Read Hadiyya Iyyaas Kitaaba 2 Bible Online

Iyyaas Kitaaba 2 - Hadiyya bible

Iyyaas Kitaaba 2

¹Naawe'i beet Iyyaas «Uullooma annanni issitakka'ahim Iyyaarko'o mattakka'a moo'llehe» yaa Saxiima yakkam beyyiinsi lam shaashshaano maaxaqqanne asse'ukko. Ixxuwwim matta'a Ra'aaba yakkam buubbeesaanchi meentichchi mine aagga'a eekke'em gatto'o.

²Iyyaarko'i Adilim «Isra'ee'l oosiinsi ka uulla shaashshiteena ka hiimo Iyyaarko'i beero'o aago'ookko» yakkam woshsha maccesukko.

³Ee bikkina ixxim «Ka uulla shaashshiteena waatto'oo manni ikko'i bikkina ki mine aaggo'i manna fisse» yaa Ra'aab beyyo asse'ukko.

⁴Oo meentichchom lamem manchom massita'a maaxxo'o. Isem ixxuwwa hasoo keenina «Eeyya hanqame; mannoom i mine aagga'a hee'llo'o; ihukkaarem hanniinsi waattoda'e la'ummoyyo.

⁵Uulli hiimaa kulkullaakkoohaannonne beero'i qash gooc xufameena illage mannoom fitta'a matto'o; hanno mattoda'e la'umbee'i bikkina qaqqissakka'a laseessakkolas siiddakkamo» yito'o.

⁶Ihona bagaan lamem manchom mi'nnaannonne fooqanne fissita'a tuubbo'i talbi gaaphphi woronne maaxxa'a hee'llo'o.

⁷Adil asse'u keenim beero'iinsi fitta'a matto'isam beero'i qash gooc xufamukko; asse'anto'i keenim shaashshitam keeno laseessu'uuyyi Yoordaanoos Daajje firakkam googo amadda'a matto'o.

⁸Shaashshitam keenim iinse'lleena illage Ra'aabe fooqanne fitto'o.

⁹Isem ixxuwwina «Waa'i ka uulla ki'nnuwwina uwwukkisaa ki'nnuwwa baddimmim ni hanenne ubukkisaa ka uullanne yo'i keen hundim ki'nnuwwi illagenne baa'lla'a bukkanto'isaa la'aammo.

¹⁰Gibxi uulliinsi fittakko'i ammane Waa'i Ertiira'i Dambalaqa ki'nnuwwi illagenne hinkid gokkisuda'ee Yoordaanoosiinsi eelliinchi firinne hee'llo'i lamem Amoore'i adilam Siihoonaa Oogaa maha issitakkoda'ee hinkid shitakka'a gullitakkodda'ee maccensaammo.

¹¹Eekka macceensummi ammanenne ni wodan baachchinne bukkamukko; ki'nnuwwiinsi ki'ukkaaninne hundim baachchinne huxxe'nnumo; ki'nnuwwi Moollanni Waa'i hanaan iimanennee woroonim uullannee ixxi Waa'a.

¹²An kaba ki'nnuwwina eroka baxummisa ki'nnwwim iyyanni minina eroka baxxakkeena Waa'a summinne hide'llehee hanqo'i mare'em uwwehee.

¹³Odim iyyanna, iyyumma, iyyabbaayyuwwa, iyyaayyuwwaa ixxuwwi abaroosaa hundam gatissehe; neesem shitakkotte» yito'o.

¹⁴Oo mannim isena «Ka ni woshsha hundam mulli keenina kuttibeelas Waa'i ka uulla niina higisaa uwwoo ammane hanqo'isam kiina er luwwa issinoommo. Eekka issinummibeelas Waa'i ni foore ki'nnuwwi foo'l bikkenne bi'isona» yito'o

¹⁵Ra'aabe hee'llam hee'llo'i minim Iyyaarko'i beero'i qashinne mat ihaa baxamaakkoohan hee'u bikkina ee shaashshitam keeno maskootinne aad usinne dilliisso'o.

¹⁶Isem ixxuwwina «Ki'nnuwwa laseessam keen siiddambee'isa duunnuwwanne fillehe; ixxuwwi daba'lliteebe'i afeebe'e sas balli googo mattakkamo» yito'o.

¹⁷Oo mannim isena «Ka hidiissitti hidiro hundam egelloommo.

¹⁸Ka uulla aangoommi ammane ka kashar fatira neese dilliissit maskootanne calcalaa'llitbeelasii kiyyanna, kiyyumma, kiyyabbaayyuwaa kiyyanni mi'n abaroosaa hundam ki minenne wixxaa'llitbeelasii hidiissitti hiditaniinsi neese mucculluwwa.

¹⁹Ayyim ki miniinsi biiranne firaa lehulas ee xiigiinsi neese mucculluwwa. Ee xiigina xa'mmamookkok ixxi gagame; ihukkaarem ki minenne afuutta'a yo'i keeniinsi matim aphphisaamuta'n ee xiigina xa'mmammoommok neesette.

²⁰Ihukkaarem ka issinoommi luwwa ayyenam kuttilas neese hidiissitti hiditaniinsi neese muccuwwa» yito'o.

²¹Isem ixxuwwina «Ki'nnuwwi yitakko'isa ihona» yita'a geegeesso'aare iseensi annanni ikka'a matto'o; ee lasage Rahaabe kashar fatira maskootanne katta'a calcalaa'llo'o.

²²Ixxuwwim ee beyyiinsi duunnuwwanne fitto'o; laseessam mannim goog hundannem hassa'a hoogga'a daba'lliteebee'e sas ballina ee beyyonne maaxamto'o.

²³Lamem manchim duuniinsi dillita'a daajji eeqidonne fitto'o; ixxuwwim Naawe'i beet Iyyaas beeyyo daba'llita'a ixxuwwanne afu luwwi hundam kutto'o.

²⁴Ixxuwwim Iyyaasina «Waa'i hanqinam ee uulla hundam ni anganne higisaa uwwaakko; mashka'oomim ee uullanne yoo manni hundikim neese baddimminne ki'ukkok wodan bukkamaakko» yito'o.