Read Hadiyya Qollaasiyaas Asso 3 Bible Online

Qollaasiyaas Asso 3 - Hadiyya bible

Qollaasiyaas Asso 3

¹Eehannata'i Kiristoosinne maqire lehiinsi ki'llakko'aa'lleensi Waa'i makkanne Kiristoos afuuraa yoo beyyonne iimanenne yoo luwwa hassehe.

²Ki'nnuwwika tiiro iimanenne yoo luwwanne issehe bagaan uullanne yoo luwwanne issitakkotte.

³Mashka'oomim ki'nnuwwi letakko'ookko. Ki'nnuwwi foorim Kiristoosinne maqirem Waa'i beyyonne maaxamaakko.

⁴Oo niina foore uwwu Kiristoos moo'amoo ammane ki'nnuwwim ixxenne maqirem lombinne moo'antakkamo.

⁵Ee bikkina ki'nnuwwi woronne yoo luwwa oohim saa'imma, adabi'imma, saa'immi mixano, jor mixanoo Waa'i bikkenne otossakkam luwwa miximmaa ki'nnuwwi woriinsi fissitakka'a hoollehe.

⁶Eehido'i bax xooxinne Waa'ik quunqi waarookko.[1]

⁷Ki'nnuwwim eraare ee bax woronne hee'llakko'i ammane eekka issitakkam hee'llakko'o.

⁸Ihukkaarem kaba quuqimma, nadadimma, hantaaro, game'llanchaa tuussiisoo woshshaa hundam ki'nnuwwi woriinsi fissitakka'a hoollehe.

⁹Moosir mannooma ixxi baxinne sheelattakka'a ubbuussakko'isa laqqakka'a ki'nnuwwina'i ki'nnuwwim qophphano woccakkotte.

¹⁰Qooccaanchi kobi'llanne daba'llukkuuyyi lachchinne haareechchi ihukkuuyyi maroo mannooma edde'llakko'ookko.

¹¹Eehannonne Giriika yimmi, Yihuda yimmi, ballachchamaakkoohane yimmi, ballachchamubee'ane yimmi, mulli uulli mancho yimmi, allaggichcho yimmi, agido yimmii wolaba yimmii bee'e. Mashka'oomim Kiristoos hundamee hundannettemee.

¹² Waa'i ki'nnuwwa keesantakko'oo keenoo iittantakko'oo keenoo issaa doo'llu bikkina qishixxato, eroomma, gaga hoffiisimma, maashaalloomaa iyyaqqimmaa eddechchisa edde'llehe.

¹³ Moollanni ki'nnuwwika baaxiilo haafukkisam mat mato hawwoduta'n ki'nnuwwina'i ki'nnuwwim iyyaqqimminne haafaqqammehe.

¹⁴ Ee hundiinsim loboka hundem luwwam karaa amadoo iitto edde'llehe.

¹⁵Hanqinam ki'nnuwwa mat orachchi issaa Waa'i weeshu bikkina Kiristoos uwwu xummi ki'nnuwwa awwonsona. Waa'am galaxxitakkam keen ikkehe.

¹⁶ Kiristoosik sagar ki'nnuwwanne wo'mmaa hee'ona. Ki'nnuwwina'i ki'nnuwwim qooroominne hundinnem losixxammehee soqqammehee. Galaxxi mazmuura, lombi mazmuulluwwaa keesamaakkoo mazmuulluwwaa ki'nnuwwi wodanonne Waa'a galaxxitakku'uuyyi zammallehe.

¹⁷Wocinnette ihukko te'im baxinnette ihukko issitakkam luwwi hundam Moollanni Yesuus summinne issehe. Anni Waa'am ixxi kollinne galaxxehe.

¹⁸Are, Moollannanne amma'nnu keenina laboohan ihu bikkina ki aro'ina ijaajame.

¹⁹ Aro'o, ki are iitte bagaan isena mogaalli ikkitte.

²⁰Ooso, Moollanna liiransoohan ihu bikkina ki'nnuwwi anno'inaa amo'inaa hundi luwwannem ijaajammehe.

²¹Anno'o, ki'nnuwwik oos tiiro bi'oobee'isina laboobee'isinne quuqqakkotte.

²²Agido, ka uullanne yo'i ki'nnuwwi moollanno'ina hundem luwwannem ijaajammehe. Ijaajantakkamokim manni moo'aa liiramonatte ihoo'n Moollanna badditakku'uuyyi er wodaninne ijaajammehe.

²³Baxxakkam bax hundam manninatte ihoo'n Moollannina awwaaddakkamaannisa issitakka'a wodaninne baxxehe.

²⁴Eekka issitakkamok ki'nnuwwi awwaaddakkamok Moollanni Kiristoosatte ihu bikkina Moollanniinsi heechchi irifo'i gulumma a'llitakkamisa laqqehe.

²⁵Jora baxookkok ee jor baxisam siixxookko. Waa'i ayyenam golo'ooyyo.