Read Hadiyya Filiphphisiyus Asso 1 Bible Online

Filiphphisiyus Asso 1 - Hadiyya bible

Filiphphisiyus Asso 1

¹Neese Yesuus Kiristoosina awwaandoommi Phaawuloosii Ximootoosii Yesuus Kiristoosanne amma'nnitakka'a Waa'i minaadab ikkakko'i Filiphphisiyus beero'onne hee'llakkam amma'nnaanina, ki'nnuwwi awwonsaaninaa odim ki'nnuwwi woronne awwaaddam keeninaa kaka kitaamboommuulla.

²Niyyanni Waa'ikii Moollanni Yesuus Kiristoosikii eroommii xummii ki'nnuwwina ihona.

³An ki'nnuwwa sawwoommi amman hundam i Waa'a galaxxoommo.

⁴Ki'nnuwwi amma'nnitakko'i ayyaamiinsi ki'issakka'a kaballi afeebe'e mishiraachchi sagara kurimmi awwaadonne iinninne maqirem besh ikkakko'ookko. Ee bikkina an ki'nnuwwina Waa'a uunxoommi amman hundam liiramoommo.

⁶Ki'nnuwwi woronne ee er baxo baximma asheeru Waa'i Yesuus Kiristoos ka uulla daba'llaa waaroo ayyaamo guulloo'isa an qoossaa la'aammo.

⁷An ki'nnuwwa lobakata iittoommi bikkina ki'nnuwwina hundinam ka'isa sawwimmi hasisookko. Mashka'oomim an karamummi ammane mishiraachchi sagar hanqo'an ihukkisa caakkisaa kuroommi kurimminnee gubbamoommi gubbanchinnee iinninne maqirem hundichchim baxxantakkam gada'i uwwamaakko.

⁸Yesuus Kiristoos ki'nnuwwa iittukkisam anim ki'nnuwwa iittoommi bikkina moo'eena quluxoommisa Waa'i la'ookko.

⁹An ki'nnuwwina Waa'a uunxoommok hundiinsim e'lloo luwwi mada'e ihukkisa qoossitakka'a laqqakka'a Yesuus Kiristoos waaroo ayyaamo miiqisoo luwwik ma'lluchchim bee'i muccur keen ikkakkamisina lachchii qoossimmii wo'mmaakkoo iittinne li'llakku'uuyyi mattakkamisinatte.

¹¹Ee'isinne ki'nnuwwik heechchi Yesuus Kiristoos kollinne Waa'i lombinaa galatinaa waaroo er baxinne wo'mmaakkoohan ihona.

¹²Iyyabbaayyuwwa, kabadem ihukkaare eesenne afu karanchi mishiraachchi sagara eraa'llaanniinsi haraassimmina awwaadoohan ihukkisa laqqakkona hasoommo.

¹³ An karamummok Kiristoosina awwaadaanchi ihummi bikkinatte ihukkisa adi'l mine egettam keenii mulli keenii hundim laqqo'ookko.

¹⁴I karaxxi mashka'inne amma'nnaa'nnek dut abbaayyuwwi Moollannanne bakke'llam keen ikko'ookko. Mishiraachchi sagaram badditoo'n kurimmina eraa'llaanniinsi iggimma siixxito'ookko.

¹⁵Ihona bagaan mat mat keen Kiristoos mishiraachchi sagara alallaattamok jor to'achchinnettee gereero'innettee. Ihukkaarem mulli keen hanqo'i er wodaninnette.

¹⁶Oo er wodaninne mishiraachchi sagara kuttam keen an keyye karamummok mishiraachchi sagar hanqo'an ihukkisa caakkisaa kurummi bikkinatte ihukkisa laqqa'a iittinnette.

¹⁷Mulli keen Kiristoos mishiraachchi sagara alallaattamok hanqo'i wodaniinsette ihoo'n i karatonne hawwo eddeena iinninne gereero'lla'atette.

¹⁸Eehid ihukkaarem hawwi bee'e. Hanqo'i sawwitinnette ihukkoo labishshi sawwitinnette ihukkoo ayyi googinnem Kiristoos bikkina alallaattamulli ihu bikkina an eehannonne lobakata liiramoommo.

¹⁹Ku eesenne afu luwwi hundim ki'nnuwwi i bikkina Waa'a uunxitakkam uunxatinne Yesuus Kiristoos uwwu Keesammi Ayyaa'n hara'mmatinne eese gatisimmina ihoo'isa an la'ummi bikkina cawwaa liiramoommo.

²⁰Kabadem ihukkaare iikki lobakat mixanii sawwitii tuussiisoo luwwa maham issoombee'isinatte. An lehummaarem hee'ummaarem eraa'llisam Kiristoosa i heechchanne lonseena murte'aammo.

²¹Mashka'oomim an hee'oommi heechchi Kiristoosinatte. Lehimmi iina erane.

²²An lehoo'n ka uullanne foorinne hee'immi i baxina awwaadoohan ihulas lehiinsii heechchiinsii hinka doo'lloomda'e kureena xanoommoyyo.

²³Oo lamem sawwitim eese hawwisaakko. Kiristoosinne hee'immi iina lobakata eran ihu bikkina i mixan ka uulli heechchiinsi annanni ihaa Kiristoosinne maqire hee'imma.

²⁴Ihukkaarem an ka uullanne foorinne hee'immi ki'nnuwwina lobakata hasisoohane.

²⁵Oo sawwit lophphu bikkina amma'nnatinne li'llakku'uuyyii liirantakku'uuyyii mattakkamisina an lehiinsi gataa ki'nnuwwinne hundinnem ihoommisa qoossaa la'oommo.

²⁶Oohim an ki'nnuwwi beyyo odim waaroommi ammane i mashka'inne Yesuus Kiristoosa lonsitakka'a galaxxitakkamisinatte.

²⁷An ki'nnuwwa moo'eena waarummom te'im waaroo'n gatummom Yesuus Kiristoos mishiraachchi saga'l amma'nnatinne mat ikkehe. Ki'nnuwwi maso'o hore'em badditakkoo'n mat sawwitinne qoxxitakka'a gubbantakkamisa macceesoommisina mishiraachchi sagar yoo'isinne hee'llehe.

²⁸Ookki ixxuwwi bi'llam keen ikko'isinaa Waa'i ki'nnuwwa gatisukkisinaa mare'e.

²⁹Mashka'oomim ki'nnuwwi Kiristoosanne amma'nnimmi xale'e ihoo'n ixxi bikkina hawwo aa'immi gada'im uwwamaakko.

³⁰ Ki'nnuwwanne afu hawwi kanniinsi illageen eesenne afaa moo'llakko'oohanee kabadem hawwi woronne yoommisa macceessakku'uuyyi yontakke'anee.