Read Hadiyya 1Tasalonqe'i Asso 4 Bible Online

1Tasalonqe'i Asso 4 - Hadiyya bible

1Tasalonqe'i Asso 4

¹Niyyabbaayyuwwa, Waa'a liiransitakku'uuyyi hinkid hee'llakkamda'e niinniinsi lossakko'ookko. Kabadem Moollanni Yesuus summinne ki'nnuwwa uunxinoommokii songoommokii kanniinsi illageen issitakku'uuyyi yoontakke'isam eddakka'a eddakka'a issitakkamisinatte.

²Mashka'oomim Moollanni Yesuus kollinne inkaa ki'nnuwwina hinkido'i gatti ogora uwwinumda'e laqqakkamo.

³Waa'ik doo'l saa'immiinsi qee'llitakka'a keesantakkamisinatte.

⁴Ki'nnuwwiinsi annannichchim ixxi gaqqi orachcho muccuroominnee lombinnee hinkid egerooda'e la'ona.

⁵Waa'a laqqambee'i jor minaadaphphisa ikkakku'uuyyi saa'imma mixxakkotte.

⁶Eehido'i woshsha ki'nnuwwina gaassinaatim qoxxinsaa kullummisam ayyim ixxi abbaayyo baaxiilonne ubbuusaakkoohanee huushisaakkoohanee ihulas ee woshshina hundinam Waa'i baado miqisookko.

⁷Waa'i neese weeshukkok muccuroominne hee'nnoommisinatte bagaan haashaarammummuuyyi hee'nnoommisinatteyyo.

⁸Eehannata'i ka ijaajo sabookkok ayyim manna sabaakkoohan ihoo'n ixxeka Keesammi Ayyaana ki'nnuwwina uwwoo Waa'a sabaakkoohane.

⁹Ki'nnuwwina'i ki'nnuwwim iittantakkamisa Waa'iinsi lossakko'i bikkina abbaayyuwwa iittimmi bikkina ki'nnuwwina ayyim kitaabimmi hasisooyyo.

¹⁰Hanqo'isam Maqeedoonanne hundannem yo'i abbaayyuwwi hundam iittitakkamo. Iyyabbaayyuwwa, eddakka'a eddakka'a iittantakkamisina qoxxinsaa songoommo.

¹¹Odim ishitiggitakka'a hee'llakkamisinaa ki'nnuwwi gaqqi baxom baxxakkeena sawwitakkamisinaa kanniinsi illageen ijaanjummisam ki'nnuwwi anginnem baxxakkamisina songoommo.

¹²Ee'isinne amma'nnubee'i kee'n beyyonne lombi yoo keen ikkakkamo. Odim ki'nnuwwina hasisoo luwwina ayyennem bakke'llakkoo'n ki'nnuwwi gaga xantakka'a hee'llakkamo.

¹³Niyyabbaayyuwwa, soodbee'i kee'nnisa kichche'llakkambee'isina leto'i kee'n bikkina hanqo'i woshsha laqqakkona hansoommo.

¹⁴Yesuus lehaa lehiinsi ki'ukkisa neese amma'nninoommo. Ee'isam Yesuusanne amma'nnita'a leto'i keenom Yesuusinne maqirem Waa'i worookko.

¹⁵ Moollanni ixxi gagim kurukkisam neesem kulloommok kane. Oohim Moollanni waareebe'i afeebe'e foorinne hee'nnoommi keen leto'i keeno gaassinoombee'isa ki'nnuwwina kulloommo.

¹⁶Ee ammane ijaacci sagar, Waa'i asse'amaa'n awwonsaanchi sagarii Waa'i xurumbulli sagarii macceesamookko. Moollanni ixxi gagim iimaniinsi dillookko. Kiristoosanne amma'nnita'a leto'i keenim gaassita'a ki'llamo.

¹⁷Ee lasage neese foorinne hee'nnaa gantummi keen Moollanna hafachchanne aa'nneena ixxuwwinne maqirem duubanne filloommo. Ee'isinne neese hundem ammanem Moollanninne maqirem hee'nnoommo.

¹⁸Ee bikkina ki'nnuwwina'i ki'nnuwwim ee sagarinne qoxxixxammehe.