Read Hadiyya Efeesoon Asso 5 Bible Online

Efeesoon Asso 5 - Hadiyya bible

Efeesoon Asso 5

¹Waa'ina iittantakko'oo oos ikkakko'i bikkina Waa'a labbehe.

² Kiristoos neese iittaa ixxi foore Waa'ina danaamisa enje'oo kiti'mmisa issaa ni bikkina higisaa uwwukkisam ki'nnuwwim iittinne hee'llehe.

³Waa'i minaadabanne hee'immina laboobee'i luwwi hundim oohim saa'immi te'im haashaassoo luwwi te'im jor mixan ki'nnuwwi woronne hore'em hee'oone.

⁴Waa'ina galata hincaa'llehe bagaan tuussiisoo woshshi ihukko te'im awwaad bee'i woshshi ihukko te'im shigigaa'oo woshshi ihukko ki'nnuwwina laboobee'an ihu bikkina ki'nnuwwiinsi qee'llona.

⁵Saa'aanchi te'im jora baxookkok te'im jor luwwa mixookkok Kiristoosaannonnee Waa'aannonnee adillanonne aageena xanoobee'isa qoossitakka'a laqqehe. Oo jor mixan ixxi gagoomim Waa'i bikkenne mulli luwwina otossimma.

⁶Ee kee'n mashka'inne ijaajantambee'i kee'n hanenne Waa'i quunqi waaroo bikkina awwaad bee'i wocinne ayyim ki'nnuwwa qawwiisoone.

⁷Ee bikkina ee keeninne exxitakkotte.

⁸Eraare ki'nnuwwim tuunsi woronne hee'llakko'o. Ihukkaarem kaba Moollanni ki'nnuwwa caakkanne fissu bikkina caakkanne hee'oo kee'nnisa hee'llehe.

⁹Mashka'oomim caakkik mish hundim eroomma, xabbeenoomaa hanqaa.

¹⁰Odim Moollanna liiransoo luwwi mada'e ihukkisa qoossitakka'a laqqehe.

¹¹Ee mishbee'i tuunsi baxo baxxam keeninne exxitakkotte. Ihukkaarem ee kee'n baxo biir issehe.

¹²Mashka'oomim ixxuwwi maaxaqqanne issitam luwwi wocakkeenam tuussiisoohane.

¹³Caakkanne firu luwwi hundim moo'amoohane. Moo'amoo luwwi hundim caakka.

¹⁴Ee bikkina «Ate, diriittittaanno, diriiriinsi baqihe; lehiinsim ki'e. Kiristoos kiina caakka uwwookko» yamamaakko.

¹⁵Eehannata'i hinkid hee'llakkamda'e qoossitakka'a laqqehe. Qawwi mannisa ihoo'n qoor mannisa hee'llehe.

¹⁶ Ku doolli jor ihu bikkina makku amman hundam awwaaxxehe.

¹⁷Ee bikkina Moollannik doo'l mada'e ihukkisa qoossitakka'a laqqehe bagaan qawwuwwi ikkakkotte.

¹⁸Keesammi Ayyaan ki'nnuwwanne wo'mmona bagaan bichchina massoo dimbisoo luwwa aggakka'a dimbitakkotte.

¹⁹ Ki'nnuwwina'i ki'nnuwwim Waa'a galaxximminnee lonsimminnee liirantakku'uuyyi wodaninne guullitakka'a Waa'ina zammallehe.

²⁰Niyyanni Waa'a ni Moollanni Yesuus Kiristoos summinne hundem luwwannem hundem ammanem galaxxehe.

²¹Kiristoos lombina yitakka'a ki'nnuwwina'i ki'nnuwwim ijaajammehe.

²² Meento, Moollannina ijaajantakkamisam ki'nnuwwi goonina ijaajammehe.

²³Kiristoos ixxi orachchi ihu amma'nnaanina horooree Gatisaanchoo ihukkisam aro'im ixxi arena horoore.

²⁴Amma'nnaan Kiristoosina ijaajamoo'isam are is aro'ina hundem luwwannem ijaajantona.

²⁵ Aro'o, Kiristoos amma'nnaano iittaa ixxi foore higisaa uwwukkisam atim ki are iitte.

²⁶Kiristoos eehid issukkok wo'isa muccussoo ixxi sagarinne amma'nnaano muccussaa keesanto'oo keen isseenatte.

²⁷Ee'isinne shigigaa'oo luwwik te'im kurakkam luwwik te'im miiqakkam luwwik te'im eehido'i luwwik ma'lluchchim bee'i muccur issaa amma'nnaano ixxi illagenne nuurinne hincaa'eenatte.

²⁸Ee'isam aro'im ixxi orachcho iittoo'isam ixxi arem iittimmi hasisookko. Ixxi are iittookkok ixxi gagam iittoohane.

²⁹Mat manchi ixxi orachcho abooyyookko; hasisoo luwwam issookko bagaan ixxi orachcho sabooyyo. Neesem Kiristoos orachchina qaamafeettuwwi inkummi bikkina Kiristoosim amma'nnaanina hasisoo luwwa issookko.

³¹ Keesammi Kitaab «Ee bikkina manchi ixxi amaa annaa uraa ixxi arenne mat ihookko. Lamim mat orachchi ikkamo» yaakko.

³²Kannik woro'l tirat lobakata kee'mmaalla; oohim moo'isookkok Kiristoos bikkinattee amma'nnaa'n bikkinattee.

³³Ihona bagaan ki'nnuwwi annannichchim ki'nnuwwi gaqqi are ki'nnuwwi gaqqisa iittehe; arem is aro'o lonsitona.