Read Hadiyya Efeesoon Asso 4 Bible Online

Efeesoon Asso 4 - Hadiyya bible

Efeesoon Asso 4

¹Moollannina karamaa yoommi an Phaawuloos ki'nnuwwi weeshantakko'i weeshanchina laboo heechcha hee'llakkamisina uunxoommo.

² Ki'nnuwwina'i ki'nnuwwim iittinne iyyaqqitakku'uuyyi gag horoore heeshaa'imminne, maashaalloominnee xa'nnimminnee hundinnem hee'llehe.

³Xumminne mat ikkakka'a Keesammi Ayyaan uwwu mateeyyoomam egettakkeena yaki'llehe.

⁴Ki'nnuwwi weeshantakko'i ammane matem neeyyatina weeshantakko'isam mat orachchi, mat Keesammi Ayyaan,

⁵mat Moollanni, matem amma'nnat, matem xammaqanchii

⁶niina hundinam Anni mexxo'i Waa'ii yookko. Ixxim hundiinsim hanaan yoohane, hundannem baxoohanee hundannem hee'oohanee.

⁷Ihukkaarem Kiristoos niina annannichchinam uwweena hasukkisinne eroomma uwwaakko.

⁸ Oohim Keesammi Kitaabanne «Iimane ixxi firu ammane qeefadanto'i kee'nneka dut keeno awwonsaa marukko. Manninam uwwancha uwwukko» yaakko.

⁹Eehaara'i ku «Iimane firukko» yoo sagar mayyimma? Uullaannonne xilli beyyonne aad dillukkisa moo'isoohane.

¹⁰Oo uullaannonne xilli beyyonne dillukkok iima'nnaannonne libo'onne firukkaneme. Oohim hundem luwwannem ixxi wo'mmoo'isinatte.

¹¹Ixxim mat mat keen asse'amaan ikkamisina, mat mat keen hiraagaan ikkamisina, mat mat keen mishiraachchi sagara kuraan ikkamisina, mat mat keen amma'nnaano allaaraan ikkamisinaa mat mat keen Waa'i sagara losisaan ikkamisinaa uwwancha uwwukko.

¹²Eekka issukkok amma'nnaano Waa'ina awwaaddamisina gudisimminne Kiristoos orachchi ihu amma'nnaa'n wixxite li'iseenatte.

¹³Ee'isinne neese hundichchim amma'nnatinne mat inkeenaa Waa'i Beeto qoossinaa lanqeenaa xannoommisina Kiristoos hundisinnem wo'm ihukkisam neesem wo'm inkeena li'nnummuuyyi mallona.

¹⁴Kanniinsi eehid biranchinne, qawwiishshinnee huushissam qoor keen gudisso'i huushisoo losishshinnee hundinnem ciilluwwisa inkaa hafachchi massoo luwwisa massammonnihe?

¹⁵Ihukkaarem hanqi woshsha iittinne woncummuuyyi amma'nnaanina horoor ihu Kiristoosa lambeena hundisinnem li'nnona.

¹⁶ Orachchi qaamafeet hundim nigginne mat ihaa amaxxamukkisam amma'nnaan hundim mat ihaa amaxxamookkok Kiristoosinnette. Ee bikkina orachchi qaamafeet hundim ixxena uwwamu baxo baxukkuuyyi orachchi hundim li'oo'isina iittinne baxookko.

¹⁷Hanqo'i Waa'a laqqambee'i minaadab ixxuwwi tiironne awwaad bee'i luwwa sawwitu'uuyyi hee'llamisa ka lasage ki'nnuwwi hee'llakkambee'isina Moollanni summinne qoxxisaa uunxoommuulla.

¹⁸Lachcha hoogimminnee wodano duudimminnee ki'ukkok qoossitambee'isa ixxuwwik tiir tuunsaakko. Odim Waa'i uwwoo heechchiinsim annanni ikko'ookko.

¹⁹Ixxuwwanne tuulli hore'em bee'u bikkina ixxuwwi gaga jor mixanina higissa'a uwwita'a jor luwwi hundam edda'a edda'a issitamuulla.

²⁰Ihukkaarem ki'nnuwwi Kiristoos bikkina lossakko'ok ee'isayyo.

²¹Hanqinam Yesuus bikkina macceessakko'ookko. Ixxonne hanqi yoo'isam lossakko'ookko.

²² Ee bikkina jor mixaninne bi'aakkoo gaassi hee'llakkam ebeer mannooma ki'nnuwwiinsi sheelattakka'a hoollehe.

²³Ki'nnuwwik tiirii wodanii haareechchi ihona.

²⁴ Hanqo'isa muccuroominnee keesamimminnee Waa'i hagaranne qooccamaakkoo haareechchi mannooma edde'llehe.

²⁵ Ee bikkina neese hundim mat orachchi inkummi bikkina ki'nnuwwi woriinsi qophpha'n woshsha fissitakka'a hoottakka'a ki'nnuwwina'i ki'nnuwwim hanqo'i woshsha woccehe.

²⁶ Quuqqehe, ihukkaarem baaxiilo baxxakkotte. Quuqqakko'isa hee'llakkonam eelliinchi aagoone

²⁷Sheexaanchina beyyo uwwitakkotte.

²⁸Gamaanchi ka lasage od game'oone. Ihukkaarem buxina uwwoo luwwi hee'oo'isina ixxi anginne badaraa eroka baxona.

²⁹Macceesoo keenina eroomma uwweenaa qoxxiseenaa xanoo er sagar ki'nnuwwiinsi firona bagaan jor sagar firoone.

³⁰Gatimmi ayyaamina lubbat ihoo'isina ki'nnuwwi woronne Waa'i issu Keesammi Ayyaana kichche'issakkotte.

³¹Baado amadimma, quunqa, nadajja, laachcha, game'llanchaa jor woshshaa hundam ki'nnuwwi woriinsi fissitakka'a hoollehe.

³² Ki'nnuwwina'i ki'nnuwwim biijaalluwwaa qishixxantakkam keenoo ikkehe. Waa'i Kiristoos kollinne ki'nnuwwina haafukkisam ki'nnuwwina'i ki'nnuwwim haafaqqammehe.