Read Hadiyya Filiphphisiyus Asso 4 Bible Online

Filiphphisiyus Asso 4 - Hadiyya bible

Filiphphisiyus Asso 4

¹Kabadem ihukkaare eese liiransitakkam i kaachchi mare'uwwa; odim an moo'eena quluxoommi iittoommi iyyabbaayyuwwa, Moollannanne qoxxitakka'a uullehe.

²Annanni issaahim Eewodiyaanee Sinxiikee ki'nnuwwi Moollannanne amma'nnimminne aayyuwwi ikkakko'i bikkina iittantakkamisina uunxoommuulla.

³Amma'nnantaattoo i beshichcho, oo meenti Qalameenxoosinnee ixxuwwi summi heechchi kitaabanne kitaabamu mulli i beshshuwwinnee maqirem mishiraachchi sagara kurimmanne iinninne maqirem badatto'oo keen ikko'i bikkina ixxuwwa hara'mmitoo'isina an keese uunxoommuulla.

⁴Moollanninne yoo mateeyyoomanne ki'nnuwwi hundi ammanem liirammehe! Edaahim kuroommo; Moollannanne liirammehe.

⁵Moollanni qaqqisaa waareenatte; ki'nnuwwik maashaalloom wo'mmaakkoo eroommi manni hundinam la'amona.

⁶Ki'nnuwwi Waa'a uunxitakkam amman hundam lobakata galaxxitakku'uuyyi ki'nnuwwina hasisoo luwwi hundinam Waa'a xa'mmehe bagaan matem luwwannem kichche'llakkotte.

⁷Manni qoossoohaanniinsi hanaan ihaakkoo Waa'ik xummi Yesuus Kiristoos kollinne ki'nnuwwika wodanoo tiiroo egerookko.

⁸Iyyabbaayyuwwa, lasaanchonne an ki'nnuwwina kuroommok ki'nnuwwik wodan hanqo'i woshshi hundinne, wolabbaninne, xabbeen woshshi hundinne, danaam woshshi hundinne, liiransoo woshshi hundinnee lomba uwwoo luwwi hundinnee oohim doo'l woshshinnee galatinnee wo'mmaakkoohan ihona.

⁹Iinniinsi lossakko'oka, aa'llakko'oka, macceessakko'okaa an issummuuyyi moo'llakko'okaa issehe. Xumma uwwoo Waa'i ki'nnuwwinne maqire ihookko.

¹⁰Lobakat ammaniinsi lasage ki'nnuwwi iina odim sawwimma amaddakko'i bikkina Waa'anne lobakata liiramoommo. Ki'nnuwwina makkimma hoogaate bagaan iina hara'mmitakkeena sawwimma uttakko'oyyo.

¹¹An eehid yoommok «Iina hanqataakko» yaateyyo. Mashka'oomim siixximmam ihukko, siixximma hoogimma duuha'i hundam losaammo.

¹²Hasisoo luwwa siixximmam, siixximma hoogimmam hasisoohaanniinsi hanaan ihaakkoo amaxxa amaxximmam la'aammo. An goddannem, sibaaronnem, lobakat amaxxannem, buxoomannem duuha'i hundannem «Iina yookkok ihookko» yimmi qaanqa losaammo.

¹³Kiristoos iina uwwoo malaayyinne hundem luwwam isseena xanoommo.

¹⁴Ihona bagaan ki'nnuwwi i hawwika baxxantakka'a siidanchi lobakata danaamo.

¹⁵ Filiphphisiyus beero'onne hee'llakkam amma'nnaano luxxeka mishiraachchi sagara kuraa Maqeedoo'n uulliinsi firummuuyyi ki'nnuwwiinsi bagaan mulli amma'nnaa'n wixxittuwwi uwwimmaannonnee a'llimmaannonnee shallaqqanchanne exxitobee'isa ki'nnuwwi laqqakkamo.

¹⁶ Eehanniinsim hanaan Tasalonqe'enne hee'ummuuyyi hawwi eesenne afu ammane mataaggiinsim lamaagge asse'llakko'i hara'mmat iina afaakko.

¹⁷Eehid yummok ki'nnuwwi iina uwwitakkam luwwa hasummi bikkinatte ihoo'n ki'nnuwwina yoo luwwi exxukkuuyyi maroo'isina hasummi bikkinatte.

¹⁸ Iina hasisoo luwwaa hasisoohaanniinsi hanaan ihaakkoo luwwaa Afiroodiixanne asse'llakko'oka aa'aammo. Oo asse'llakko'i luwwim danaamisa enje'oo kiti'mmisa Waa'i liiramaa aa'oohane.

¹⁹Ki'nnuwwina hasisoo luwwi hundam i Waa'i gabalbee'i ixxi goddiinsi Yesuus Kiristoos kollinne wonshaa uwwona.

²⁰Niyyanni Waa'ina heer heerinam lombi ihona! Aameen.

²¹Yesuus Kiristoosanne amma'nnimminne Waa'i minaadab ikko'i keenina hundinam xummaato hincaa'llehe. Iinninne maqire yo'i abbaayyuwwii

²²ka beyyonne yo'i Waa'i minaadabii hundim xummaato hincaa'llamuulla. Lophphaatim adi'l mi'n abaroos xummaato hincaa'llamuulla.

²³Yesuus Kiristoosik eroommi ki'nnuwwi hundinnem ihona! Aameen.