Read Hadiyya Efeesoon Asso 6 Bible Online

Efeesoon Asso 6 - Hadiyya bible

Efeesoon Asso 6

¹ Ooso, ki'nnuwwina hasisoohan ihu bikkina ki'nnuwwi amo'inaa anno'inaa Moollannina ijaajantakkamisam ijaajammehe.

² Sooxxi eroommi yoo luxxi ijaaj «Ka uullanne kiikki umur qeeraa'lloo'isinaa hee'lloo heechchim makkoo'isinaa amaa annaa lonse» yoohane.

⁴ Anno'o! Ki'nnuwwika ooso axeettaku'uuyyii soggakku'uuyyii Moollanni googonne li'issehe bagaan quuqoo'isa issitakkotte.

⁵ Agido, Kiristoosina ijaajantakkamisam ka uullanne yoo ki'nnuwwi moollanno'ina baddimminne, huxechchinnee xabbeen wodaninnee ijaajammehe.

⁶Oohim manni moo'aa liiramonatte ihoo'n Kiristoosina awwaadaa'nnisa Waa'ika doo'lla wonshitakkeena wodaninnem ijaajammehe.

⁷Manninatte ihoo'n Moollannina awwaaddakkamisam danaam tiirinne awwaaddehe.

⁸Agishshom ihukko wolabichchom ihukko er baxo baxookkok ayyim Moollanniinsi irifo'o gudom siixxoo'isa laqqehe.

⁹ Moollanno'o, ki'nnuwwim awwaadaanina ee'isa issehe. Mannina golo'oobee'i Moollanni ki'nnuwwinaa ixxuwwinaa iimanenne yoo'isa sawwimminne ki'nnuwwi agido baddissakkotte.

¹⁰Kabadem ihukkaare Moollanni malaayyaam wodinne ixxonne qoxxehe.

¹¹Sheexaa'nneka hantaaro uullixxantakkeena xantakkamisina Waa'i uwwoo o'l mu'ut hundam edde'llehe.

¹²Neese qasammoommok manninnette ihoo'n iimanenne hee'llam keeninne oohim awwonsaaninnette, malaayyaammuwwinnette, tuunsaakkoo ka uulli manna gassitam keeninnettee jor ayyaa'n gogotinnettee.

¹³Ee bikkina jor ayyaamonne ki'nnuwwi masokkichchinne uullixxantakkeenaa lasaanchi afeebe'e kaa'llakka'a uullitakkeenaa xantakkamisina Waa'ika o'l mu'ut hundam lade'llehe.

¹⁴ Oohim hanqa sabbaxxisa lade'llakka'a, xabbeenoomam o'l eddechchisa edde'llakka'ahii

¹⁵ xumma uwwoo mishiraachchi sagaram caamma'isa issitakka'a guddakka'a uullehe.

¹⁶Eehanni hundiinsim gii'llisa aphphukkuuyyi darabamaa waaroo Sheexaa'n bagadduwwi hundam dabattakkeena xantakkam amma'nnato agi'llisa amaddehe.

¹⁷ Gattakko'isa moo'isoo o'l qoobe'em ki'nnuwwi horoorenne issaqqehe. Keesammi Ayyaa'n bisa'am amaddehe. Oo bisa'im Waa'i sagara.

¹⁸Hasisoo luwwi hundinam Waa'a uunxitakkam ammane Keesammi Ayyaan awwonsoo'isinne hundi ammanem uunxehe. Ee'isinne baqitakka'a uttakkambee'isa Waa'i minaadab hundinam uunxehe.

¹⁹Maaxamu mishiraachchi sagara iggaa wocoommisina iikka suume fooqaa'aa wocoommi woshsha uwwoo'isina iinam Waa'a uunxehe.

²⁰Kaba an karamaa hee'ummuuyyim asse'amummok ee mishiraachchi sagarinatte. Ee bikkina mishiraachchi sagara laboo'isinne iggaa wocoommisina Waa'a uunxehe.

²¹ An kaba hinkid yoomda'ee maha baxoommuulda'ee laqqakkona hundem luwwam kuroo'isina Tiikiiqoosa asse'aammo. Ixxim Moollanni Yesuus Kiristoosina awwaadimmanne amma'nnamaakkoohanee iittamaakkoo niyyabbaayyoo.

²²An ixxo ki'nnuwwi beyyo asse'ummok neese hinkid yoomminda'e laqqakkamisinattee ki'nnuwwikam wodano qoxxisoo'isinattee.

²³Niyyanni Waa'ikii ni Moollanni Yesuus Kiristoosikii xummii iittii amma'nnatinne maqirem niyyabbaayyuwwina ihona.

²⁴Bi'oobee'i iittinne ni Moollanni Yesuus Kiristoosa iittoo keen hundinnem Waa'ik eroommi ihona.