Read Hadiyya Qollaasiyaas Asso 2 Bible Online

Qollaasiyaas Asso 2 - Hadiyya bible

Qollaasiyaas Asso 2

¹An ki'nnuwwina, Lodooqe'enne yo'i keeninaa eese moo'llobee'i keeninaa hundinam hinkaa'nna badarumda'e laqqakkona hasoommo.

²Oo an badarummok ixxuwwik tiir qoxxoo'isinatte, iittinne mat ikkamisinattee Waa'ika maaxamu luwwa hanqo'isa guullita'a qoossitamisinattee. Oo maaxamu luwwim Kiristoosatte.

³Waa'ik qooroo'mmekii lachchikii amaxxi hundim maaxamaa yookkok ixxonnette.

⁴An eekka yummok ayyim ki'nnuwwa huushisoo woshshinne qawwiisoobee'isinatte.

⁵An maarinne ki'nnuwwinne maqire hee'umbee'aarem sawwitinne ki'nnuwwinne maqire yoommo. Ki'nnuwwika ogoraam heechchaa Kiristoosanne qoxxitakka'a amma'nnitakka'a yoontakke'isaa moo'aa liiramoommuulla.

⁶Yesuus Kiristoosa Moollanni issitakka'a aa'llakko'isam ixxonne hee'llehe.

⁷Ixxonnem xapha issitakka'atii shooho'antakka'atii lossakko'i losa'nnisam amma'nnatonne qoxxehe. Waa'am lobakata galaxxehe.

⁸Ayyim ki'nnuwwa finaqaqinnee awwaad bee'i qawwiishshinnee huushisoobee'isa ege'llehe. Ookki Kiristoosiinsi waaraakkoohan ihoo'n manni losaniinsii ka uulli amaxxiinsii waaraakkoohane.

⁹Maara edde'u Kiristoosanne Waa'ik hinat hundoomim yoohane.

¹⁰Ki'nnuwwim ixxeensi wo'm heechcha siixxitakko'ookko. Adilluwwinaa gassaaninaa hundinam horoor ixxotte.

¹¹Ki'nnuwwim anginnette ihubee'i ballachchancha Kiristoosinne mat ihimminne ballachchantakka'a baaxiilaanchi maariinsi annanni ikkakko'ookko.

¹² Xammaqantakko'i ammanem ixxenne maqirem waammantakko'ookko. Kiristoosa lehiinsi ki'isu Waa'i baxu baxinne ixxenne maqirem amma'nnatinne ki'nnuwwim lehiinsi ki'llakko'ookko.

¹³ Baaxiilo baximminnee ki'nnuwwika baaxiilaanchi maara ballachchancha hoogimminnee letakko'oo keen hee'llakko'o. Ihukkaarem Waa'i Kiristoosinne maqirem heechcha uwwukkok ni baaxiil hundam urimminnette.

¹⁴ Neese karaa amadaa uullixxamoo kitaabamu See'l badanchom masqalanne saqalaa bi'isaa hoorukko.

¹⁵Kiristoos saqalanchinne daannuwwiinsii gassimmi malaayyi yoo keeniinsii malaayye hooraa ixxuwwa kaa'aa manni hundim ixxuwwi qeefadanto'isa moo'oo'isa issukko.

¹⁶ Ee bikkina ayyi manchim ichchi bikkina, aggi bikkina, uguxxi bikkina, aga'n aaggi bikkinaa Usheexxaxxi Ayyaa'm bikkinaa ki'nnuwwanne oogatoone.

¹⁷Oo keen hanenne waaroo luwwina xale'e kobi'lla. Ihukkaarem hanqo'i orachchoom Kiristoosatte.

¹⁸Ayyim «Ki'nnuwwi gaga hoffiissehe» yukkuuyyi, «Waa'i asse'amaanina otossitehe» yukkuuyyi, «Kaalta moo'oommane» yukkuuyyii qoossamoo'n yoo awwaad bee'i ixxi sawwitenne biramukkuuyyii ki'nnuwwa kora'a gatisoobee'isa ege'llehe.

¹⁹ Eehido'i manchi amma'nnaanina horoor ihu Kiristoosanne qoxxoo'n yoohane. Qaamafeet hundim nigginne edamaa mat ihaa li'oo'isam Waa'im ixxi mixa'nnisa amma'nnaa'n wixxitem mat issaa li'isookkok ee'isame.

²⁰Kiristoosinne maqirem letakka'a ka uulli manni losaniinsi annanni ikkakko'oohan ihulas kabad afeebe'em ka uulli mannisa mahina hee'llakkamuulla? Ka uulli manni ijaajindu mahina ijaajantakkamuulla?

²¹Oo ijaajim anginnem suuminnem amaddittee nakkitittee yoohane.

²²Oo hundim moo'isookkok awwaaxxakka'a lasage bi'oohan ihukkisa. Oo keenim xale'i manni ijaajoo losishshaa.

²³Oo ijaajjuwwi gaqqi sawwitinne issakkam luwwanne otossimmanne, awwaad bee'isinne gaga hoffiisimmannee gaqqi orachchom adaraassimmannee qooroom yookkoka labookko. Ihukkaarem maa'l mixano kaa'immina oo keen maham awwaadoobee'ane.