Read Hadiyya 1Tasalonqe'i Asso 2 Bible Online

1Tasalonqe'i Asso 2 - Hadiyya bible

1Tasalonqe'i Asso 2

¹Iyyabbaayyuwwa, neese ki'nnuwwi beyyo waarimmi kora'atte ihubee'isa ki'nnuwwi gagim laqqakkamo.

² Ki'nnuwwi laqqakkamisam kanniinsi illageenim neese Filiphphisiyus beero'onne hawwisakko'ookkoo sholliisakko'ookkoo. Ihukkaarem lobakata sabakkonam Waa'ika mishiraachchi sagara ki'nnuwwina kulloommisina Waa'i niina iggimma uwwukko.

³Neese ki'nnuwwa songummi sogitan huushanchiinsi te'im jor sawwitiinsii qawwiishshiinsii waarubee'ane.

⁴Ihona bagaan Waa'i neese amma'nnaa mishiraachchi sagara yabo uwwu bikkina ni wodano saarayyaa moo'oo Waa'a liiransineena woncoommo bagaan manna liiransineena woncoommoyyo.

⁵Eekka Waa'im la'oo'isanne qawwiisimminne te'im mat luwwa siixximmi mixano maaximminne hore'em woncumbee'isa laqqakkamo.

⁶Neese Kiristoosina asse'amaan inkummisinnem manniinsi oohim ki'nnuwwiinsi te'im mulli keeniinsi lomba siixximmi xansiisoohan hee'ukko. Ihukkaarem siixxineena hansummoyyo.

⁷Ooso li'issam meentichcho iseka ooso erisa abooyyitamisam ki'nnuwwa abooyyinummo.

⁸Ki'nnuwwa lobakata iittinummi bikkina Waa'ika mishiraachchi sagara kurimmi xale'i ihoo'n ni foorem yakkota'n ki'nnuwwina higinsaa uwwineena gundaa hee'nnummo.

⁹Niyyabbaayyuwwa, neese Waa'ika mishiraachchi sagara kullummuuyyi «Ki'nnuwwanne matonnem kee'mminoommoyyo» yimminne ballaa hiimoo badallummuuyyii yakinummuuyyii banxummisa laqqakkamo.

¹⁰Amma'nnitakko'i kee'n beyyonne hinkido'i muccuroominne, xabbeenoominnee miiqakkambee'isinnee hee'nnummisa ki'nnuwwii Waa'ii laqqakkamo.

¹¹Qachchina anni issoo'isa neesem ki'nnuwwa annannichchom songummuuyyi, qoxxinsummuuyyii ijaanjummuuyyii

¹²ixxi adillaninaa lombinaa weeshu Waa'ina laboo heechcha hee'llakkamisa issinummisa laqqakkamo.

¹³Neese hundem ammanem Waa'a galaxxinoommi mashka'i kane; Waa'i sagara niinniinsi ki'nnuwwi macceessakko'i ammane hanqo'i Waa'i saga'llisa issitakka'a aa'llakko'o bagaan manni saga'llisa issitakka'a aa'llakko'oyyo. Oohim amma'nnitakko'i ki'nnuwwanne baxukkuuyyi yoohane.

¹⁴ Niyyabbaayyuwwa, Yesuus Kiristoosanne amma'nnitakka'a Waa'i minaadab ikko'i Yihuxxi uullanne yo'i amma'nnaano labbakko'ookko. Mashka'oomim ixxuwwi Ayihuxxi manniinsi hawwo aa'llo'isam ki'nnuwwim ki'nnuwwi uulli manniinsi hawwo aa'llakko'ookko.

¹⁵ Oo Ayihuxxi manni Moollanni Yesuusaa hiraagaanoo shito'ookko. Odim neesem uulliinsi hollito'ookko. Waa'am kichche'issamuulla. Manni hundinnem uullixxantamuulla.

¹⁶Mulli minaadab gattamisina mishiraachchi sagara kulloombee'isa hoorimminne amman hundam gabal bee'i baaxiilo baxxamuulla. Lasaanchonne Waa'ik quunqi ixxuwwanne dillaakko.

¹⁷Niyyabbaayyuwwa, tiirinnette ihoo'n maarinne hofqax ammanina ki'nnuwwiinsi annanni inkummaanniinsi ki'isaa ki'nnuwwika ille odim moo'nneena lobakata qulunxaammo.

¹⁸Ki'nnuwwi beyyo waalleena hansaa hee'nnummo. An i gag Phaawuloosim ki'nnuwwi beyyo daba'llaa waareena mataagge ihoo'n lobakat ammane hasaa hee'ummo. Ihukkaarem Sheexaanchi waalloombee'isa qolaa hoorukko.

¹⁹Lasaanchonnem neese Moollanni Yesuus waaroo ammane siixxinoommi neeyyat, liiranchii ixxi illagenne bakke'nnoommi kaachchi mare'ii ki'nnuwwayyonnihe?

²⁰Hanqinam ki'nnuwwi niina lombaa liiranchaa.