Read Hadiyya Iyyaas Kitaaba 13 Bible Online

Iyyaas Kitaaba 13 - Hadiyya bible

Iyyaas Kitaaba 13

¹Iyyaasu, lobakata loma'nnitaatto. Ihukkaarem lobakat amadamiu'i bee'i uulli yookko.

²Gatukkokim Filisxee'm uulli hundanne, Gashuu'l uulli hundamee

³Gibxiinsi eelliinchi firinne yoo Shihoo'l daajjiinsi ki'isaa hanaa'n qarinne Eqiroo'n gabal afeebe'e yoo uullannee hundamem Kana'aa'n uullanne exxaa filisxee'm ontem gassaanim hee'llo'i beero'uwwa. Ookeenim Gaaza'a, Ashdooda, Asqaloona, Gaataa Eqiroonaa ihukkuuyyi woroo'n qarinnem Awiimaa yakkam uulli afeebe'e hee'ukko.

⁴Woroo'n qarinnem Kana'aa'n uulli hundaa Siidoo'n minaadaphphan hee'u Ma'aara'a edaa Amoore'i gabalanne yoo Aafeeq afeebe'e.

⁵Odim Geebaa'l manni uullaa eelliichchi firoo kollinnem Hermoo'n Duuniinsi woroo'n kollonne yoo Ba'aalgaadiinsi ki'isaa Haamaata aagakkam gooc afeebe'e yoo Liibaanoos uulli hundaa;

⁶Liibaanoosiinsi ki'isaa Miisiraafotimaayim afeebe'e duun uullanne hee'llam mannaa Siidoo'n minaadabaa hundam edaa Isra'ee'l oos illagiinsi holloommo. An keese ijaajummisannem uullooma hundam Isra'eelina lago aa'llona baxxanse.

⁷Ee uulloomam honsem sullinaa sulli kollinaa lago aa'llamisina baxxanse» yukko.

⁸Waa'ina awwaadaanchi Muse'e uwwukkisannem Minaas sullik kolli, Roobeel sullii Gaad sullii Yoordaanoos Daajji eeqidonne eelliinchi firinne yoo uulla lago aa'llo'o.

⁹Uulloomim Arnoo'n Cebbina tochchonne yoo beero'iinsi ki'isaa Medabaa'iinsi Diiboonanne afeebe'e yoo hansawwi uulli hundam edookko.

¹⁰Haseeboonannetti ihaa gassoo Amoore'i adil Siihoon beero'uwwa hundam edaa Amoo'n minaadaphphi uullinne gaba'llamookko.

¹¹Ee'isam Gaala'aaxxekaa Gashuurikaa Maa'ikaa'n uullaa Heermoo'n Duunaa hundam edaa Baasaaniinsi ki'isaa Saalakaa afookko.

¹²Odim Raafaayim moolliinsi lasaanchi adil hee'u Oog Asitaarootannee Eediraya gassam hee'u Baa'sa'n uulla hundam edaakkatette. Muse'e ee minaadaba hundam kaa'aa hollukko.

¹³Ihukkaarem Isra'ee'l minaadab Gashuur minaadabaa Maa'ikaan minaadabaa hollitobee'i bikkina kaballi afeebe'em ixxuwwi Isra'ee'l minaadaphphi lambe'enne yo'o.

¹⁴Muse'e Leewi'i sullina uulli gulumma uwwukkoyyo; mashka'oomim Waa'i illagenne Muse'ena kurukkisannem Isra'ee'l Moollanni Waa'ina shokkao ihaa hincoo kitim Leewi'i sullina gulummi hee'ukko.

¹⁵Muse'em roobeel sullina moollinne moollinne uulla uwwukko.

¹⁶Ixxuwwi uulli gabaloomim Arinoo'n cebbi tochchonne yoo Aaro'eeriinsi ki'isaa ee cebbi lambe'enne yoo beero'oo Meediba'i gadanonne yoo duunanne yoo biir uullaa hundam edookko.

¹⁷Ee'isam Haseboona, duu'n biir uullanne yoo beero'uwwa Diiboona, Baamootba'ala, Beetiba'aalmina,

¹⁸Yaahaxa, Qademoota, Meefaa'aata,

¹⁹Qiiryaataayima, Siibaamaa, duu'n cebbanne yoo Xeretishaahaara,

²⁰Beetipha'oora, Phiisga'i duuniinsi woroon yoo beqer uullaa Beetiyaashiimootaa hundam edookko.

²¹Duu'nnaanonne biir uullanne yoo beero'uwwaa Haseboonanne ihaa gassam hee'u Amoore'i adil Siihoon uulla hundamee hee'ukko. Muse'em adil Siihoona, ixxeensi woroon ikka'a gassitam ee uullanne afuutto'i Miidiyaa'm awwonsaan heello'i Eewwe'e, Reeqeema, Xuura, Huuraa Reeba'aa kaa'ukko.

²²Isra'ee'l oos shito'i keeninne maqirem gennaanchi hee'u Bi'oor beet Bala'aama edda'a bisa'inne shito'o.

²³Roobeel oos uulli gabal Yoordaanoos Daajji hee'ukko; Roobeel oosina moollinne moollinne uwwamu beero'uwwii hegeegguwwii eekeen hee'ukko.

²⁴Odim Mse'e Gaad sulli lago aa'llona moollinne moollinne uulla uwwukko.

²⁵Ixxuwwi uulli gabalim Yaa'izeeraa Gala'aaxxi beero'uwwi hundaa Amoo'n oos uullika kollo edaa Raabaa'iinsi eelliinchi firinne yoo Aaro'eera afookko.

²⁶Odim Haseboniinsi ki'isaa Raamaat Misiphpaa Bixooniimaa afeebe'e ee'isam Maahinaayimiinsi ki'isaa Loodabeer tachcho afookko.

²⁷Yoordaanoos ceebbannem Beetiharaamaa Beetiniimiraa sukotaa Tsafoonaa Yoordaanoos Daajjiinsi eelliinchi firinne yoo gatu Haseboo'n adil Siihoon gassoo uulla hundam edaa hanaa'n Qarinnem Galii'l Dambalaqa afookko.

²⁸Gaad sulli lago aa'llamisina moollinne moollinne uwwamu beero'uwwii hegeegguwwii eekeen hee'ukko.

²⁹Muse'e Minaasek kolli sulli lago aa'llamisina moollinne moollinne uwwu uulluwwi kakeeno.

³⁰Ixxuwwi uullim Mahinaayimiinsi ki'isaa Baasaa'n adil Oog gassam hee'u Baasaan hundamee Baasaananne yoo Yaa'iir lohayyem beero'uwwaa hee'ukko.

³¹Gala'aaxxeka kolloo Oog gassoo uulli beero'uwwika Baasaananne yoo Asitaarootaa Eedira'aa edam hee'ukko. Oo keenim Minaas beet Maakii'l Oosaannina kollina moollinne moollinne uwwamukko.

³²Muse'e Iyyaarko'iinsi eelliinchi firinne Yoordaanoos Daajjiinsi eeqidonne Moo'aaphphi biir uullanne hee'u ammane ee uulla hundam lago aa'llona baxxansukko.

³³Ihukkaarem Muse'e Leewi'i sullina uulla uwwukkoyyo; mashka'oomim Waa'i ixxi gagim yukkisannem Isra'ee'l Moollanni Waa'i ixxi gagim yukkisannem Isra'ee'l Moollanni Waa'ina hincoo kitim ixxuwwina gulummi hee'ukko.