Read Hadiyya Qollaasiyaas Asso 1 Bible Online

Qollaasiyaas Asso 1 - Hadiyya bible

Qollaasiyaas Asso 1

¹Waa'i doo'llinne Yesuus Kiristoosina asse'amaanchi hee'ummi iinniinsi Phaawuloosiinsii niyyabbaayyi Ximootoosiinsii

²Kiristoosan ihimminne Waa'i minaadabaa amma'nnantakko'oo niyyabbaayyuwwaa ikkakka'a Qollaasiyaas beero'onne hee'llakkam keenina Niyyanni Waa'ik eroommii xummii ki'nnuwwina ihona.

³Neese ki'nnuwwina Waa'a uunxinoommi ammane ni Moollanni Yesuus Kiristoosika Anni Waa'a amman hundam galaxxinoommuulla.

⁴Mashka'oomim ki'nnuwwika Yesuus Kiristoosanne yoo amma'nnatoo Waa'i minaadab hundam iittitakkamisa macceensaammo.

⁵Oo ki'nnuwwik amma'nnatii iittii shooho'amookkok ki'nnuwwina iimanenne egeramaa yoo neeyyatinnette. Oo neeyyat hanqo'i mishiraachchi sagariinsi luxxeka macceessakko'ane.

⁶Oo mishiraachchi sagar ki'nnuwwi beyyo afaa Waa'ik eroommi hanqo'an ihukkisa qoossitakka'a macceessakko'i balliinsi ki'isaa ki'nnuwwi lambe'enne misha mishukkisaa li'ukkisaa uulli hundannem hanqinam misha mishoollaa li'oollaa.

⁷ Niinninne maqirem awwaadoo neese iittinoommi Eephphaafiriinsi ee woshsha macceessakko'ookko. Ixxi ni bikkenne Kiristoosina amma'nnamaakkoo awwaadaancho.

⁸Keesammi Ayyaan ki'nnuwwina uwwu iitti bikkinam ixxi niina kuraakko.

⁹Ee bikkina Keesammi Ayyaan uwwoo lachchinnee qoossimminnee Waa'i doo'llu luwwa guullitakka'a laqqakkamisina ee woshsha macceensummi balliinsi ki'insaa ki'nnuwwina Waa'a uunximma ullummoyyo.

¹⁰Uunxinoommokim danaam bax hundam baximminne misha mishshakku'uuyyii Waa'a la'immanne li'llakku'uuyyii Moollanna guullitakka'a liiransitakkeena ixxo laboo heechcha hee'llakkamisinatte.

¹¹Hundi luchchom malaayyi hundinnee liiranchinnee xantakkamisinaa iyyaqqitakkamisinaa Waa'i ixxaanninne lophphaakkoo lombaam malaayyinne hundinnem ki'nnuwwa qoxxisona.

¹²Caakki yoo adillanonne ikka'a ixxi minaadab a'llitam gulumma neesem baxxammoommisina issu Anni Waa'a galaxxehe.

¹³Tuunsi agiddaniinsi fissaa iittamaakkoo ixxi Beet adillanonne neese aagisaakko.

¹⁴ Niina tisso miqaa ni baaxiilo urukkok ee ixxi Beet kollinnette.

¹⁵Ixxim moo'amoobee'i Waa'ina qoocca. Qooccamu luwwi hundiinsim illageen ixxi hee'ukko.

¹⁶Iimanennee uullannee yoo luwwa moo'amoo luwwaa moo'amoobee'i luwwaa adilluwwam ihuta'n te'im gassaanom ihuta'n te'im daannuwwam ihuta'n te'im gassimmi malaayyi yoo keenom ihuta'n hundem luwwam qooccukkok Waa'i ixxennette. Luwwi hundim qooccamukkok ixxi kollinnettee ixxennettee.

¹⁷Luwwi hundiinsim illageen ixxi hee'ukko. Luwwi hundim ogoranne amaxxamaa yookkok ixxennette.

¹⁸ Ixxim ixxi orachchi ihu amma'nnaa'n wixxitina horoore. Luwwi hundinam ixxi luxxane. Luwwi hundinam luxxan iheena lehiinsi gaassaa ki'ukkokim ixxotte.

¹⁹Waa'im ixxek hinat hundim ixxi Beetonne hee'oo'isina iittukko.

²⁰ Ixxim iimanennee uullannee yoo luwwi hundam ixxi gaginne iittansukkok ixxi Beet kollinnette. Masqalanne saqalamaa lehu ixxi Beet xiiginnem xumma eebukko.

²¹Ki'nnuwwi eraare jora issimminnee ki'nnuwwi sawwitinnee Waa'iinsi annanni ikkakka'a ixxena maso'i hee'llakko'o.

²²Ihukkaarem kaba Waa'i ixxi illagenne keesantakko'oo keenoo miiqakkam luwwii haashaassoo luwwi bee'i keenoo issaa hincaa'eena ixxi Beet maara edde'aa lehaa iittansoo'isa issukko.

²³Oohim ihookkok mishiraachchi sagaranne macceessakko'i sooxxi eroommiinsi heekke'llakkoo'n amma'nnatonne qoxxitakka'a hee'llakko'aarette. Oo mishiraachchi sagarim uullanne yoo minaadab hundinam kuramaakko. An Phaawuloosim ee mishiraachchi sagarina awwaadaanchi ihummo.

²⁴Kiristoos ixxi orachchi ihu amma'nnaa'n bikkina hawwu hawwinne guullubee'i luwwa an guulleena yaa ki'nnuwwi bikkina hawwoommi hawwonne liiramoommo.

²⁵Ki'nnuwwina Waa'i sagara guullaa kuroommisina Waa'i iina ka awwaado uwwukkisam anim amma'nnaa'n wixxitina awwaadaanchi ihummo.

²⁶Oohim lobakat doollinaa qaranchinaa maaxamaa hee'u luwwa kaba Waa'i ixxi minaadabina la'isukko.

²⁷Maaxamu lombi yoo maassi mulli minaadaphphi lambe'enne hinkaa'n lombi yoohanda'e ihukkisa Waa'i ixxuwwina la'iseena iittukko. Oo lombi yoo maassim Kiristoos ki'nnuwwi woronne hee'immaa soodonne siixxinoommi lombaa.

²⁸Manni hundim Kiristoosanne li'oo'isina qooroom hundinnem qoxxinsummuuyyii losinsummuuyyii Kiristoos bikkina hundinam alallaantoommo.

²⁹An eekka issona Kiristoos iina uwwu malaayyinne hundinnem malaayyaamisa i woronne baxukkuuyyi yoohaanninne yakummuuyyi badaroommuulla.