Read Hadiyya 2Qorontoos Asso 9 Bible Online

2Qorontoos Asso 9 - Hadiyya bible

2Qorontoos Asso 9

¹Amma'nnaanina uwwakkam tasbo'i bikkina an ki'nnuwwina kitaabimmi hasisookkoka labisoommoyyo.

²Mashka'oomim guddakko'isa la'oommo. «Akaayanne yo'i manni ludmaaragiinsim ki'issa'a guddo'ookko» yaa Maqeedoonanne yo'i manninam ki'nnuwwanne bakke'imminne kuraammo. Ki'nnuwwa moo'imminne ixxuwwik lobakat keen baqito'ookko.

³Kaba kannonnem an ki'nnuwwi bikkina bakke'ummi bakkechchi kora'atte ihoobee'isa an yummisanne guddakka'a siidantakkamisina ka niyyabbaayyuwwa ki'nnuwwi beyyo asse'oommuulla.

⁴Oohim ayyi la'ukko Maqeedoo'n uulli mannik mat mat keen iinninne maqire ki'nnuwwi beyyo waatta'a guddakkoo'n yoontakke'eka moo'lla'a ki'nnuwwanne lobakata amma'nninummi bikkina neese qannaxammoombee'isinattee ki'nnuwwim tuuttakkambee'isinattee.

⁵Ee bikkina an waareena illageenim ki'nnuwwi beyyo niyyabbaayyuwwi matta'a aaggakko'i neeyyaxxi luwwa gudisiissona asse'immi hasisoohan ihukkisa sawwummo. Oohim giddinnette ihoo'n iittinne uwwitakkam luwwi ihoo'isinatte.

⁶«Hoffoka wixukkok hoffokam aagisookko. Lobakata wixukkok lobakatam aagisookko» yukkoka sawwi'llehe.

⁷Liiramaa uwwoo mancho Waa'i iittoo bikkina annannichchim ixxi wodanonne sawwukkisa uwwona bagaan liiramoo'n te'im manni giddisu bikkina ayyim uwwoone.

⁸Ki'nnuwwina hundi luwwim hundi ammanem wo'mmaa hee'oo'isinaa er bax hundinam erisa uwwitakkamisinaa Waa'im er luwwi hundam ki'nnuwwina wonshaa uwweena xanoohane.

⁹ Keesammi Kitaabannem «Waa'i buxina fuqaa'oohane. Ixxek biijoomim heer heerinam hee'oohane» yamamaa kitaabamaakko.

¹⁰ Wixoo mannina sire'e, ichchinam hurbaata uwwoo Waa'i ki'nnuwwinam lobakat amaxxa uwwookko. Ki'nnuwwika muccuroo'm baxom maasse'ookko.

¹¹Ki'nnuwwi hundi kollinnem tasbo'o uwwitakkeena biijaalluwwi ikkakkamisina Waa'i maasse'ookko. Ee tasbo'om manni ni kollinne a'lloo ammane Waa'a galaxxookko.

¹²Eehido'i awwaado awwaadimmi amma'nnaanina hasisoo luwwa uwwimmi xale'i ihoo'n lophphaakkoo galatam Waa'ina uwwisiisoohane.

¹³Kiristoosika mishiraachchi sagara aa'llakka'a ijaajantakkam ijaajanchinne ixxuwwinaa mulli keeninaa liirantakka'a uwwitakkam luwwinne ki'nnuwwi awwaaddakkam awwaado manni moo'aa Waa'a galaxxoo'isa issitakkamo.

¹⁴Ixxuwwi Waa'i ki'nnuwwina uwwu lophphaakkoo eroommi bikkina ki'nnuwwa moo'lleena quluxxamuullaa Waa'a uunxitamuullaa.

¹⁵Kurakkeena xanakkambee'i uwwancha uwwu Waa'ina galat afona.