Read Hadiyya 1Tasalonqe'i Asso 1 Bible Online

1Tasalonqe'i Asso 1 - Hadiyya bible

1Tasalonqe'i Asso 1

¹ Niyyanni Waa'annee Moollanni Yesuus Kiristoosannee ikkakko'i Tasalonqe'enne hee'llakkam amma'nnaanina Phaawuloos, Sillaasii Ximootoosii asse'llo'i asso. Ki'nnuwwina eroommii xummii ihona.

²Neese Waa'a uunxinoommi amman hundam ki'nnuwwi hundi bikkinam hundem ammanem Waa'a galaxxinoommuulla.

³Ki'nnuwwika amma'nnaxxi baxo, iittinne badattakkam badallatoo ni Moollanni Yesuus Kiristoosanne yoo qoxxaalli neeyyatoo Niyyanni Waa'i illagenne sawwinoommuulla.

⁴Waa'i iittoo niyyabbaayyuwwa, Waa'i ki'nnuwwa doo'llukkisa lanqaammo.

⁵Neese mishiraachchi sagara ki'nnuwwina amandaa waallummok malaayyinnettee Keesammi Ayyaaninnettee guullinaa amma'nnimminnette bagaan xale'i sagarinne ki'nnuwwi beyyo waallummoyyo. Ki'nnuwwinne maqire hee'nnummi ammane ki'nnuwwi bikkina yinaa hinkid hee'nnumda'e laqqakkamo.

⁶ Ki'nnuwwanne lobakat hawwi afukkaarem Keesammi Ayyaan uwwu liiranchinne Waa'i sagara aa'llakko'i bikkina neesee Moollannaa labbakkam keen ikkakko'ookko.

⁷Ee bikkina ki'nnuwwi Maqeedoonannee Akaayannee yo'i amma'nnaan hundinam kobi'llishshi ikkakko'ookko.

⁸Ki'nnuwwi kuttakko'i Waa'ik sagar xale'i Maqeedoonannee Akaayannee uullaa gatukkoyyo. Ihukkaarem Waa'anne yoo ki'nnuwwik amma'nnat beyyi hundam afaakko. Neese ee bikkina maham kurimmi hasisooyyo.

⁹Ki'nnuwwi beyyo waallummi ammane ki'nnuwwi neese erisa aa'llakko'isaa Waa'i bikkenne mulluwwina awwaadimma uttakka'a hee'oohaanninaa hanqo'i Waa'inaa awwaaddakkeena daba'llitakko'isaa ki'nnuwwi bikkina kuttamuulla.

¹⁰Odim iimaniinsi waaru Waa'i Beet Yesuusam egettakkamisa kuttamuulla. Ixxim Waa'i lehiinsi ki'isukkanee waaroo Waa'i quunqiinsim gatisukkanee.