Read Hadiyya Qollaasiyaas Asso 4 Bible Online

Qollaasiyaas Asso 4 - Hadiyya bible

Qollaasiyaas Asso 4

¹ Moollanno'o, ki'nnuwwinam Moollanni iimanenne yoo'isa laqqakka'a ki'nnuwwi agido hanqo'isinnee laboo'isinnee ijaajjehe.

²Baqitakka'a Waa'a galaxxitakku'uuyyi muttakka'a uttakkambee'isa Waa'i uunxatonne qoxxehe.

³An ixxi bikkina karamaa yoommi Waa'i sagara oohim Kiristoosika maaxamu luwwa kulloommisina Waa'i niina googo fooqaa'oo'isina ni bikkina Waa'a uunxehe.

⁴Eekkam laboo'isinne caakkisaa kuroommisina iina Waa'a uunxehe.

⁵ Ki'nnuwwina makku amman hundam awwaaxxitakku'uuyyi amma'nnubee'i manninne qoorimminne hee'llehe.

⁶Manni hundinam hinkid dabarimmi hasisooda'e laqqakkamisina hundi ammanem ki'nnuwwik woshshi eran ihaa sooqixxisa xee'ona.

⁷ Tiikiiqoos ki'nnuwwina i duuha'i hundam kurookko. Ixxi iittamaakkoo abbaayyo, amma'nnamaakkoo awwaadaanchoo Moollannina iinninne maqirem awwaadaanchoo.

⁸An ixxo ki'nnuwwi beyyo asse'ummok neese hinkid yoomminda'e laqqakkamisinattee ixxim ki'nnuwwa qoxxisoo'isinattee.

⁹ Amma'nnamaakkoo iittinoommi niyyabbaayyi Anaasimoosam ixxenne maqirem asse'aammo. Ixxi ki'nnuwwaneme. Ka beyyonne ihu luwwi hundam ixxuwwi ki'nnuwwina kuttamo.

¹⁰ Iinninne maqirem karamu Arisxirookoosii Baarnabaasina annabbaayyi beet Maarqoosii xummaato asse'llo'ookko. Ixxi bikkina eraarem kurummi Maarqoosim ki'nnuwwi beyyo waarulas aa'llehe.

¹¹Odim Yoosxoosa yamamoo Iyyaas xummaato asse'aakko. Waa'i adilla'n bikkina iinninne maqire awwaaddam keen Ayihuxxi manniinsi xale'i ixxuwwa. Ixxuwwim eese qoxxisso'oo keeno.

¹² Yesuus Kiristoosina awwaadoo Ephphaafirim xummaato asse'aakko. Ixxi ki'nnuwwaneme. Odim ki'nnuwwi amma'nnatonne qoxxitakka'a hee'llakkamisinaa Waa'i issoo luwwi hundam qoossitakka'a laqqakkamisinaa Waa'a uunxoo amman hundam ki'nnuwwinam edaa wodaninnem uunxoohane.

¹³Ixxi ki'nnuwwina, Lodooqe'enne yo'i keeninaa Heerafiloosanne yo'i keeninaa lobakata badarukkisa an kuroommo.

¹⁴ Iittamaakkoo akiinchi Luqaasii Deemaasii ki'nnuwwina xummaato asse'llo'ookko.

¹⁵Lodooqe'enne yo'i amma'nnaan abbaayyuwwina, Nimfa'anaa is minenne wixxitam amma'nnaaninaa xummaato kullehe.

¹⁶Ka assi kitaaba ki'nnuwwi qananaa'llakka'a lasage Lodooqe'enne yo'i amma'nnaaninam qanannaatamona. Ki'nnuwwim Lodooqe'enne yo'i amma'nnaanina kitaabamu assi kitaaba qananaa'llehe.

¹⁷ «Moollanni kiina uwwu awwaado guulle» yitakka'a Arkiphaasina kullehe.

¹⁸Ka xummaato kitaabummok an Phaawuloos i gagame. An karamummisa xaddakkotte. Waa'ik eroommi ki'nnuwwinne maqire ihona.