Read Hadiyya Efeesoon Asso 2 Bible Online

Efeesoon Asso 2 - Hadiyya bible

Efeesoon Asso 2

¹ Ki'nnuwwim Waa'ina ijaajancha sabimminnee baaxiilo baximminnee letakko'oo keen hee'llakko'o.

²Ee ammane ka uulli jor luwwaa hafachchanne ihaa gassoo habus adilaa awwontakku'uuyyi ijaajantakkam hee'llakko'o. Ixxim Waa'ina ijaajantambee'i keenonne kaba baxukkuuyyi yoo habusa.

³Neese hundim ni maa'l mixa'nnisaa ni tii'llisaa inkummuuyyi hee'nnummi ammane ixxuwwisam hee'nnummo. Qooccammummisinnem mulli kee'nnisam Waa'ik quunqi yoo keen hee'nnummo.

⁴Ihukkaarem Waa'i qishixxatii neese iittu iittii lobakat ihu bikkina

⁵neese Waa'ina ijaajancha sabimminne ki'ukkok lenaammoo keen inkummaarem Kiristoosinne maqirem heechcha uwwukko. Ki'nnuwwim gattakko'ok Waa'aanninne eroomminnette.

⁶Yesuus Kiristoosinne maqirem neese lehiinsi ki'isaa ixxenne maqirem iimanenne afuussukko.

⁷Eekkam issukkok gabalbee'i eroomma ixxi biijoominne niina Yesuus Kiristoos kollinne issukkisa waaroo doollenne moo'iseenatte.

⁸Yesuus Kiristoosanne amma'nnitakka'a Waa'i eroomminne gattakko'ookko. Oohim Waa'i uwwaakkoohane bagaan ki'nnuwwi baxinneyyo.

⁹Ayyi manchim «An gatummok baxummi baxinnette» yaa bakke'oone.

¹⁰Mashka'oomim neese qooccukkok Waa'a. Waa'i gaassaatim gudisu er baxo banxoommisina Yesuus Kiristoos kollinne la'mmaagge qooccukko.

¹¹Ki'nnuwwi Yihud ikkakkobee'i keen eraare hinkid hee'llakkoda'e sawwi'llehe. Maa'llisinne manni anginne «Ballachchammaammo» yitam Ayihuxxi manni ki'nnuwwa «Ballachchantakkobee'i keeno» yita'a gaddam hee'llo'o.

¹²Ee doollenne ki'nnuwwi Kiristoosiinsii Waa'i minaadab hee'llo'i Isra'eeliinsii annanni ikkakka'a hee'llakko'o. Waa'i ixxi minaadabina eroomma isseena hide'u hidirinam koyyi hee'llakko'o. Odim ka uullannem ki'nnuwwina soodbee'i manni ikkakka'a Waa'a laqqakkambee'i keen hee'llakko'o.

¹³Ihukkaarem eraare qee'llitakka'a hee'llakko'i keen kaba Yesuus Kiristoos kollinne ixxi xiiginne hincitakko'ookko.

¹⁴Ayihuxxi minaadabaa mulli keenoo annanni issaa hee'u maso'oo'm gortanna gindaa mat issaa niina xumma eebukkok Kiristoosatte.

¹⁵ Ee lamem minaadaphphi bikkennem ixxi gaginne haareechchi minaadaba qoocceena yaa Seeranne kitaabamu ijaajoo Ayihuxxi manni seeraa ixxi lehinne gindaa xumma uwwukko.

¹⁶ Kiristoos saqalamaa lehimminne lamem minaadaphphi lambe'ennem hee'u maso'ooma hooraa lamem minaadabam mat issaa Waa'inne iittansukko.

¹⁷ Ixxim waaraa qee'llitakka'a hee'llakko'i ki'nnuwwinaa hincita'a hee'llo'i keeninaa xummi mishiraachchi sagara kurukko.

¹⁸Neese Ayihuxxi mannii mulli keenii matem Keesammi Ayyaaninne Waa'i kollinne hincineena xannummok Kiristoos kollinnette.

¹⁹Ee bikkina ka lasage ki'nnuwwi Waa'i minaadabinnee Keesammi Mi'n abaroosinnee mato bagaan koyyayyoo waaraanoyyoo.

²⁰Yesuus Kiristoos utub ihaa asse'amaanii hiraagaanii baxxo'i minenne ki'nnuwwim edantakka'a baxxantakko'ookko.

²¹Kininne baxamu mi'nnisa mat issaa amaxxansookkokii Moollannina keesammi ihaakkoo Keesammi Min ihoo'isina li'isookkokii ixxotte.

²²Ki'nnuwwim Kiristoosinne mat ihimminne Waa'i hee'oo min ikkakkeena Keesammi Ayyaaninne ee minenne baxxantakkamuulla.