Read Hadiyya Efeesoon Asso 3 Bible Online

Efeesoon Asso 3 - Hadiyya bible

Efeesoon Asso 3

¹An Phaawuloos Yesuus Kiristoosina karamummok Ayihuxxi manni ikkakkobee'i ki'nnuwwi bikkinatte.

²An ki'nnuwwina awwaadoommi awwaado Waa'i ixxi eroomminne iina uwwukkisa macceessakkoo'n uttakkamoyyo.

³Mannina la'isubee'i luwwa Waa'i iina caakkisaa la'isukkisa an gundisaa kitaabaammo.

⁴ Ki'nnuwwi kaka qananaa'llakkam ammane Kiristoosika maaxamu woshsha an qoossaa la'oommisa laqqakkeena xantakkamo.

⁵Gaassi doollenne hee'llo'i mannina Waa'i la'isubee'i luwwa keesammi ikko'i ixxi asse'amaaninaa hiraagaaninaa Keesammi Ayyaa'n kollinne kaba caakkisaakko.

⁶Oohim mulli minaadab mishiraachchi sagara macceessa'a Ayihuxxi minaadabinne maqirem Waa'ika maassoo ixxuwwinnem mat orachchi ikka'a Waa'i uwwu neeyyaxxi sagaraa Yesuus Kiristoos kollinne baxxamaan ihimma.

⁷An ka mishiraachchi sagarina awwaadaanchi ihummok Waa'i ixxi eroomminne iina uwwu uwwanchinnette. Oohim uwwamukkok eesenne baxoo ixxi malaayyinnette.

⁸Anni Waa'i minaadab hundiinsim maham hoffan ihummaarem mulli minaadabina Kiristoosika gabalbee'i eroomma kuroommisina iina uwwamukko.

⁹Luwwi hundam qooccu Waa'i sawwixxeka lobakat doollina la'amoo'n maaxamaa hee'u luwwa manni hundinam la'isoommisinam iina uwwamukko.

¹⁰Oohim ka doollenne amma'nnaa'n kollinne iimanenne hee'llam gassaanii malaayyaammuwwii Waa'ika gabalbee'i qoorooma laqqamisinatte.

¹¹Waa'i eekka issukkok ni Moollanni Yesuus Kiristoos kollinne ixxeka heer heerinam hee'oo sawwite wonsheenatte!

¹²Neesem ixxonne amma'nninaa malammoo'n iggimminne Waa'i illage hincineena xannummok Kiristoosinnette.

¹³An ki'nnuwwi bikkina hawwoommi hawwi mashka'inne ki'nnuwwi hooggakkambee'isina an ki'nnuwwa uunxoommuulla. Ku an hawwoommi hawwi ki'nnuwwina lomba.

¹⁴Iimanennee uullannee yoo ixxi abaroos hundinam Anni Waa'i illagenne guruphphaa otossoommo.

¹⁶Ki'nnuwwik woro'l mannoom qoxxoo'isina ee ixxi lombi yoo goddiinsi Keesammi Ayyaa'n kollinne ki'nnuwwina malaayye uwwoo'isinaa

¹⁷Kiristoos ki'nnuwwi wodanonne amma'nnatinne hee'oo'isinaa Waa'a uunxoommo. Odim Waa'a uunxoommok ki'nnuwwik heechchi iittinne qoxxoohan ihoo'isina

¹⁸Waa'i minaadab hundinnem Kiristoos iittika haraarooma, qeeraa'llooma, uullichchaa xillaalloomaa qoossitakka'a laqqakkeena xantakkamisinatte.

¹⁹Odim Kiristoosika manni lachchiinsi hanaan ihaakkoo iitto laqqamisinatte. Waa'ik qoocci hundoomim ki'nnuwwannem wo'mmoo'isinatte.

²⁰Kabadem ihukkaare neese xa'mminummaanniinsi te'im sawwinummaanniinsi hundiinsim lobakata lonsaa ni woronne ixxi malaayyinne baxeena xanoo Waa'ina

²¹amma'nnaaniinsi Yesuus Kiristoos kollinne qaranchi hundannem heer heerinam lombi ihona! Aameen.