Read Hadiyya Iyyaas Kitaaba 14 Bible Online

Iyyaas Kitaaba 14 - Hadiyya bible

Iyyaas Kitaaba 14

¹Kana'aa'n uullanne Isra'ee'l oos ixxuwwi gagina lago aa'llo'i uulla qeessichchi Ali'aazar, Nawwe'i beet Iyyaasii Isra'ee'l sullina moolli awwonsaanii minaadabina baxxansito'i uulli kakeeno.

²Waa'i Muse'e ijaajukkannem ixxuwwi lago aa'llo'i uulla honsinaa kolli sullinaa saaminne baxxansito'o.

³Muse'e laminaa kolli sullinaa Yoordaanoos Daajji eeqidonne uulla uuwwaa hee'ukko; Yooseef shumo'i lam sulli hee'llo'o; ixxuwwim Minaasettee Efireemattee. Leewi'i sullina hee'llam beroo'uwwiinsii ixxuwwi lar, gereebii fella'ii alla'lloo beeyyiinsii bagaan mulli uulli uwwamukkoyyo.

⁵Waa'i Muse'e ijaajukkisanne Isra'ee'l minaadab uulla baxxanto'o.

⁶Yihud oos Gelgalanne yoo Iyyaas beyyo waatto'o. Ixxuwwiinsim mat hee'u Qaniiz moolli Yaafun beet Kaaleeb Iyyaasina «Waa'i manchi hee'u Muse'i kollinne Qaadees Barne'enne Waa'i Kibikkina ibikkina wocu woshsha laqqootto.

⁷Waa'ina awwaadaanchi Muse'e uullooma shaashshoomisina Qaadees barne'iinsi asse'ummane i umur sor hiincho ihaa hee'ukko; anim hanqo'i woshsha kurummo.

⁸Ihukkaarem iinninne maqire matto'i iyyabbaayyuwwi minaadaphphi wodan baachchiine bukkamoo'isa issitoohan ihukkaarem i Moollanni Waa'a murte'aa awwonummo.

⁹Muse'em ee balla iina «Moollanni Waa murte'llaa awwoontaatoo bikkina ki lokki hance'u uulli hundam hanqinam kiinaa ki oosinaa heer heerina ki'nnuwwi gulummi uulli ihookko» yaa hide'ukko.

¹⁰Waa'i Muse'ena ee sagara wocaa lasage Isra'eel udma'i uullanne taakke'llu'uuyya Waa'i wocukkisannem ee soree onti hinchoo eese foorinne egerukko. Ihukkaarem kaba iikki umur sadeentayyee onti hinchoo ihaakko.

¹¹Ihona bagaan Muse'e eese ass'u ammane malaayyaam hee'ummisam kabadem an malaayyaamo. I malaayyi ee ammane hee'ukkisam kaballam orameena, fireenaa aageenaa illagee'nnisam yookko.

¹²Ee bikkina Waa'i uwweena ee ammane wocu ka duu'n uulla kaba iina uwwe. Eekke'e hee'llo'i. Anaaq oosim hinkido'i keen hee'lloda'ee ixxuwwi beero'uwwim geejjuwwa lob keenoo girbamaakkoo keenoo ihukkisa at macceessaa hee'llitto. Ihukkaarem Waa'i iinninne maqire ihoo bikkina ixxi yukkisannem ixxuwwa holloommo» yukko.

¹³Ee lasage Iyyaas Yaafun beet Kaaleeba maase'ukko. Ixxenam Keebroona gulummi issaa a'lloo'isina uwwukko.

¹⁴Daniiz moolliinsi Yaafun beet Kaaleeb Isra'ee'l Moollanni Waa'a murte'aa awwonu bikkina Keebiroon kaballi afeebe'e Kaaleeb shumo'ina gulummi ihaakko.

¹⁵Keebiroonika summa gaassi Qiriyaat Arba'a yakkam hee'akko'o. Mashka'oomim Arba'a Anaaq manni hundiinsim loban hee'ukko. Ee lasage oo uulli qasanchiinsi usheexxukko.