Read Hadiyya Galatiy Asso 5 Bible Online

Galatiy Asso 5 - Hadiyya bible

Galatiy Asso 5

¹Kiristoos neese wolabbanonne fissu bikkina ee wolabbano qoxxitakka'a ege'llehe bagaan odim daba'llitakka'a agidda'n gaanjaqqanne aaggakkotte.

²An Phaawuloos ki'nnuwwina kuroommoka macceessehe; Ballachchanchi gatisookko yitakka'a ballachchantakko'aare Kiristoos ki'nnuwwina maham awwaadooyyo.

³Ballachchantam keenina hundinam an edaahim kuroommok Seer yookkoka hundam qoxxita'a egettamisinatte.

⁴Seera egerimminne muccuttakkeena yakitakkam keen hundim Kiristoosiinsi annanni ikkakka'a Waa'i eroommiinsi ubbakko'ookko.

⁵Neese siixxineena neeyyata issinoommi muccurooma Keesammi Ayyaaninne inkaa amma'nnatinne egellaammo.

⁶Mashka'oomim Yesuus Kiristoosinne mat inkaa lasage hasamookkok iittinne misha mishoo amma'nnato bagaan ballachchanchi te'im ballachchancha hoogimmi maham awwaadooyyo.

⁷Ki'nnuwwi erisa xoreexxantakkam hee'llakko'o. Ihukkaarem kaba hanqina ijaajantakkambee'isa ki'nnuwwa qolaa hoorukkok ayyette?

⁸Eehido'i qawwiishshi ki'nnuwwa weeshoo Waa'iinsi waaraakkoohaneyyo.

⁹ Hoffi ursho'i lobakat qama hufaa'ookko.

¹⁰Ihukkaarem an ki'nnuwwina kurummaanniinsi annanni sawwite aa'llakkambee'isa Moollanninne ki'nnuwwanne amma'nnoommo. Ayyettem ihukkaare ki'nnuwwika tiiro bi'isoohaannonne Waa'i oogatookko.

¹¹Iyyabbaayyuwwa, an ki'nnuwwina Ballachchammehe yaa kuraammoohan yakkota'n kabad afeebe'e eese mahina hawwisakkam hee'akko'o? Ee'isa ihaakkoohan ihuta'n Kiristoos leh bikkina losisimmi matem hawwom eebam hee'ukkoyyo.

¹²Oo ki'nnuwwa hawwissam keen hasso'aare ixxuwwi gagam abaajjaqqitona.

¹³Iyyabbaayyuwwa, ki'nnuwwi wolabbanina weeshantakko'i bikkina ee wolabbano xale'i maa'l mixanina awwaaxxitakkeena mashka'i issimma uttakka'a iittinne mat matina awwaaddakkam keen ikkehe.

¹⁴ Mashka'oomim See'l kitaabanne kitaabamukkok hundim «Ki beshichcho ki gaqqisa iitte» yoo matem sagaranne wixxaa amadamaakkoohane.

¹⁵Ihukkaarem ki'nnuwwina'i ki'nnuwwim ga'mmamtakka'atii itantakka'atii bi'llakkambee'isa qoxxitakka'a ege'llehe.

¹⁶An ki'nnuwwina kuroommok ki'nnuwwika heechcha Keesammi Ayyaan awwonsona bagaan maa'l mixano wonshitakkotte.

¹⁷ Mashka'oomim maa'l mixan Keesammi Ayyaa'n mixaninne iittamooyyo. Odim Keesammi Ayyaa'n mixanim maa'l mixaninne iittamooyyo. Keesammi Ayyaanii maarii iittantambee'i bikkina ki'nnuwwi hassakko'oka issitakkeena xantakkamoyyo.

¹⁸Keesammi Ayyaanimdu ki'nnuwwa awwonsoohan ihulas ki'nnuwwi Seeriinsi woroonetteyyo.

¹⁹Maa'l mixan la'amaakkoohane; oohim saa'imma, haashaassoo luwwa issimma, balale'ancha,

²⁰qophpha'n waa'ina otossimma, gennimma te'im falimma, maso'ooma, fitancha, to'achchimma, quuqimma, gaga iittimma, annannaatooma, tobbe'imma,

²¹mirmimma, dimbimma, jor kajjaa ee keeno laboo luwwi hundame. Kanniinsi illageen ki'nnuwwina ege'llehe yummisam kabadem odim ege'llehe yoommuulla. Eehido'i luwwa issitam keen Waa'i adillanonne aaggamoyyo.

²²Ihukkaarem Keesammi Ayyaa'n mish iitto, liirancha, xumma, xa'nnimma, eroomma, biijooma, amma'nnancha,

²³maashaalloomaa gaga ijaajimmaa. Eehido'i luwwa issimmina hooroo seer bee'e.

²⁴Yesuus Kiristoosan ikko'i keen ixxuwwika maara jor mixan hundinnem saqalta'a shito'ookko.

²⁵Keesammi Ayyaaninne hee'nnoomman ihulas Keesammi Ayyaanim neese awwonsona.

²⁶Neesena'i neesem mat matonne ki'nnaa to'achchimminne awwaad bee'i luwwanne bakke'nnoone.