Read Hadiyya Galatiy Asso 3 Bible Online

Galatiy Asso 3 - Hadiyya bible

Galatiy Asso 3

¹Galatiy uullanne hee'llakkam qoossitakkambee'i amma'nnaano, Yesuus Kiristoos saqalamaa lehukkis ki'nnuwwina mare'i ihaa hee'ukkuuyyim gennakko'i manchisa ki'nnuwwa jallaa'ukkok ayyette?

²An ki'nnuwwa mat luwwa xa'mmoommo. Keesammi Ayyaana aa'llakko'ok Seera egerimminnettennii mishiraachchi sagara macceessakka'a amma'nnimminnette?

³Ki'nnuwwi kaa'nnam qoossitakkambee'i keenonnihe? Ayyaaninne asheettakka'a maarinne guullitakkamonnihe?

⁴Ki'nnuwwi ka luwwi hundam badattakko'ok kora'attemennihe? Hanqinam ee'isa ihookko yoommoyyo.

⁵Keesammi Ayyaana Waa'i ki'nnuwwina uwwukkokii maalalsiisoo aganna ki'nnuwwi lambe'enne baxukkokii Seera egettakko'i bikkinattennii mishiraachchi sagara macceessakka'a amma'nnitakko'i bikkinatte?

⁶ Huno'o, Abrihaama sawwi'llehe; Keesammi Kitaabanne «Abrihaam Waa'anne amma'nnukko. Amma'nnu bikkinam muccur ihaa xigamukko» yamamaa kitaabamaakko.

⁷ Ee bikkina hanqo'i Abrihaam shumo'o yamantam keen amma'nnitam keen ikko'isa laqqehe.

⁸ Mulli minaadaba amma'nnatinne Waa'i muccussoo'isa Keesammi Kitaab gaassaatim «Minaadab hundim kiinninne maasse'amookko» yaa mishiraachchi sagara Abrihaamina kuraakko.

⁹Eehaara'i Abrihaam Waa'anne amma'nnaa maasse'amukkisam Abrihaamisam amma'nnitam keen hundim maasse'antamo.

¹⁰ «Se'l kitaabanne kitaabamukkoka hundam qoxxaa egeroobee'ekii issoobee'ekii duumamaakkoohane» yamamaa Keesammi Kitaabanne kitaabamu bikkina «Seera egellaa gantaammo» yitam keen duumanto'oo keeno.

¹¹ Keesammi Kitaabanne «Manni amma'nnatinne muccuraa heechcha siixxookko» yamamaa kitaabamu bikkina Seera egerimminne ayyim Waa'i illagenne muccuroobee'is la'amaakkoohane.

¹² «Seera egerookkok gatookko» yamamaa kitaabamu bikkina amma'nnatiinsi Seer annanna.

¹³ «Saqalamaa lehookkok hundim duumamaakkoohane» yamamaa Keesammi Kitaabanne kitaabamu bikkina Kiristoos ni bikkenne duumamaakkoohan ihaa neese See'l duunchiinsi gatisaakko.

¹⁴Kiristoos eehid issukkok Abrihaamina uwwamu maassi Yesuus Kiristoosinne mulli minaadabina afoo'isinatte; neesem Keesammi Ayyaa'n neeyyata amma'nnatinne aa'nnoommisinatte.

¹⁵Iyyabbaayyuwwa, ki'nnuwwi laqqakkam kobi'llishshika mato kuroommo. Mat manchi leheena illageen mat luwwa kuruta'n ee kuru luwwanne ayyim edeena te'im gindeena xanooyyo.

¹⁶Waa'i Abrihaaminaa Abrihaam shumo'inaa «Eroomma issoommo» yukkok dutinatte ihoo'n matinatte ihukkisa kureena yaa «Ka shumo'iinsi matina» yukko bagaan dutina yukkaannisa «Ki shumo'ina» yukkoyyo. Oo matim Kiristoosatte.

¹⁷ Kabadem an ki'nnuwwina kuroommok Waa'i Abrihaamina «Issoommo» yaa hide'u sagara soor xibbiinsii sad hiinchiinsii lasage uwwamu Seer gatiseena te'im gindeena xanooyyo.

¹⁸ Waa'i «Issoommo» yaa hide'u luwwa a'llimmina xansiisookkok Seera egerimminnette yakkota'n Waa'i «Issoommo» yaa hide'u sagar maham awwaadam hee'ukkoyyo. Ihukkaarem Waa'i Abrihaamina eroomma isseena hide'ukko.

¹⁹Eehaara'i Seer uwwamukkok mahinatte? Seer uwwamukkok Waa'i «Eroomma issoommo» yu Abrihaamina shumo'i waareebe'i afeebe'e jor bax mada'e ihukkisa moo'isonatte. Uwwamukkokim Waa'i asse'amaa'n kollinne mat lambe'i manchinnette.

²⁰Lambe'i manchi hasisookkok lam manchi lambe'ennette bagaan mat manchinayyo. Ihukkaarem Waa'i mexxokkichcho.

²¹Eehaare Waa'i aagu neeyyaxxi sagarii Seerii iittantamoyyonnihe? Lobakata iittantamo. Heechcha uwwoo Seer uwwamaakkoohan ihuta'n manni Seera egerimminne muccuram hee'ukko.

²²Ihukkaarem Yesuus Kiristoosanne amma'nnookkok hundim Waa'ika eroomma siixxoo'isina uulli minaadab hundichchim baaxiilinne karamaa yoo'isa Keesammi Kitaab alallaatoolla.

²³Ku amma'nnat waaraa la'ameebe'e Seer neese karaxxi minenne aagisaa karaa hee'ukko.

²⁴Ee bikkina neese Kiristoosanne amma'nninaa gantoommisina Kiristoos waareebe'e Seer neese awwonsaanchi hee'ukko.

²⁵Ihukkaarem kaba amma'nnat waaru bikkina ka lasage Seer neese awwonsooyyo.

²⁶Yesuus Kiristoosanne amma'nnimminne ki'nnuwwi hundichchim Waa'ina ooso.

²⁷Mashka'oomim Kiristoosanne mat ikkakko'isa moo'issakkeena xammaqantakko'i keen Kiristoosa edde'llakko'ookko.

²⁸Ki'nnuwwi hundichchim Yesuus Kiristoosinne mat ikkakko'i bikkina Ayihuxxi mannannem Giriik mannannem te'im agidonnem wolabannem te'im goonannem meentonnem annannoom mahim bee'e.

²⁹ Ki'nnuwwimdu Kiristoosan ikkakkolas Abrihaam shumo'o; neeyyaxxi saga'llisannem lagaa'llakkamo.