Read Hadiyya 1Tasalonqe'i Asso 3 Bible Online

1Tasalonqe'i Asso 3 - Hadiyya bible

1Tasalonqe'i Asso 3

¹ Kanniinsi eehid iyyaqqineena xannumbee'i bikkina Atee'n beero'onne mullam lasonne ganteena sawwite mullaa

²amma'nnatonne ki'nnuwwa qoxxisoo'isinaa sogoo'isinaa niinninne maqire Kiristoosika mishiraachchi sagara kurookkoka Waa'ina awwaadaanchi niyyabbaayyi Ximootoosa ki'nnuwwi beyyo asse'nnaammo.

³Oohim ka hawwonne ayyim heekke'oobee'isinatte. Hawwim niina saam ihukkisa ki'nnuwwi gagim laqqakkamo.

⁴Neese ki'nnuwwinne hee'nnummi ammane hawwi neesenne afoo'isa gaassinaatim ki'nnuwwina kullaa hee'nnummo. Ki'nnuwwi laqqakkamisam oo hawwi neesenne afaakko.

⁵Ee bikkina lobakat ammane iyyaqqeena xanimma hoogummi bikkina ki'nnuwwika amma'nnato la'eena hasaa ixxo ki'nnuwwi beyyo asse'ummo. Asse'ummokim ayyi la'ukko «Sheexaanchi ki'nnuwwa keenaa niikka badallato kora'i issookko» yaa baddaammatette.

⁶ Ihukkaarem kaba Ximootoos ki'nnuwwi beyyiinsi ni beyyo waaraa ki'nnuwwi amma'nnaxxi bikkinaa iitti bikkinaa er woshsha niina kuraakko. Odim neese ki'nnuwwa moo'nneena qulunxoommisam ki'nnuwwim hundem ammanem neese moo'llakkeena quluxxakkamisaa eroomminne sawwitakkamisaa kuraakko.

⁷Ee bikkina niyyabbaayyuwwa, neesenne afu kichchechchannee hawwonnee hundannem ki'nnuwwi amma'nnatinne ki'ukkok neese qoxxinaammo.

⁸Mashka'oomim Moollannanne ki'nnuwwi qoxxitakka'a hee'immi niina heechcha.

⁹Ki'nnuwwi bikkina neese Waa'a galaxxinoommo. Galaxxinoommokim Waa'i illagenne niina ki'nnuwwi bikkina yoo liiranchi bikkinatte.

¹⁰Ballaa hiimoo qoxxinaa Waa'a uunxinoommuullakim neese ki'nnuwwa ni illinne moo'nneenattee ki'nnuwwi amma'nnatonnem hanqatu luwwa wonshineenattee.

¹¹Kaba niyyanni Waa'i ixxi gagii ni Moollanni Yesuus Kiristoosii ki'nnuwwi beyyo waalloommisina ni googo xabbaa'aa awwonsona.

¹²Neese ki'nnuwwa iittinoommisam ki'nnuwwina'i ki'nnuwwim iittantakkam iitto manni hundam iittitakkam iitto ni Moollanni edonaa lonsonaa.

¹³Ee'isinne ni Moollanni Yesuus ixxi minaadab hundinnem maqirem waaroo ammane ki'nnuwwa qoxxisaa Niyyanni Waa'i illagenne muccuraa miiqakkam luwwi bee'anee issaa uullisookko.