Read Hadiyya Galatiy Asso 4 Bible Online

Galatiy Asso 4 - Hadiyya bible

Galatiy Asso 4

¹Kabadem an ki'nnuwwina kuroommok annika amaxxa hundam laga'lloo ciilichchi lago a'lloohan ihukkaarem ciilichchi hee'ukkuuyyi agishshiinsi e'llooyyo.

²Ixxi anni yu ayyaam afeebe'e oo ciilichchi ixxo li'isoo keeniinsii ixxeka amaxxa egeroo keeniinsii woroonette.

³Ee'isam neesem ciilluwwi hee'nnummi doollenne ka uulli losanina agid hee'nnummo.

⁴Ihukkaarem Waa'i yu amman afukkaare ixxi Beeto asse'ukko. Oo ixxi Beetim meentichchoonsi qaramaa Seerina ijaajamaakkoohan ihukko.

⁵ Waa'i eekka issukkok See'l agiddanonne hee'nnummi keeno wolabbanonne fissaa ixxi oos isseenatte.

⁶Ki'nnuwwim Waa'ina oos ikkakko'i bikkina Waa'ina «Abba, niyyanna» yaa laaroo ixxi Beetika Keesammi Ayyaana ni wodanonne issukko.

⁷Ee bikkina neese ka lasage Waa'ina ooso bagaan agidoyyo. Waa'ina oos inkumlas ixxeensi sharada a'llinoommo.

⁸Ki'nnuwwi gaassi Waa'a laqqakkambee'i doollenne qophpha'n waa'uwwina agid hee'llakko'o.

⁹Ihukkaarem kaba Waa'a laqqakka'a eehanniinsim loboka Waa'im ki'nnuwwa la'aa lasage odim daba'llitakka'a ee hoongaanchi gadamaakkoo ka uulli losanina hinkid daba'llitakko'o? Daba'llitakka'a odim ixxuwwina agid ikkakkeena hinkid hassakko'o?

¹⁰Ki'nnuwwi balla, agana, ammanee hiinchoo annanni issitakka'a egettakkamuulla.

¹¹«An ki'nnuwwina badarummi badallat hundim huunshan ihookko» yaa baddaammo.

¹²Iyyabbaayyuwwa, an ki'nnuwwa labummisam ki'nnuwwim eese labbakkamisina uunxoommuulla. Ki'nnuwwi eese mahannem hawwoddakko'oyyo.

¹³Luxxeka an mishiraachchi sagara ki'nnuwwina kurummok xissaa ki'nnuwwi beyyonne hee'ummi bikkinatte ihukkisa laqqakkamo.

¹⁴Ee ammane i duuha'i ki'nnuwwina lobakata keenat ihukkaarem ki'nnuwwi eese ceentakkoo'n Waa'i asse'amaa'nnisaa Yesuus Kiristoosisaa issitakka'a aa'llakko'o.

¹⁵Lobakata liirantakka'a hee'llakko'oka kaba ki'nnuwwa mah nakkukko? Xantakko'oohan yakkota'n hanqinam ki'nnuwwika foorem iina uwwitakkeena hassakka'a hee'llakko'o.

¹⁶Eehaara'i an ki'nnuwwina hanqo'i woshsha kurummi bikkina diinakkichchi ihummonnihe?

¹⁷Mulli keen ki'nnuwwa hassamok eroomminatte ihoo'n ki'nnuwwa iinniinsi annanni issita'a ixxuwwi kollonne dabatteena hassa'atette.

¹⁸Kabadem ihukkaare an ki'nnuwwinne maqire hee'oommi ammanem xale'i ihoo'n ki'nnuwwiinsi annanni ihoommi ammanem er sawwitinne qoxximmi erane.

¹⁹I ooso, Kiristoosik qoocci ki'nnuwwanne moo'ameebe'i afeebe'e malaayyaam xuuchchi odim eese amadaakko.

²⁰An eraa'llaanniinsi annanni ihaakkoo duuha'a ki'nnuwwina moo'iseena ki'nnuwwinne maqire ihaammoota'n eran hee'ukko. Ihona bagaan ki'nnuwwi bikkina iikki mal bi'aakko.

²¹Seerina ijaajantakkeena hassakkam keeno mat xa'mmichcha xa'mmoommo. Huno'llehe, kullehe; Seera macceessakkeena hassakkamoyyonnihe?

²² See'l kitaabanne «Abrihaamina agishshoonsii wolabichchoonsii qaranto'i lam oos hee'llo'o» yamamaa kitaabamaakko.

²³Oo agishshoonsi qaramukkok maa'llisinne qaramaakkoohan hee'ukko. Ihukkaarem wolabichchoonsi qaramukkok Waa'i neeyyaxxisinne qaramaakkoohan hee'ukko.

²⁴Oo lamem meentim lamem hidiro kobi'llitamo. Luxxek agiddanina ooso qatto'i Aggaare Siina'i duunanne ihu hidiro kobi'llitamo.

²⁵Oo Aggaare Araphphi uullanne yoo Siina'i duunatte. Isem is oosinne maqirem agiddanonne yoo Yerusaaleema kobi'llitamo.

²⁶Ihukkaarem iima'n Yerusaaleem wolabichchi niyyummatte.

²⁷ Mashka'oomim Keesammi Kitaabanne «Ooso qatbee'i alceenna, at lobakata liirame. Ooso qatteena xuu'llaa laqqibee'aante, at lobakata ‹ilil› yihe. Mashka'oomim goonchi yoohaanteensi goonchi urukkaantek oos lophphaakko» yamamaa kitaabamaakko.

²⁸Kabadem iyyabbaayyuwwa, neesem Yisaaqisam Waa'i neeyyaxxisinne qarammaammoo keeno.

²⁹ Ihukkaarem ee ammane maa'llisinne qaramukkok Keesammi Ayyaa'nnisinne qaramukkoka hawwisukkisam kabadem ee'isame.

³⁰ Ihukkaarem Keesammi Kitaabanne «Agishshok beet wolabichchi beetinne maqire lago aa'oobee'i bikkina ee agishsho is beetinne maqirem miniinsi fissitaa holle» yamamaa kitaabamaakko.

³¹Ee bikkina iyyabbaayyuwwa, neese wolabichchona ooso bagaan agishshona oosoyyo.