Read Hadiyya 1Tasalonqe'i Asso 5 Bible Online

1Tasalonqe'i Asso 5 - Hadiyya bible

1Tasalonqe'i Asso 5

¹Niyyabbaayyuwwa, oo luwwi hinka'i ammanennee hinka'i doollennee ihooda'e ki'nnuwwina maham kitaabimmi hasisooyyo.

² Mashka'oomim Moollanni waaroo ayyaam hiimonne waaroo gamaanchisa ihaa waaroo'isa ki'nnuwwi gagim guullitakka'a laqqakkamo.

³Manni luwwi hundim «Xumma, meegaa meechchaataa» yihonam lamfoor meentichcho xuuchchi amadoo'isa dangonnem bichchi ixxuwwanne ubookko. Ixxuwwi eehanniinsi hore'em xottamoyyo.

⁴Iyyabbaayyuwwa, ihukkaarem oo ayyaam ki'nnuwwa gamaanchisa amaadoobee'isa ki'nnuwwi tuunsi woronneyyo.

⁵Mashka'oomim ki'nnuwwi hundim caakkinaa ballinaa ooso. Neesem hiimina te'im tuunsina oosoyyo.

⁶Ee bikkina neese baqinaa gaga ege'llinona bagaan mulli kee'nnisa diriilloone.

⁷Diriittam keen hiimonne diriittamo; dimbitam keenim hiimonne dimbitamo.

⁸ Ihukkaarem neese caakkiinsette inkummi bikkina gaga ege'llinaa hee'nnona. Amma'nnatoo iittoo biqenne issakkam o'l mu'uxxisa issaqqinona. Gatimmi neeyyatom xaa'l qoobe'isa ni horoorenne issinona.

⁹Waa'i neese doo'llukkok bi'iseenatte ihoo'n ni Moollanni Yesuus Kiristoos kollinne gantoommisinatte.

¹⁰Ixxi niina yaa lehukkok neese hee'nnummom te'im lenummom ixxenne maqirem hee'nnoommisinatte.

¹¹Ee bikkina kaba issitakkamisam ki'nnuwwina'i ki'nnuwwim qoxxixxammehee hara'mmammehee.

¹²Niyyabbaayyuwwa, ki'nnuwwi lambe'enne badattam keeno, Moollanni kollinne ikka'a gassitam keenoo soggam keenoo lonsitakkamisina uunxinoommo.

¹³Ixxuwwi baxxam bax bikkina yitakka'a iittinne ixxuwwa lobakata lonsehe. Ki'nnuwwi lambe'ennem xummi hee'ona.

¹⁴Niyyabbaayyuwwa, ki'nnuwwa songoommok ceemmaalluwwa axeettakkamisinatte. Badditam keen iggitamisa issitakkamisinatte, hoogu keeno hara'mmitakkamisinattee manni hundikam iyyaqqitakkamisinattee.

¹⁵Ki'nnuwwiinsi ayyim jorina jora dabaroobee'isa ege'llona; ihukkaarem hundem ammanem mat mullaannina eroka issimma hasona. Ee'isam manni hundinam eroomma issitakkeena hassehe.

¹⁶Hundi ammanem liirammehe.

¹⁷Hundi ammanem Waa'a uunxehe.

¹⁸Duuha'i hundinnem Waa'a galaxxehe. Yesuus Kiristoosanne ikkakko'i bikkina Waa'i ki'nnuwwiinsi hasookkok eehane.

¹⁹Keesammi Ayyaa'n baxo ifiissakkotte.

²⁰Kuramoo Waa'i sagaram gaddakkotte.

²¹Ihukkaarem hundem luwwam keentakka'a moo'llakka'a eroka qoxxissakka'a amaddehe.

²²Jor luwwi hundiinsi qee'llehe.

²³Xumma uwwoo Waa'i ixxi gagim ki'nnuwwa hundisinnem muccussona. Moollanni Yesuus Kiristoos waareebe'i afeebe'e ki'nnuwwika tiiro, fooree orachchoo miiqakkam luwwi bee'i muccur issaa egerona.

²⁴Ki'nnuwwa weeshukkok amma'nnamaakkoohan ihu bikkina eekka issookko.

²⁵Iyyabbaayyuwwa, niina Waa'a uunxehe.

²⁶Amma'nnaan hundam er suunqanchinne xummaatissehe.

²⁷Ka asso amma'nnaanina hundinam qananaa'llakkamisina Moollanni summinne yabo uwwaammo.

²⁸Ni Moollanni Yesuus Kiristoosik eroommi ki'nnuwwinne maqire ihona.