Read Hadiyya Iyyaas Kitaaba 11 Bible Online

Iyyaas Kitaaba 11 - Hadiyya bible

Iyyaas Kitaaba 11

¹Hasoo'l adil Yaabine Isra'eel kaa'llo'isa Macceesu ammanenne Maadoo'n adi'l Yoobaab beyyo, Shiimiroo'n adi'l beyyo, Akshaaf adi'l beyyoo

²Hanaa'n qarinne yoo duu'n uullannee Galii'l Dambalaqiinsi woroo'n qaranne Yoordaanoos cebbanne yoo qaala'annee duunnuwwiinsi woroon yoo Door beero'i gadanonnee Meedeteraaniyaa'n tochchonne hee'llam adilluwwi beyyoo asse'ukko.

³Odim Yoordaanoos Daajjiinsi eelliinchi firinnee aagoo kollinnee yoo Kana'aa'n adi'l beyyo, Keexe'i adi'l beyyo, Hiite'i adi'l beyyo, Farze'i adi'l beyyo, duu'n uullanne yoo Iyyaabuus adi'l beyyoo Armoo'n Duuniinsi woroon Misiphphanne yoo Hiiwe'i adi'l beyyoo asse'ukko.

⁴Oo keenim ixxuwwi gaadaaninne hundinnem lobakat gogot ikka'a faradinnee faraxxi gaarre'innee fitto'o. Oo gogotim xigakka'a xanakkambee'i wo'i woro'l shashsha'llisa lobakat hee'ukko.

⁵Oo adilluwwi hundim malaayye mat issita'a Isra'eela qasimmina Meeroo'm Wo'i gadanonne wixxito'o.

⁶Waa'im Iyyaasina «Soodo kido'i ammanenne ixxuwwa hundam leeshisa issaa Isra'ee'l anganne higisaa uwwoommi bikkina baddititte. Atim ixxuwwi faraxxekam mogole'i nigga muttootto; faraxxi gaarre'uwwam giirinne shokkiissootto» yukko.

⁷Ee bikkina Iyyaasii ixxenne maqire hee'llo'i gaadaanii hundim dangonnem Meeroo'm Wo'i beyyo waatta'a ixxuwwinne ubbo'o.

⁸Waa'im Isra'ee'l anganne ixxuwwa higisaa uwwu bikkina Isra'eel ixxuwwa kaa'llo'i hanaa'n qarinnem lob Siidoo'n beero'oo Misirafootaa Mayyimaa afeebe'e eelliinchi firinnem Misiphphi cebbanne afeebe'e hollitu'uuyyi matom gatissoo'n shito'o.

⁹Iyyaasim Waa'i ijaajukkisannem faraxxeka mogolle'i nigga murukko. Faraxxi gaarre'uwwam giirinne shokkiisukko.

¹⁰Ee ammanem Iyyaas laso daba'llaa Hasoo'l beero'o ammadukko. Hasoo'l adilam bisa'inne shukko. Hasoor hundiinsim malaayyaam beero'i hee'ukko.

¹¹Ixxuwwim ee beero'onne yoo luwwi hundam bisa'inne guullita'a shito'i bikkina foor yoo luwwik ma'llichchim gatukkoyyo. Beero'oomam giirinne shokkiisso'o.

¹²Waa'ina awwaadaanchi Muse'e ijaajukkisannem Iyyaas ee adilluwwi beero'uwwaa ee beero'uwwi adilluwwa hundam amadaa qare'aal bisa'inne matim gatoobee'isa aphphisaa bi'isukko.

¹³Isra'eelim Iyyaas shokkiisu Hasoo'l beero'iinsi bagaan duunnuwwanne hee'u beero'uwwika matom shokkiisso'oyyo.

¹⁴Isra'eel Iyyaas shokkiisu Hasoo'l beero'uwwika awwaadoo mu'uttuwwaa fooraam diinatee ixxuwwi gagina bogga'a massito'o; ihukkaarem manni hundam matom gatissoo'n bisa'inne shita'a guullito'o.

¹⁵Waa'i ixxena awwaadaanchi Muse'e ijaajukkisam ee'isam Muse'e Iyyaaso ijaajukko. Waa'i Muse'e ijaaju jjaacceka ma'llichchom gatisoo'n Iyyaas hundam guullaa issukko.

¹⁶Iyyaas duu'n uulla duuniinsi woroon hanaa'n qarannee woroo'n qarannee yoo uula, Yoordaanoos cebbi uulla, Gooshee'm ullaa Goosheemiinsi woroo'n qaranne yoo udma'i uullaa hundam amadukko.

¹⁷Odim woroo'n qarinne Eedoo'm gadanonne yoo Halaq Duuniinsi ki'isaa Hermoo'n Duuniinsi woroo'n Liibaanoos cebbanne yoo Ba'aaligaad beero'onne afeebe'e hee'llam adilluwwinne hundinnem Iyyaas lobakat doolle oramimminne ixxuwwa amadaa shaa gullukko.

¹⁹Gaba'oonanne hee'llo'i hooffi qax Hiiwwe'i manniinsi bagaan Isra'ee'l minaadabinne iitanta'a hee'lleena hasso'i beero'i manni matichchim bee'e. Isra'ee'l mulli beero'uwwi hundam qasanchinne kaa'lla'a amaddo'o.

²⁰Waa'i Muse'e ijaajukisannem Isra'ee'l minaadab matem qishixatambee'isa guullita'a bi'isamisina ee beero'uwwanne hee'llam minaadab Isra'eelinne orantona Waa'i ixxuwwikka wodano qoxxisukko.

²¹Ee ammanenne Iyyaas maraa hundem duu'n uulliinsim Keebirooniinsi, Dabiiriinsi, Anaabiinsii ee'isam Yihudannee Isra'eelannee yoo duunaam uullanne hundannem hee'llam Anaaq ooso ixxuwwi beero'uwwannem bi'isukko.

²²Anaaq oosik Gaaza'annee Gaatannee Ashdoodannee hofqaxim gatukko bagaan Isra'ee'l uullanne matim gatukkoyyo.

²³Waa'i Muse'ena kurukkisannem Iyyaas uullooma hundam amadukko. Iyyaasim Isra'ee'l minaadab hundim uullooma lago aa'llona sullinne sullinnem baxansaa uwwukko. Ee lasage Isra'ee'l minaadab qasanchiinsi usheexxito'o.