Read Hadiyya Iyyaas Kitaaba 22 Bible Online

Iyyaas Kitaaba 22 - Hadiyya bible

Iyyaas Kitaaba 22

¹Ee lasage Iyyaas Roobeel sulloo Gaad sulloo Minaas sulliinsim kolloo weeshaa ki'nnuwwa ijaajukkoka hundam issitakko'ookko;

²«Waa'ina awwaadaanchi Muse'e ki'nnuwwa ijaajukkoka hundam egettakko'ookko; anim ijaajummi sagara hundam egettakko'ookko.

³Lobakat ammaniinsi kaballi afeebe'e ki'nnuwwi abbaayyuwwa laggakko'oyyo; Moollanni Waa'ikam ijaajo qoxxitakka'a egettakko'ookko.

⁴Oonoo'llehe; ki'nnuwwi Moollanni Waa'i aagu neeyyaxxi saga'llisannem ki'nnuwwi abbaayyuwwi ikko'i Isra'eela usheexisaakko. Ee bikkina Waa'ina awwaadaanchi Muse'e Yoordaanoos eeqidonne uwwu ki'nnuwwi lago aa'llakko'i uullanne yoo mine daba'llitakka'a mallehe.

⁵Waa'ina awwaadaanchi Muse'e ki'nnuwwi Moollanni Waa'a iittitakkamisina, ixxi googonnem mattakkamisina, ixxi doo'llam wonshitakkamisina, ixxi ijaajom egettakkamisina, ixxenam amma'nnantakko'oo keen ikkakka'a hanqo'i wodaninnee hanqo'i foorinnee awwaaddakkamisinaa ijaaju ijaajoo seeraa qoxxitakka'a egellehe» yukko.

⁶Iyyaasim ixxuwwa maasse'aa geegeesukkaare hee'llam beyyo matto'o.

⁷Minaas sullina kollina Muse'e Baasaananne uulla uwwaa hee'ukko. Gatu kollina odim Iyyaas Yoordaanoosiinsi eelliinchi aaggi kollonne ixxuwwi abbaayyuwwinne maqirem uulla uwwukko; Iyyaasim ixxuwwa maasse'aa geegeesukko.

⁸Ixxim «Oono'llehe kaba lobakat amaxxa oohim laro, bira, worqa, naasxaara, xaaraa lobakat eddechchaa amaddakka'a ki'nnuwwi mine elle'llehe; diina'iinsi boggakko'i luwwa ki'nnuwwi abbaayyuwwinne maqirem baxxammehe» yukko.

⁹Ee bikkina Roobeel sulli, Gaad sullii Minaas sulliinsim kollii Kana'aananne yoo Seelo'onne yo'i Isra'ee'l minaadabiinsi annanni ikka'a Waa'i Muse'i kollinnetti ihaa ijaajukkisanne illageen ixxuwwi uulli issita'a lago aa'llo'i Gala'aaxxi uulla daba'llita'a matto'o.

¹⁰Roobeel sulli, Gaad sullii Minaas sullik kollii Kana'aa'n uullanne yoo Yoordaanoosa hincita'a affo'isam ee daajji gadanonne kitima kitimakkam lobakata haraar beyyo axisso'o.

¹¹Isra'ee'l minaadabinam «Oono'llehe, Kana'aa'n uullaannonne tochchonne Yoordaanoos Daajji gadanonne yoo ni uulli tochchonne Roobeel sulli, Gaad sullii Minaas sulliinsim kollii kitima kitmakkam beyyo axisso'ookko» yakkam woshshi afukko.

¹²Isra'ee'l minaadab eekka maccesso'i ammanenne hundim mat ikka'a ixxuwwa qassena seelo'onne wixxito'o.

¹³Ee lasage Isra'ee'l minaadab Gala'aaxxi uullanne yo'i Roobeel sulli beyyoo, Gaad sulli beyyoo Minaas sullik kolli hee'llo'i beyyo qeessichchi Ali'aazar beeto Finihaase asse'llo'o.

¹⁴Ixxenne maqirem Isra'ee'l minaadaphphi sulliinsi annannichchiinsim mat mato tommi awwonsaano asse'llo'o. Oo mato'i keenim Isra'eeliinsi moollinne, moollinne feeranto'i awwonsaan hee'llo'o.

¹⁵Ixxuwwim Gala'aaxxi uullanne Roobeel sulli beeyyo, Gaad sulli beeyyoo Minaas sullikim kolli hee'llo'i beyyoo matta'a,

¹⁶«Waa'i minaadab hundim ki'nnuwwina ‹Isra'ee'l Waa'anne baxxakko'i ku baaxiil marichcho? Kitima kitimakkam beyyo axisimminne kaballa waa'ina boqqitakkakko'ookko; ixxo awwonimmiinsim laso daba'llitakko'ookko.

¹⁷Feegooranne banxummi baaxiil ihooyyoonnihe? Ee mashka'inne Waa'i minaadabanne booban dillukko. Kaballi afeebe'e neese eehanniinsi muccullummoyyo.

¹⁸Ki'nnuwwi kaballam Waa'a awwonimmiinsi laso daba'llitakkamonnihe? Kaballa Waa'anne boqqitakkolas soodo ixxi Isita'ee'l minaadab hundannem quuqookko.

¹⁹Ki'nnuwwi yoontakke'i uulli Waa'ina otossimmina makkoobee'an ihulas Waa'i ixxi minaadabinne edamoo dukkaan kaaxxu uulla waattakka'a niinninne maqire uulla baxxammehe; ihukkaarem ni Moollanni Waa'ina kitima kitimakkam beyyiinsi bagaan mulli kiti'm beyyo baximminne Waa'anne boqitakka'a neesem ki'nnuwwinne mqire boqquwwi issitakkotte.

²⁰Zaaraah beet Akkaane hirim ihu luwwa massimminne baaxiilo baxu bikkina Isra'ee'l minaadab hundannem quunqi dillukkoyyonihe? baxu baaxiilina xale'i ixxi lehukkoyyo› yito'ookko» yito'o.

²¹Ee lasage Roobeel sullii Gaad sulli Minaas sullik kolli Isra'ee'l moolli awwonsaanina.

²²«Ixxi hundiinsim lophphoo Malaayyaam Moollanni Waa! Ixxi hundinsim Lophphoo Malaayyaam Moollanni Waa! Eekka mahina baxummida'e ixxi la'ookko; Isra'ee'l minaadabim eekka laqqona hansoommo. Waa'ina boqqinoomilas tee'm amma'nnancha hongoomildas kaballa neese gatissakkotte.

²³Ka kitima kitimakkam beyyo Waa'a awwonimmiisi daba'llinoommisinaa shokkoo kitimaa huribaaxxi kitimaa mateeyyoo'm kitimaa hincaa'imminaa yinaa banxaammoolas Waa'i niinninsi baado miqisona.

²⁴Neese kaka issummok Waaroo doollenne ki'nnuwwi oos ni oosina ‹Isra'ee'l Moollanni Waa'inne ki'nnuwwina mah edanchi hee'aate?

²⁵Ki'nnuwwi Roobeel oosoo Gaad oosoo; Waa'i ki'nnuwwi lambe'enne ni lambe'ennee Yordaaoos Daajje sharad bee'e› yimminne «Ni oos Waa'a badoobee'isa ki'nnuwwi oos issiteena xantamo yinaa badinummi bikkinatte.

²⁶Ee bikkina neese banxummi kiti'm beyyi shokkoo kitima te'im mulli kitima hincaa'akkamaneyyo› yinummok ee bikkinatte.

²⁷Ihukkaarem neese kaka issinummok ni minaadaphphi lambe'ennee ki'nnuwwi minaadaphphi lambe'ennee mare'i ihaa hee'oo'isinatte. Oohim ni lasaqqi qaranchina Keesamaakkoo Dukkaananne Waa'ina otossinummisinaa shokkook kitimaa mulli kitima, mateeyyoo'm kitimaa kitimmummuuyyi hee'nnummisinaa mare'i ihoo'isinatte. Oohim ki'nnuwwi oos ni oosina «Waa'i beyyonne ki'nnuwwina sharad bee'e» yamoobee'isina awwaadookko.

²⁸Ayyillaukko waaroo doollenne niina te'im ni shumo'ina eehid yakkota'n ‹Niyyanno'i baxxo'i Waa'ina kitima ki'nnuwwi lambe'ennee ni lambe'ennee naqaash ihoo'isinattee bagaan shokkoo kiti'm bikkina te'im mulli kiti'm bikkinayyo› yinoommo.

²⁹Neese hanqoomam Waa'anne boqqinummoyyo; shokkoo kitima hincaa'nneena sawwinaa kitima kitimakam beyyo baximminne Waa'a awwonimma kaballa ulloommoyyo; ixxonne otossakkam dukkaa'n illagenne yoo ni Moollanni Waa'ina baxamukkaanniinsi mulli annanni ihaakkoo kitima kitimakkamaanniinsi mulli annanni ihaakkoo kitima kitimakkam beyyo banxummoyyo. Eekka sawwinaammoolas ookki niinniinsi qee'llona» yito'o.

³⁰Roobeel sullii Gaad sullii Minaas sullii wocco'i woshsha macceesso'i ammanenne qeessichchi Finihaasii minaadab asse'llo'aare ixxenne maqire matto'i Isra'eelina moolli awwonsaanii lobakata liiranto'o.

³¹Qeessichchi Ali'aazar beet Finihaas Roobeel sullina, Gaad sullinaa Minaas sullinaa «Ki'nnuwwi Waa'anne boqqitakkobee'i bikkina oono'llehe Waa'i niinninne maqire yoo'isa kaba lanqaammo; Isra'ee'l minaadabam Waa'i quunqiinsi gatissakko'ookko» yukko.

³²Ee lasage qeessichchi Ali'aazar beet Finihaasii awwonsaanii Gala'adanne yoo Roobeel oos beyyiinsii Gaad oos beyyiinsii Kana'aananne yo'i Isra'ee'l minaadaphphi beyyo daba'llito'o; ixxuwwinam ee beyyonne ihu woshshi hundam kutto'o.

³³Isra'ee'l minaadab eekka macceesso'i ammanenne liiranta'a Waa'a galaxxito'o. Ee lasage Roobeel oosii Gaad oosii hee'llam uulla qassa'a orinne bi'isseena hasso'oyyo.

³⁴Roobeel oosii Gaad oosii «Waa'i Moollanni ihukkisina kuki ni lambe'enne naqaasha» yitu'uuyyi ee kitima kitimakkam beyyo «Naqqaasha» yita'a weeshsho'o.