Read Hadiyya Filiphphisiyus Asso 2 Bible Online

Filiphphisiyus Asso 2 - Hadiyya bible

Filiphphisiyus Asso 2

¹Kiristoosanne yoo mateeyyoom ki'nnuwwa qoxxisaakko. Ixxi iittim ki'nnuwwiinsi kichchechcha hooraakko. Ki'nnuwwina Keesammi Ayyaaninne mateeyyoom yookko. Ki'nnuwwina'i ki'nnuwwim biijaalluwwaa qishixxitakkam keenoo ikkakko'ookko.

²Odim ki'nnuwwi mat sawwitinne, mat wodaninne, iittinnee mat ihimminnee eese lobakata liiransitakkamisina ki'nnuwwa uunxoommo.

³Odim gaga iittimminne te'im «Iinniinsi ayyi yookko» yimminne maham issitakkotte. Ihukkaarem ki'nnuwwi gaga hoffiissakka'a mulli keeno ki'nnuwwiinsi e'lloohan issitakka'a xiggehe.

⁴Ki'nnuwwi annannichchim ki'nnuwwi gagina liiransoo luwwi ihoo'n mulli keenina liiransoo luwwa sawwi'llehe.

⁵Yesuus Kiristoosanne hee'u sawwit ki'nnuwwannem hee'ona.

⁶Ixxi Waa'i ihaa hee'ukkuuyyim Waa'inne yoo gudaanchooma malaayyinne masseena hasukkoyyo.

⁷Ihukkaarem ixxena yoo malaayyi hundam ixxi doo'llinnem uraa agishshi qooccanne ihaa manchi hagaranne qaramukko.

⁸Ixxim manchi qooccanne ihaa ixxi gaga hoffiisimminne lehonne afeebe'em ijaajamaakkoohan ihukko. Oohim masqalanne saqalamaa leheebe'i afeebe'e.

⁹Ee bikkina Waa'i ixxo hundiinsim lonsaa iimiimaa'ukko. Odim iimanenne, uullannee uulliinsi woroonii yoo keen hundim Yesuus summina otossoo'isina summi hundiinsim lophphaakkoo summa ixxena uwwukko.

¹¹Oohim manni hundichchim Yesuus Kiristoos Moollanni ihukkisa wocimminne Anni Waa'ina lomba uwwoo'isinatte.

¹²Iittantakko'oo iyyabbaayyuwwa, an ki'nnuwwinne maqire hee'ummi amman xale'e ihoo'n hundi ammanem ijaajantakkam hee'llakko'isam kabadem ki'nnuwwiinsi qee'llaa yoommaannonnem eraa'llaanniinsi lonsitakka'a ijaajammehe. Ee bikkina ki'nnuwwi gattakko'isa moo'isoo baxo baddimminnee huxechchinnee baxxakku'uuyyi mallehe.

¹³Mashka'oomim ixxi sawwixxeka mixxakkamisaa issitakkamisaa issukkuuyyi ki'nnuwwi wodanonne baxookkok Waa'a.

¹⁴Ki'nnuwwanne miiqakkam luwwi bee'i muccuttakko'oo Waa'i oos ikkakka'a jollii boqqoomii yoo doolli manni lambe'enne heechchi sagara kuttakku'uuyyi eelliinchisa caakkissakkamisina issitakkam luwwi hundam quunquuntakkoo'n te'im goxxantakkoo'n issehe.

¹⁶Ki'nnuwwimdu eehid issitakkolas i baxii i badallatii hundichchim awwaad bee'an ihaa gatubee'isa moo'isoohane. Ee bikkina Kiristoos ka uulla daba'llaa waaroo ayyaamo an ki'nnuwwanne bakke'oommo.

¹⁷Odim durakka'a uwwakkam kiti'mmisa issitakka'a Waa'ina awwaaddakkam amma'nnaxxi kitimanne i xiigim exxaa dunamaakkoohan yakkota'n danaam hee'ukko.

¹⁸Ee'isam odim ki'nnuwwi iinninne maqirem lobakata liirammehe.

¹⁹Ki'nnuwwi bikkina macceesaa liirameena hasummi bikkina Moollanni Yesuus yukkaare Ximootoosa ki'nnuwwi beyyo qaqqisaa asse'eena hasaammo.

²⁰Ki'nnuwwina eroomma ixxisa hanqo'i wodaninne mixookkok iina matim bee'e.

²¹Mulli keen hassamok Yesuus Kiristoosina awwaadoo luwwi ihoo'n xale'i ixxuwwi gagina awwaadoo luwwa.

²²Ihukkaarem Ximootoos mishiraachchi sagara kurimmina annina beet awwaadoo'isa iinninne maqire awwaadukkisinne awwaad yoo manchi ihukkisa ki'nnuwwim laqqakkamo.

²³Ee bikkina i woshshik duuha'a moo'ummisinne ki'nnuwwi beyyo qaqqisaa Ximootoosa asse'eena sawwaammo.

²⁴Eehanniinsim odim Moollanni yukkaare an i gagim ki'nnuwwi beyyo abbis ammanenne waaroommisa amma'nnoommo.

²⁵Odim ki'nnuwwi asse'llakko'i Afiroodiixa ki'nnuwwi beyyo dabaraa asse'immi hasisoohan ihukkisa la'aammo. Ixxi iina abbaayyo, beshichcho, iinninne maqirem gaadaanchoo iina hasisoo luwwina awwaadoohanee.

²⁶Ixxo ki'nnuwwi beyyo asse'oommuullak ki'nnuwwa hundichchom moo'eena quluxu bikkinattee xissukkisa macceessakko'isa la'aa lobakata kichche'u bikkinattee.

²⁷Ixxo Waa'i fayyiisukko bagaan hanqinam lehooqaxa xissaa hee'ukko. Waa'i ixxo fayyiisukkok xale'e ixxenatte ihoo'n eesenne yoo kichchechchanne kichchechchi exxoobee'isinatte.

²⁸Ee bikkina ki'nnuwwi ixxo la'mmaagge moo'llakka'a liirantakkamisinaa i kichchechchim sholle'oo'isinaa ixxo ki'nnuwwi beyyo qaqqisaa asse'eena anim lobakata quluxaammo.

²⁹Moollanninne ixxi ki'nnuwwina abbaayyi ihu bikkina lobakat liiranchinne aa'llehe. Ixxe'nnoo'i keen hundam lonsehe.

³⁰Mashka'oomim ki'nnuwwi bee'llakko'i beyyonne iina ki'nnuwwi baxxakkam baxo baxaa guulleena yaa ixxi foore Yesuus Kiristoos bikkina higisaa uwwaa lehaa hoogaakko.