Read Hadiyya Iyyaas Kitaaba 18 Bible Online

Iyyaas Kitaaba 18 - Hadiyya bible

Iyyaas Kitaaba 18

¹Isra'ee'l minaadab kaa'lla'a ee uulla amadda'a lasage Seello'onne wixxita'a Waa'ina otossakkam dukkaana kaasso'o.

²Isra'ee'l minaadabiinsi uulla amaddobee'i lamar sulli hee'llo'o.

³Ee bikkina Iyyaas Isra'ee'l minaadabina «Gaassi ki'nnuwwi anno'i Moollanni Waa'i ki'nnuwwina uwwu uulla aaggakka'a lago aa'lloo'n afuuttakkamok hinki balli afeebe'e?

⁴Sulluwwiinsi annannichchiinsim sas sas mancho doo'llehe; anim annannichchinam afoo qaxa la'eena uullik haraaroom hinkaa'nda'e soroobba'a laqqam manna uulloomanne hundoomannem asse'oommo; ee lasage i beyyo daba'llita'a waattamo.

⁵Oo ixxuwwi saarayyita'a laqqam uulli lamarem sullinam baxxansamookko; Yihuxxi sulli woroo'n qarinne Yooseef sullim hanaa'n qarinne ixxuwwina uwwamu uulli sharada amadda'a hee'llamo.

⁶Uulla lamar beyyonne baxxansitakka'a kitaabbakko'i woraqata i beyyo eebbehe; ki'nnuwwina ni Moollanni Waa'a xa'mmeena saamo issoommo.

⁷Ihukkaarem Leewi'i oosik bikki qeessuwwi ikka'a Waa'ina awwaadimmi ihu bikkina ixxuwwina mulli keeninne maqire uulla baxxantamoyyo; Roobeelik Gaadikii ee'isam Minaas sullik kollii Yoordaanoos Daajjiinsi eelliinchi firinne Waa'ina awwaadaanchi Muse'e uwwu uulla gaassita'ahim lago aa'llo'ookko» yukko.

⁸Oo asse'anto'i maanni uullika duuha'a saarayyita'a moo'lleena matteena illageen Iyyaas «Uullooma hundoomam do'llakka'a moo'llakka'a kitaabbakka'a i beyyo daba'llitakka'a waallehe; anim ka Seelo'onne ki'nnuwwi bikkina Waa'a xa'mmeena saamo issoommo» yaa kurukko.

⁹Iyyaas asse'u mannim uulla do'lla'a moo'llo'o; yoo beero'uwwa hundam lamar sullina hinkid baxxansamooda'e kitaabba'a amaddo'o; ee lasage Iyyaas yoo beyyo Seelo'o daba'llita'a waatto'o.

¹⁰Iyyaasim Waa'a xa'mmeena saamo issukko; gatto'i Isra'ee'l sullina annannichchinam ihoo uulli baxxanchi gudukko.

¹¹Biiniyaam sullik uulli sharaxxi saam firukko; ixxuwwina afu uulli saam yookkok Yihudaannonnee Yooseef sulli lambe'ennettee hee'ukko.

¹²Hanaa'n qarinne yoo gabalim Yoordaanoos Daajjiinsi ki'isaa Iyyaarko'iinsi hanaa'n qarinne iim firaa eelliinchi aaggi kollonne yoo duunaam uulli kollinne Beeti'aaween udma'i uulla afoohane.

¹³Oo gabalim woroo'n qa'l kollinne gaassi Looza yakkam Beetee'l kollonne firaa woroo'n Beetihooroon duu'n kolli firaa Axaaroot Adaaranne dillookko.

¹⁴Oo gabal mulli kollinne ee duuniinsi eelliinchi aagginne woroo'n qaranne qinxaa Yihuxxi sulli sharad ihu Qiiryaatba'aal beero'onne te'im Qiiriyaat Yi'aariimanne higookko; oohim eelliinchi fi'l kollinne yoo gabala.

¹⁵Woroo'n qarinne yoo gabalim eelliinchi aaggi kollinne Qiiriyaat Yi'aariim lasaanchiinsi ki'aa Neeftoh wo'i bu'uwwanne afookko.

¹⁶Ee beyyiinsim oo gabal Heenoom beet cebba moo'oo duu'n lugumonne dillookko; ookkim Raafaayi'm cebbi hanaa'n qarinnette; eehanniinsim Heenoom cebbanne dillaa Iyyaabuus manni gabalinne aa'aa Eenroogeela afookko.

¹⁷Ee lasage hanaa'n qaranne daba'llaa Eenishimeesh kolli marookko; ee beyyiinsim Galiiloota marookko; oohim Adumii'm beqera moo'oo'isiinsette; ee'isam Roobeel beet Booheen kinanne dillookko.

¹⁸Hanaa'n qarinne Yoordaanoos cebba moo'oo kollinne dillookko.

¹⁹Gabaloom Beetihoolaag midaadinne higookko. Sooqixxi Damlaqiinsi hanaa'n qarinne Yoordaanoos Daajjiinsi woroo'n qar afeebe'e marookko; oohim woroo'n qarina gabala.

²⁰Eelliinchi firinne yoo gabal Yoordaanoos daajje; oohim ee kululleetannee ee gabalannee afeebe'e Biiniyaam sulli uulla.

²¹Biiniyaam sulli beero'uwwi moolli moollinnem Beetihoogila, Eemeqaxiixa,

²²Yoordaanoos cebbanne yoo Xamaaraayima, Beeteela,

²³Awiim Faaraa, Oofiraa,

²⁴Kafaaramoonaay, Oofiniinaa Geebaa'aa yakka'a weeshakkam tommoo lam beero'uwwaa ihukkuuyyi ixxuwwi kululleetanne yoo hoffi beero'uwwaa olla'uwwaa edookko.

²⁵Odim Gaba'oona, Raama'a Ba'eeroota,

²⁶Misiphpha, Kafiira, Mooxa,

²⁷Reeqeema, Yirpha'eela, Taaraala,

²⁸Xeelaa'a, Eeleefa, Iyyaabuusa, Giibi'aa Qiryaat Yi'aariimaa yakkam tommoo soor beero'oo ihukkuuyyi ee kululleetanne yoo hoffi beero'uwwam edookko; oohim Biiniyaam sulli moolli moollinnem aa'llo'i uulla.