Read Hadiyya Galatiy Asso 1 Bible Online

Galatiy Asso 1 - Hadiyya bible

Galatiy Asso 1

¹Manni doo'llinnette te'im mat manchi kollinnette ihoo'n Yesuus Kiristoosinnee ixxom lehiinsi ki'isu Anni Waa'innee asse'amaanchi ihaa asse'amummi iinniinsi Phaawuloosiinsii

²iinninne maqire yo'i amma'nnaan hundiinsimii Galatiy uullanne hee'llakkam amma'nnaa'n wixxittuwwina.

³Niyyanni Waa'iinsii Moollanni Yesuus Kiristoosiinsii eroommii xummii ki'nnuwwina ihona.

⁴Ka jor doolliinsi Yesuus Kiristoos neese gatiseena Niyyanni Waa'i doo'llinne ni baaxii'l bikkina ixxi gaga higisaa uwwukko.

⁵Ee Waa'ina lombi heer heerinam ihona! Aameen.

⁶Kiristoos issu eroomminne weeshu Waa'iinsi kaqaxichchonnem annanni ikkakko'isii mulli mishiraachchi sagaranne daba'llitakko'isii eese lobakata maalalsiisaakko.

⁷An eehid yummok Kiristoosika mishiraachchi sagara boqqanne tittu'uuyyi ki'nnuwwa hawwissam keen yo'i bikkinatte bagaan mishiraachchi saga'lleka'i lugumoom matichchome.

⁸Ihona bagaan neese ki'nnuwwina kullummi mishiraachchi sagariinsi mulleka neesettem inkummo te'im iimaniinsi waaroo Waa'i asse'amaanim kurulas duumamaakkoohan ihona.

⁹Kanniinsi illageen ki'nnuwwina kullummisam kabadem edaa kuroommok neese kullummaare aa'llakko'i mishiraachchi sagariinsi mulleka losisookkok ayyim duumamaakkoohan ihona.

¹⁰An hasoommok eese manni galaxxoo'isinattennii Waa'i galaxxoo'isinatte? Te'im manna liiranseenattennii Waa'a liiranseenatte? Manna liiranseena hasoomman ihuta'n Kiristoosina awwaadaanchi iheena xanam hee'ummoyyo.

¹¹Iyyabbaayyuwwa, an ki'nnuwwina kurummi mishiraachchi sagar manniinsi waarubee'an ihukkisa laqqakkona hasoommo.

¹²Mashka'oomim kaaltinne Yesuus Kiristoos iina la'isukko bagaan an ayyi manchiinsim aa'ummoyyo. Te'im ayyi manchim eese losisukkoyyo.

¹³ Ayihuxxi manni amma'nnatonne gaassi hee'ummi ammane hinkido'i heechcha hee'umda'e ki'nnuwwi macceessakko'ookko. Yesuusanne amma'nnito'i Waa'i minaadaba bi'iseena lobakat monginne hawwisam hee'ummo.

¹⁴ Ayihuxxi mannika amma'nnato egerimmannem lobakat i daraphphi manniinsi lophphoommane hee'ummo. Odim niyyanno'i losa'n bikkinam lobakata to'achchoommane hee'ummo.

¹⁵ Ihukkaarem iyyummi godabonne hee'ummuuyyim doo'llaa annanni issu Waa'i ixxi eroomminne eese weeshukko.

¹⁶Mulli minaadabina mishiraachchi sagara kuroommisina ixxi Beeto iina la'iseena iittu ammane ayyi manchinnem a'llamummoyyo.

¹⁷Te'im iinniinsi illageen Yesuusina asse'amaan hee'llo'i keeninne atoorareena Yerusaaleema marummoyyo. Ihukkaarem an gaassaa Araphphi uulla maraa ee beyyiinsim daba'llaa Damaasqo'i beero'o marummo.

¹⁸Odim sas hiinchiinsi lasage Keefa yakkam Pheexiroosinne edameena Yerusaaleema maraa ixxi beyyonne tommoo onti ballaa afuurummo.

¹⁹Ee beyyonne afuurummi ammanem Moollannina abbaayyi Yaaqoobiinsi bagaan asse'amaa'nneka matom moo'ummoyyo.

²⁰Ku ki'nnuwwina kitaabummok qophphan ihubee'isa Waa'i illagenne hide'oommo.

²¹Ee lasage Sooriyaa Kilqe'e yakkam uullaa marummo.

²²Yihuxxi uullanne hee'llam Kiristoosanne amma'nnito'i keen oo amman afeebe'em eese moo'llo'oyyo.

²³Ixxuwwim i bikkina macceessa'a hee'llo'ok «Oo amma'nnaano hawwisam hee'u manchi ee bi'iseena yakam hee'u amma'nnato ixxi gagim kaba mannina alallaatoolla» yoo woshshi hee'ukko.

²⁴I mashka'innem Waa'a lonsitam hee'llo'o.