Read Hadiyya Iyyaas Kitaaba 23 Bible Online

Iyyaas Kitaaba 23 - Hadiyya bible

Iyyaas Kitaaba 23

¹Waa'i Isra'ee'l minaadoba ixxuwwi kululleetanne yoo diina'iinsi hundiinsim usheexxisaa lasage lobakat doolli higukko. Ee ammane Iyyaas lobakata lomma'nnaa hee'ukko.

²Iyyaas Isra'ee'l minaadaba, ixxuwwika lommana, awwonsaano, oogataanoo daannuwwaa weeshaa «An lobakata lomma'nnaammo.

³Ki'nnuwwi Moollanni Waa'i ki'nnuwwa hara'mmeena mulli minaadabanne issukkoka hundam moo'llakko'ookko; ki'nnuwwi Moollanni Waa'i ixxoteme.

⁴Oonoo'llehe an Yoordaanoosiinsi ki'isaa eelliinchi aagoo kollonne yoo Meedeteraaniyaa'n Dambalaq afeebe'e Kaa'ummi minaadaphphi uullaa mulli kaa'umbee'i minaadaphphi uullaa ki'nnuwwi sullinne sullunne gulummi issitakka'a a'llitakkamisina saaminne baxansaa uwwaammo.

⁵Ki'nnuwwi Moollanni Waa'i ixxuwwa ki'nnuwwi illagiinsi binaa'ookko ki'nnuwwi illagiinsim ixxuwwa fisaa hollookko; ki'nnuwwi Moollanni Waa'i yukkisannem ixxuwwi uulla lago aa'llakkamo.

⁶Ee bikkina Muse'i see'l kitaabanne kitaabamukkoka hundam egettakkeenaa issitakkeenaa lobakata qoxxehe; ee ijaajiinsim makkannem qeddannem daba'llititte.

⁷Ki'nnuwwi lambenne gatto'i Isra'ee'l ikkobee'i mulli minaadabinne mateeyyooma issitakkote; ixxuwwi waa'uwwikam summa weeshakkote; ee waa'uwwi suminnem hide'llakkote; ee waa'uwwinam awwaadaan ikkakkottee otossitakkotemee.

⁸Ihukkaarem kaballi afeebe'e issitakko'isam ki'nnuwwi Moollanni Waa'ina amma'nnamitakko'o keen ikkehe.

⁹Waa'i lob keenoo malaayyaam minaadabaa ki'nnuwwi illagiinsi hollaa fissaakko. Ka balli afeebe'em ayyim ki'nnuwwinne uullixxameena xanukkoyyo.

¹⁰Ki'nnuwwi Moollanni Waa'i yukkisannem ki'nnuwwina oramookkok ixxot ihu bikkina ki'nnuwwik mat manchim ixxuwwika kum manna hollookko.

¹¹Ee bikkina ki'nnuwwi Moollanni Waa'a iittitakkamisina lobakata qoxxehe.

¹²Ihukkaarem ki'nnuwwi daba'llitakka'a ki'nnuwwi lambe'enne gatto'i Isra'eel ikkobee'i minaadabinne mateeyyooma issitakkolasii ki'nnuwwim ixxuwwi meento ixxuwwim ki'nnuwwi meento eebimminne hamarantakkolasii.

¹³Ki'nnuwwik Moollanni Waa'i uwwu ka er uulliinsi ki'nnuwwi bi'llakkeebe'i afeebe'e ixxuwwi ki'nnuwwina qaashaa qolatoo; ki'nnuwwi afarinam jiraafaa ki'nnuwwina qaashaa qolatoo; ki'nnuwwi afarinam Waa'i ka Isra'eel ikkobee'i minaadaba ki'nnuwwi illagiinsi fisaa holloobee'isa erisa laqqehe.

¹⁴«Oono'llehe an ka lasage lobakat ammane hee'oommoyyo; ki'nnuwwi Moollanni Waa'i aagu neeyyaxxi saga'llisannem ki'nnuwwina issu er luwwi hundam ki'nnuwwi hundim ki'nnuwwi wodaninnee foorinnee hundinnem laqqakkamo. Eehannikim ma'llichchim Gatoo'n hundim wo'mmaakko.

¹⁵Ihukkaarem ki'nnuwwi Waa'i yu er luwwi hundam ki'nnuwwina wonshukkisam ee'isam ki'nnuwwina uwwu ka er uulliinsi ki'nnuwwi bi'iseebe'i afeebe'e jor luwwam ki'nnuwwanne eebookko.

¹⁶Waa'i egetakkona ijaaju hidi'l sagara gindltakkolasii mulli Waa'uwwam qophpha'n waa'uwwam matakka'a awwaaddakkolasii ee keeninam otossitakkolasii ee ammane Waa'i quunqi ki'nnuwwanne dillookko. Ki'nnuwwina uwwu ka er uulliinsim qaqisonne bi'llakkamo» yukko.