i bikkina laqqakkeena hassakkolas ixxi i beshichcho. Iinninne maqire ki'nnuwwina baxoohane. Niyyabbaayyuwwi bikkinam laqqakkeena hassakkolas amma'nnaaniinsi asse'anta'a Kiristoosika lomba la'issam keeno.

²⁴Ee bikkina ki'nnuwwika iittoo neese ki'nnuwwanne bakke'nnoommi bakkechchaa amma'nnaa'n illagenne ka mannina moo'issehe.